Mulimuli i le Perofeta

Ou te manao e fautuaina ni auala se lima e mafai ona tatou mulimuli ai i le faataitaiga a Peresitene Monson.

1. E mafai ona tatou mafaufau lelei, ma e mafai ona tatou fiafia.

I le Penina Tau Tele, na faamatalaina e le Perofeta o Iosefa Samita lona “uiga fiafia” (Iosefa Samita—Talafaasolopito 1:28). “Fiafia” e faamatalaina ai foi Peresitene Monson.

I se tasi taimi na saunoa mai Peresitene Monson: “Tatou … te mafai ona filifili ia i ai se uiga faaalia lelei. E le mafai ona tatou faatonuina le matagi, ae e mafai ona tatou fetuunaia la o le vaa. I se isi faaupuga, tatou te mafai ona filifili ina ia maua le fiafia ma le manatu lelei, e tusa lava po o le a se mea e oo mai lo tatou ala.”¹

I se tasi aso na ou faatalitali ai i fafo o le potu o le Au peresitene Sili. Sa valaaulia au e auai i se fonotaga e talanoaina ai ni mataupu taumalumalu. Sa ou saofai filemu i fafo o le potu, na o au. Sa ou manatu ua uma ona fono le Au Peresitene Sili, ma o le a valaaulia au e faatasi ma i latou i ni nai minute.

A o ou saofai ai iina, na mafai ona ou faalogoina se tasi o savali i lalo o le fale faafiafia ma mapumapu. Sa ou mafaufau ia te au lava, “O se tasi e le malamalama i uiga talafeagai. E le tatau ona savavali solo ma mapumapu i fafo o le ofisa o le Peresitene o le Ekalesia.”

I nai minute mulimuli ane na savali ane le tagata mapumapu i le tulimau—o Peresitene Monson. Sa fiafia o ia, ma sa manatu i le lelei. Sa faafeiloai mai ia te au ma le alofa ma fai mai, “Ou te matea o le a tatou amataina le fonotaga i ni nai minute.”

E ui lava o loo i ai le mamafa o le Ekalesia atoa i luga o ona tauau, o ia o se faataitaiga o le fiafia ma e ia te ia lava i taimi uma se uiga faaalia lelei. E tatau ona tatou faapena.

2. E mafai ona tatou agalelei ma agaalofa i tamaiti.

Na fetalai soo Iesu i fanau. O Lana perofeta, o Peresitene Monson, e talanoa soo foi e uiga i fanau. Ua ou vaai, ae maise lava i faapaiaga o malumalu, o lona alofa tele i fanau ma, e ala i ana faataitaiga, ua aoaoina i tatou i le auala e taulimaina ai i latou. I faapaiaga o malumalu uma lava sa ia taulai atu i fanau. E fiafia o ia e faaaofia i latou i le sauniga o le maatulimanu ma e valaaulia i taimi uma nisi o i latou ai e tuu sina sima i le maatulimanu e auai i le faamaeaina faafaatusa o le malumalu. Na te faia ia avea o se mea malie mo i latou. Na te faia ia manatua pea e i latou. Na te faaalia lava i taimi uma se mata ataata lapoa lava mo i latou. Na te uunaia ma faaviivii ia i latou. O se mea matagofie e vaaia.

O ana faafeiloaiga mafanafana e i ai taimi e aofia ai le pati maualuga o lima, faaminoinoi ona taliga, ma le faamalosiauga e auauna atu i misiona ma faaipoipo i le malumalu.

I ni nai tausaga ua mavae, sa faatulagaina ai Peresitene Monson e faapaia le Malumalu o Oquirrh Mountain Iuta i lona aso fanau. A o ia taunuu atu i le malumalu ma agai atu i le faitotoa i luma o le malumalu, ua faapotopoto se vaega o tagata talavou. Na mautinoa lava lo latou iloa o le aso fanau lea o Peresitene Monson ona sa amata ona latou usuina le pese “Manuia lou aso Fanau” ia te ia. Sa ia taofi ma faasaga atu ia i latou ma se ataata lapoa i ona foliga. Na amata foi ona talotalo ona lima e pei o loo ia taitaia i latou i le pese. I le faaiuga na latou faaopoopoina se fuaiupu “Ma ia tele nisi.” Sa ia fai mai ia te au, “O la’u vaega lena e fiafia i ai.”

E alolofa le fanau ma le autalavou a le Ekalesia ia te ia, ma e leai so latou masalosalo e alofa foi o ia ia i latou!

3. E mafai ona tatou mulimuli i uunaiga a le Agaga.

Na matagofie le faamatalaina e Peresitene Monson o lona tuuto atu i le Alii ma lana tautinoga e mulimuli i uunaiga a le Agaga i upu nei: “O le aafiaga aupito matagofie na ou iloa i le olaga o le lagonaina lea o se uunaiga ma faatinoina ma iloa mulimuli ane o le faataunuuina o le tatalo a se tasi po o le manaoga o se tasi. Ma ou te manao lava i taimi uma i le Alii ina ia Ia silafia, afai Na Te manaomia se feau e tatau ona fai, o le a tamoe Tom Monson e fai lena feau mo Ia.”²

O le mamanu lena e tatau ona tatou mananao uma e mulimuli ai.

