Na Faapefea ona Latou Iloa?

Na tuuina mai e Peresitene Dieter F. Uchtdorf, Fesoasoani Lua i le Au Peresitene Sili, se savali i tuafafine o le Aualofa i le taimi o le sauniga aoao o le Aualofa 2011 lea ootia ai lo’u loto ma aumaia ia te au le filemu. Na ia talanoa e uiga i le fugalaau itiiti aua nei galo au ma le ala e avea ai ona petala e lima ma sui o ni mea e tatau ona tatou manatua pea.¹

Ina ua maea le sauniga na faamatala mai ia te e la’u tama teine o Alyssa se tala e uiga i lana uo o Jessie, e i ai sana pisinisi laitiiti e oka ai meaai. Sa talosagaina Jessie e taitai o le Aualofa o lana siteki e faia se taumafataga mama e tufaina atu pe a maea le sauniga aoao a Le Aualofa. Sa ta’u atu e Jessie i a Alyssa sa ia iloaina vave lava le mea e tatau ona ia faia—250 tamai keke. Na ofo atu Alyssa e fesoasoani e aumai tamai keke i le nofoaga autu o le siteki.

Na oo mai le aso o le fonotaga, ma ina ua alu atu Alyssa e fesoasoani, na ia mauaina Jessie ua toeitiiti lava tagi. Ua saunia tamai keke, ae na auina atu e Jessie se ata o tamai keke i se tasi o le aiga lea na fai mai sa lē manaia tele mo le fonotaga.

Sa amata ona le mautonu Jessie ia te ia lava. Sa ia faapea o taitai o le Aualofa a le siteki o loo faamoemoeina se mea e sili atu ona matagofie nai lo ana tamai keke faatauvaa. Sa taumafai malosi o ia e mafaufau po o le a se auala e toe teuteu ai tamai keke, ae ua le lava se taimi. Sa ave e ia ma Alyssa tamai keke i le tulaga lena sa i ai, faatasi ai ma Jessie o loo lagonaina faapea ua ia faatoilaloina tuafafine—seia oo ina saunoa mai Peresitene Uchtdorf.

A o talanoa mai e uiga i le fugalaau laitiiti o le aua nei galo au, na faaali mai se ata o le fugalaau itiiti lanumoana i luga o le lau. O se fugalaau e matuai faatauvaa lava ae matuai matagofie lava i ona petala maaleale. O le savali a Peresitene Uchtdorf na ootia ai loto o tagata uma e pei a o ia augani mai ia i tatou e aua le matuai tosina ese i fugalaau felanulanuai lapopo o siomia ai i tatou ona galo ai lea o upumoni e lima faatauvaa ae taua ua ia aoaoina ai i tatou.

Ina ua uma le tatalo faaiu, sa malaga atu uso i le fale faafiafia. Ina ua savavali atu Alyssa ma Jessie i totonu, na la maua atu ai tagata uma o loo siomia le laulau o le taumafataga mama ma tuufesili, “Na faapefea ona latou iloa?”

O tamai keke taitasi na teuina i le suka paepae faatasi ma se tamai fugalaau faatauvaa, matagofie, mama, e lima petale o le aua nei galo au.