Sa Musumusu Mai le Agaga ia te Au

Ata

drawing of boys running

Ata na tusia e Bradley H. Clark

“E, sole! Foi mai!” sa valaau mai ai se leo faanatinati.

Sa ou faliu ma iloa atu ai ni tamaiti se toalua pe lima ma le fitu tausaga le matutua i se pakaga o taavale o se faleoloa, ma loimata o tafe ifo i o la’ua alafau. Sa foliga popole le faatauoloa a o ia tauvalaau atu ia i la’ua.

A o ou faliu atu i la’u taavale, sa musumusu mai le Agaga, “E mafai ona e fesoasoani i i.” Sa lemu le musumusu ae e matua manino lava ma sa lei pine ae ou tamoe atu i le pakaga i tamaiti.

Sa ou maua atu le alii matua o tu i autafa o se veni lanuenaena. Sa ou faalatalata atu ma tootuli ifo i ona autafa.

“Talofa. O lou igoa o Christina. O a mai oe?”

Ina ua ou fai atu na upu, na tagi atili ai o ia ma ufiufi ona mata i ona lima. Na oo mai le faatauoloa ma le isi tamaitiiti.

“Ou te manatu e na o le faa-Falani la te iloa,” o le tala lea a le faatauoloa. “Na matou mauaina o taufetuli i le faleoloa, ua se.”

Sa ou toe faailoa atu a’u i tamaiti i le faa-Falani. O le faa-Falani o la’u gagana lea, ae ua leva ona ou le toe tautala ai talu ona ave a’u e se aiga e faa-Palagi a o ou laitiiti. O le mea masani lava, e le lelei la’u faa-Falani. Ae ui o lea, o le taimi lena sa mafai lava ona manino la’u tautala. Sa manino upu i lo’u mafaufau ma lo’u leo a o ou faamafanafanaina tamaiti.

A o masusu, sa faamatala faatopetope mai e le alii matua sa le mafai e i la’ua ma lona uso ona maua o la matua i totonu o le faleoloa ma o lea sa taufetuli ai i fafo e sue ai. A o ou faalogologo, sa amata ona vavala mai ia te au le maofa ona e le gata ina sa ou talanoa atu i ai i le faa-Falani ae sa ou malamalama lelei foi ma faamafanafanaina ni tamaiti fefefe se toalua.

“Ua la leiloa o la matua ma o lea sa mananao ai e faatalitali mo i la’ua i le latou taavale,” sa ou faamatala atu ai i le faatauoloa. Sa ta’u mai e le alii laitiiti ia igoa o o la matua, lea na ou tuuina i le faatauoloa ina ia mafai ai ona ia faasalalauina i la latou masini tauvalaau. I ni nai minute mulimuli ane, sa vaaia e le tamaitiiti lona tama o sau i fafo o le faleoloa ma sa ia tamoe e faafetaiai.

A o ou mulimuli atu i le tamaitiiti i lona tama, sa ou iloaina ua ou le mafai e oo lava i se faatofa i le faa-Falani Sa le manuia a’u taumafaiga e toe fai atu se isi tala i tamaiti e malamalama ai, ma ua leai lava se isi mea ua na o ni nai upu itiiti. Sa iu ina ou toe nanu, ma fai atu i le tamaitiiti, “Tofa. Manaia ua ta feiloai.”

Ina ua ou tuua ia tamaiti i o la matua, sa tumu lo’u loto i le faafetai. Sa galue le Tama Faalelagi e ala mai ia te au, e faamafanafana Ana fanau iti e toalua. Sa ou maua le lotomaualalo ona sa mafai e le Alii ona faalautele o’u tomai faatauvaa e faataunuu ai Ona faamoemoega. Sa ou faafetai i le molimauina o mea e mafai ona tutupu pe a tatou ofoina atu i tatou lava ia te Ia pe a valaau i ai, e oo lava i le lotolotoi o tulaga e ono le oo i ai.