O Ai Lau Toa?
E alala le tusitala i Kalefonia, ISA.
Sa iloa e Eli lana toa, ae sa fefe o ia e ta’u.
“Tumau i lou talitonuga, ia pei se toa ma faamalosi” (Tusipese a Tamaiti, 80).
Sa ’ati ma le gatete e Eli ona atigilima. Sa savali atu Misi Fiti i vailaina o kesi ma tuu atu se fesili i tamaiti taitoatasi.
“O ai lau toa?” Sa fesili Misi Fiti ia Ierema.
Sa vave ona tali atu Ierema. “O lo’u tama!” na ia fai atu ai ma le mitamita.
Sa soisoi Misi Fiti. “Ae a oe, Sara?”
Sa faapena foi ona vave lana tali mai. “O Aperaamo Linikone.”
Sa tatavale le fatu o Eli a o faaauau atu pea Misi Eli i vailaina o tamaiti o le vasega. Ua alu le aso o talanoa e uiga i tagata totoa, ae o lea ua tatau ona ta’u mai e le tagata lava ia lana toa—i luma o le vasega atoa!
Sa fai mai Ame ma Iusitina o a la’ua toa o o la tina. Fai mai Uota o lana toa o lona tamamatua. O nisi tamaiti sa fai mai o se tupu po o se peresitene.
Ua toe nei o ni nai tamaiti a o lei oo mai Misi Fiti ia Eli. Ua tatau ona mafaufau i lana toa—ma ia vave.
Sa autilo ifo Eli i lalo i ona seevae, ma le maasiasi. O le mafaufau i se toa e le o se faafitauli moni lea. Ua uma ona ia iloaina lana toa. O Iesu Keriso. Sa Ia faamalolo i e mamai, faatulai e ua maliliu, ma sa Ia totogia le tau mo agasala a tagata uma. O Ia o le toa aupito silisili na soifua ai! Ae sa na o lona fefe tele e ta’u atu.
Sa toe atiati e Eli ona atigilima a o mafaufau i le ta’uina atu i le vasega atoa o Iesu Keriso o lana toa lea. Ae faapefea pe a ata Ierema ia te ia? Ae faapefea pe a femusua’i Sara ma Ame e uiga ia te ia i le malologa?
O le mea moni sa ia iloa o Iesu Keriso o lana toa lea. Ae e le faapea ua tatau ai ona iloa foi e tagata uma.
Sa tu tonu lava Misi Fiti i luma o le kesi a Eli ma ataata. “A o ai lau toa, Eli?”
Sa autilo a’e Eli mai le laina o tamaiti i ona autafa ma agai atu ia Misi Fiti. “Aperaamo Linikone,” sa ia musumusu atu ai.
Sa ataata Misi Fiti. “Lelei!” o lana tala lea a o savali agai atu i le isi tamaitiiti o le laina lea.
Ina ua te’a ese atu, sa solovi ifo i lalo tauau o Eli ua mapu. Faafetai ua uma. O le mea mulimuli o loo ia manaomia, o le iloa lea e tagata uma o le vasega o lana toa o—
“Iesu Keriso,” sa fai mai ai se leo.
Sa puputele mata o Eli a o autilo atu. Lale—i si tulimanu itiiti i le pito o le laina—sa nofo mai ai se tamaitiiti e ve’uve’ua le ulu e paee ma matamuli, ma e nofo lava o ia i tua o le potuaoga i taimi uma. E le iloa foi e Eli lona igoa. Na te le manatuaina se taimi na gagana mai ai o ia i se upu se tasi—vagana ai le taimi lenei.
Sa taufai faliu atu ni nai tamaiti i le tamaitiiti, ae e lei ano o ia i ai. Sa na ona tepa a’e ia Misi Fiti ma toe fai atu. “O la’u toa o Iesu Keriso.”
Sa ata fiafia Misi Fiti ma faaauau atu i le vailaina. Ae sa tilotilo atu Eli i le tamaitiiti ma le ofotele. Sa fefe o ia e ta’u atu i tagata uma lana toa, ae e lei fefe lea tamaitiiti. E lei alu lava foi i lana lotu! A sa ia iloaina le taua tele o le tu atu o se faataitaiga ia Iesu Keriso, e oo lava i taimi faigata.
Sa ataata atu Eli i le tamaitiiti. O le a le toe fefe o ia e ta’u atu lana toa. O lea ua toalua nei i la’ua.