Ua Tatau ona Tatou O Nei i le Malumalu!
Mary Holmes Ewen, Kalefonia, ISA
Ata na tusia e Bradley H. Clark
I se tasi Aso Sa i le taeao, sa faasilasila mai ai i le uarota se uso faatoa papatiso. O lona igoa o Lydia. Sa vave ona avatu o matou loto ia te ia.
E matua atu Lydia ma tauaso ona o le tele o tausaga sa tauivi ai ma le ma’i suka. Sa vave ona ia masani i tagata o le uarota e ala i o latou leo ma a latou la’a. Na te ta’u maia o matou igoa ma faatalofa mai, ma sa matou le taliaina faapea e tauaso.
Ina ua mavae le tausaga sa faatalitali ai, sa feiloai Lydia ma le epikopo ma le peresitene o le siteki mo lana pepa faataga o le malumalu. I le Aualofa i se tasi Aso Sa, sa ia tosoina atu ai au i ona tafatafa ma fai mai, “Na fai mai le peresitene o le siteki ua tatau ona ou alu i le malumalu i se taimi vave e mafai ai. E mafai ona e aveina a’u?”
O le vaiaso muamua o Tesema—o taimi pisi mo i matou uma. Sa ou taumafai e fai ia ’alofaga masani, “E le mafai ona tatou faatali seia aulia Ianuari?”
“E leai, ua tatau ona tatou o nei!”
E i ai se vaega o tamaitai o le uarota e o i le malumalu i masina uma, o lea sa ou talosagaina ai i latou e malaga faatasi ma Lydia. Sa matuai pisi foi i latou. Peitai, sa toe fai mai Lydia a o maligi ona loimata, na fai atu le peresitene o le siteki ia te ia e alu i se taimi vave e mafai ai.
O lea na matou malilie uma ai e faia le malaga e 150-maila (241 km) i le vaiaso e sosoo ai i le malaga, sa faatumulia le taavale i talatalanoaga ma faauooga a ni tamaitai se toavalu. Sa matuai fiafia Lydia i lona aafiaga i le malumalu ma le faamanuiaga o le mauaina o ona faaeega paia.
O le vaiaso muamua o Ianuari, sa matua tuga le tulaga na i ai Lydia, ma sa taofia o ia i le falemai mo se vaavaaiga o faalavelave faafuasei. O le vaiaso na sosoo ai, na maliu ai o ia. Ae na malaga Lydia ma faamanuiaga e faavavau na ia mauaina i le malumalu i ni nai vaiaso na muamua.
Mulimuli ane, sa ou faamatalaina le tala i le peresitene o le siteki e uiga i le matou malaga, ma sa ou ta’u atu ia te ia lo’u fiafia tele i lona mauaina o le uunaiga e ta’u atu ia Lydia ua tatau ona alu loa lava i le malumalu.
“E le o le uiga moni o la’u tala ia alu nei loa lava,” o lana tali lea. “Ou te fai lava i tagata e faatoa umia pepa faataga ia vave ona o i le malumalu. O le Agaga na talanoa ia Lydia, ae le o a’u!”
Ua aoaoina i tatou uma e Lydia ina ia faalogo i le Agaga ma galue ai loa lava. Ou te faafetai mo lana faamanatu ina ia faalogo i le leo filemu, itiiti.