Savali a le Au Peresitene Sili
Ua Valaau Mai Peresitene Monson mo le Lototele
Saunia e Peresitene Thomas S. Monson
Ata na tusia e iStock/Thinkstock
Sa mataituina e Peresitene Thomas S. Monson e toetoe lava o loo faaauau pea ona valaau mai ia faia lea filifiliga ma lea filifiliga.
Ina ia faia o filifiliga poto, na ia fautua mai ai, e manaomia lo tatou lototetele—“le lototele e fai atu ai e leai, le lototele e fai atu ai ioe. Faaiuga e fuafua ai le taunuuga.”1
I le saunoaga lea, ua faamanatu mai ai e Peresitene Monson i le Au Paia o Aso e Gata Ai, e manaomia lo latou lototetele e tutu atu ai mo le upumoni ma le amiotonu, e puipui mea ua latou talitonu i ai, ma faafetaia’ia se lalolagi ua teena mea taua ma mataupu faavae o le faavavau.
“O le valaau mo le lototele e oo mai pea lava pea ia i tatou taitoatasi,” na ia saunoa ai. “Na moni lava lenei mea, ma o le a tumau pea lona moni.”2
O Le Lototele e Aumaia ai le Faamaoniga a le Atua
“O le a tatou fetaiai uma ma le fefe, lagonaina o le tauemuina, ma taia foi i e faasagatau mai. E tatau ia i tatou—ia i tatou uma—ona tatou maua le lototele e faafetaiaia ai manatu lautele, le lototele e tu atu ai mo mataupu faavae. O le lototele, ae le o le palaai, e aumai ai le fiafia i le faamaoniga a le Atua. E avea le lototele ma se amio mama e ola ma faatosina pe a manatu i ai ua le na o se naunautaiga e oti ma le mamalu ae o se naunautaiga foi ia ola mama. A o tatou agai pea i luma, ma tatou taumafai e ola e pei ona tatau ai, o le a mautinoa lava tatou te mauaina le fesoasoani mai le Alii ma mafai ona maua ai le mafanafana i Ana afioga.”3
Tatalia ma le Lototele
“O le a le uiga o le tumau? Ou te fiafia lava i le faauigaga lea: ia tatalia ma le lototele. Atonu e tatau ai le lototele mo oe e te talitonu ai; o le a i ai taimi e tatau ai pe a e usitai. E mautinoa lava e manaomia pe a e tumau seia oo i lena aso o le a e tuua ai le olaga nei.4
Ia I Ai le Lototele e Tu Atu ai mo le Upumoni
“[Ia} e maua le lototele e tu mausali ai mo le upumoni ma le amiotonu. Ona o tulaga ua aga i ai malo i nei onapo ua see ese ai mai tulaga faatauaina ma mataupu faavae ua tuuina mai e le Alii ia i tatou, o le a mautinoa lava le valaauina o i tatou e puipui mea ua tatou talitonu i ai. Vagana ua maua’a lau molimau, o le a faigata ia te oe ona e tatalia le taufaifai a i latou o loo luitauina lou faatuatua. A maua’a, o le a tosina e lau molimau i le talalelei, le Faaola, ma lo tatou Tama Faalelagi mea uma e te faia i lou olaga atoa.”5
Tatou te Manaomia le Lototele Faaleagaga ma le Mama
“O feau o loo aumaia i televise, o atatifaga, ma isi ala o faasalalauga [i onaponei] e tele lava ina tetee sa’o lava i mea tatou te mananao ia tatou fanau e talia ma opomau i ai. O lo tatou tiute e le gata ina aoaoina i latou ina ia malamalama lelei i le agaga ma aoaoga faavae, ae ia fesoasoani foi ia i latou e aloese mai ai, tusa lava po o a malosiaga mai fafo latou te fetaiai. O le a manaomia ai le tele o taimi ma taumafaiga i la tatou vaega—ma ina ia mafai ona fesoasoani i isi, e manaomia e i tatou lava le lototele faaleagaga ma le mama e tatalia ai mea leaga tatou te vaai i ai i soo se itu.”6
Ina Tatou Lototetele Ia
“A o tatou ola ai mai lea aso i lea aso, e toetoe lava a muai iloaina o le a luitauina lo tatou faatuatua. Atonu o nisi taimi tatou te iloa ai le siosiomia o i tatou lava e isi ae o loo tutu pea o ni vaega toalaiti pe oo foi lava i le tutu na o i tatou e tusa ma mea ua taliaina ma mea e le taliaina. …
… “Tau ina ia tatou lototetele pea ma saunia e tutu mo mea ua tatou talitonu i ai, ma afai e tatau ona tatou tutu na o i tatou i le faagasologa, tau ina ia tatou faia ma le lototele, ua faamalosia e lo tatou iloa, e moni lava e le o tuua na o i tatou pe a tatou tutu faatasi ma lo tatou Tama o i le Lagi.”7