4. E mafai ona tatou fiafia i le malumalu.

O le a tusia Peresitene Monson i le talafaasolopito o se tasi o tufuga maoae fau malumalu i le talafaasolopito o le Ekalesia. Talu ona avea ma Peresitene o le Ekalesia ia Fepuari 2008, o loo ia faaauau pea le galuega tele o le fausiaina o malumalu. I le ono tausaga na avea ai o ia ma perofeta, ua fofogaina mai e Peresitene Monson fuafuaga mo le fausiaina o malumalu fou e 33.

Ua saunoa mai peresitene Monson, “Ia taitasi i tatou ma ola i ni olaga agavaa, ma lima mama ma loto mama, ina ia mafai ona pa’i mai le malumalu i o tatou olaga ma o tatou aiga.”³

Ua ia tuuina mai foi lenei folafolaga ofoofogia: “A o tatou pai atu ma fiafia i le malumalu, ma auai i le malumalu, o le a atagia mai i o tatou olaga lo tatou faatuatua. A o tatou o atu i nei maota paia o le Atua, a o tatou manatuaina feagaiga ua tatou osia i totonu, o le a mafai ona tatou onosaia tofotofoga uma ma faatoilaloina faaosoosoga taitasi.”⁴

Ia tatou mulimuli i le mamanu ua faatulagaina e le perofeta mo i tatou i le fiafia i le malumalu.

5. E mafai ona tatou agalelei, mafaufau alofa, ma agaalofa.

O Peresitene Monson o se faataitaiga matagofie o le agalelei atu i isi. O lana galuega auauna atoa lava ua faatumuina i le faia o asiasiga i aiga; tuuina o ona lima i luga o ulu ma tuuina atu o faamanuiaga; faia o valaauga faafuasei i le telefoni e faamafanafana ma faamalosiau; auina atu o tusi o le faamalosiauga, viia, ma le talisapaia; asiasi i falemai ma nofoaga autu e tausi ai tagata matutua; ma le mauaina o le taimi e alu ai i falelauasiga ma maimoaina o le maliu e ui lava i se faasologa pisi tele.

E pei lava ona o le a faia e le Faaola, ua femaliuai Thomas Monson i le faia o mea lelei (tagai i le Galuega 10:38) ma faamanuiaina ma agalelei i isi; o lenei mea ua avea ma se uunaiga malosi i lona olaga.

O se faataitaiga maoae o le agalelei o Peresitene Monson na tupu i le 2012. A o faagasolo ina maea le Malumalu matagofie o Brigham City Iuta, sa matou feiloai ma le Au peresitene Sili e talanoaina fuafuaga mo lona faapaiaga. Ona o Brigham City e na o le tasi le itula i matu o le Aai o Sate Leki, semanu e matua faigofie lava mo Peresitene Monson ona malaga i ai mo le faapaiaga.

Nai lo lena, na saunoa mai Peresitene Monson, “O Brigham City o le nuu o Peresitene Boyd K. Packer, o lenei Aposetolo maoae na saofai i ou talaane mo le tele o tausaga i le Korama a le Toasefululua. Ou te manao ia te ia ina ia maua le mamalu ma le faamanuiaga o le faapaiaga o le malumalu i lona nuu. O le a ou nofo i le fale, ma o le a ou tofia Peresitene Packer e faapaia le Malumalu o Brigham City. Ou te manao ina ia avea ma ona aso faapitoa.”

O se aso matagofie mo Peresitene Packer ma Sister Packer, o le na soifua ae foi i Brigham City. Sa matua ootia lo’u loto i le agalelei ma uiga alofa o Peresitene Monson mo lona uso a Aposetolo. E mafai uma lava ona tatou faapena. E mafai ona tatou faasoa atu ma ia agalelei ma ia sili atu le manatu mo i latou o siomia i tatou.

Na aoao mai e Peresitene Monson ia i tatou le ala e ola ai i o tatou olaga i ana savali matagofie ma musuia i konafesi aoao. Ua ia aoaoina i tatou i le ala e avea ai ma soo o Iesu Keriso e ala i lana faataitaiga ofoofogia ma le matagofie faaletagata lava ia. E moni lava ua tuuina mai ia i tatou e le Alii se mamanu i mea uma, ma o se tasi o mamanu e tatau ona tatou saili e mulimuli i ai o le mamanu lea a lo tatou perofeta pele.

Ou te molimau atu o loo i ai se Atua i le lagi e silafia i tatou ma alofa ia i tatou. Ua Ia tuuina mai ia i tatou se perofeta—e taialaina i tatou, e aoaoina i tatou, ma taitai i tatou i nei aso e gata ai. Ou te talitonu ua faamoemoe mai le Alii ia i tatou e alolofa i le perofeta, e lagolagoina o ia, ma mulimuli i lana faataitaiga.

Ou te mafaufau o se faamanuiaga sili e ola ai i le aso ua avea ai Thomas S. Monson ma perofeta a le Alii. A o tatou mulimuli ia te ia ma taumafai ia avea atili e faapei o ia, e mautinoa lava o le a faamanuiaina i tatou i le avea ai ma soo faamaoni sili atu o le Alii o Iesu Keriso.