Ata

illustration of firefighters

Ata na tusia e Julia Yellow

O se aso toafilemu i la’u galuega o se tineimu galuefua, o lea sa tonu ai ia te au e faitau le Tusi a Mamona. Ina ua vaai mai se tasi ma te faigaluega o o’u faitau, sa fesili mai o ia pe ou te iloa pe faapefea ona faamaulu le ofutau a le Atua i aso nei. A o ma talanoa, sa ee mai le sailini. Sa sasao se afi i se faleoloa lata ane.

Sa vave ona faamaulu o ma ofu tineimu ma o sa’o loa i ai. Sa sasao tele le mumu, ma ina ua matou latalata atu i le faleoloa, sa i ai se mea na pa i le mea na ma i ai. Sa lilofia i matou i le sasao o le afi. Na ma fememea’i ma la’u soa faigaluega mo ni nai sekone, ona o le mea na pa. Ae faafetai mo masini ma lavalava na puipuia ai i ma’ua, ma sa leai ni o ma manua.

Ina ua ma toe foi i le ofisa ina ua uma ona tape le mu, sa ou fesili i la’u soa faigaluega pe na ia manatua lana fesili e uiga i le ofutau o le Atua. Fai mai i, ma sa ou faamatala atu i ai o le ofutau o le Atua e pei lava o meafaigaluega mo le puipuiga i le tineia o mu. E tatau ona tatou ofuina pea lava ina ia mafai ai ona tatou tatalia osofaiga malolosi a le fili. Afai tatou te tausi poloaiga, o le a faamanuiaina i tatou i le mana puipui o le ofutau a le Atua, ma o le a taialaina i tatou e le Agaga Paia.

1 Samuelu 16:7. “Aua e le vaai Ieova pei o le vaai o tagata; aua e vaai tagata i le tino, a e vaai Ieova i le loto.”

Ae ou te lei auai i le Ekalesia, sa ou vaai ia te au lava ia o se tagata faatauvaa e i ai foi ni tomai faatauvaa. Sa ou manatu e leai se mea taua o ia te au e ofoina atu. Sa ou fefe e faailoa atu i tagata lo’u tagata ona o lo’u fefe i teena ma ou tiga ai. Sa ou mafaufau faapea e malolosi uma lava tagata o siomia ai au, e popoto atu ma e sili atu i lo au.

Ae na suia nei manatu uma ina ua avea au o se tasi o Le Ekalesia a Iesu Keriso o le Au Paia o Aso e Gata Ai. Sa ou aoaoina faapea o i tatou uma lava o ni fanau a le Atua ma ua ia i tatou uiga auaumama paia. Ua ou malamalama nei e leai se tauvaga pe o ai e poto, mauoa, pe aulelei foi. I le silafaga a le Alii, e tutusa uma lava i tatou, ma o Ia o le e faamasinoina—e le faalagolago i o tatou uiga faaletino ae o lo tatou usiusitai ma le naunau e mulimuli i le ala na Ia faatuina.

Ata

illustration of men loading a truck

Ata na tusia e Julia Yellow

Ina ua 15 o’u tausaga, sa ou maua se molimau malosi i le talalelei a Iesu Keriso ma sa ou matua fiafia e auai i le Ekalesia. O le taimi lea, sa ou faigaluega ai e tausi lo’u aiga. Peitai, e lei leva talu ona ou papatiso, ae ou le toe faigaluega.

Sa tatau ona sue sa’u galuega fou aua sa faalagolago lo’u aiga ia te au, ae o galuega uma lava sa ou talosagaina, e manaomia ai lo’u faigaluega i Aso Sa. E tele galuega sa ou le taliaina ona sa ou iloa e manaomia lo’u alu i le lotu i Aso Sa (tagai MF&F 59:9–10).

Ina ua maea masina e lua o la’u sailiga, e lei maua lava se galuega. O lo’u tina e le o se tagata o le Ekalesia, ma e ui sa talitonu o ia i le Atua, ae sa matua ita lava i lo’u le taliaina o le mau galuega.

I se tasi po sa ia tilotilo mai ai ia te au a o maligi ona loimata ma fesili mai, “Aisea ua tuu ai e le Atua ia tupu lenei mea ia i tatou ae o loo e matuai faamaoni e faia le mea sa’o?”

Sa ou tali atu, “Tina ou te le iloa pe aisea ua tupu ai lenei mea ia i tatou, ae ou te iloa o loo ou faia le mea sa’o, ma ou te iloa foi o le a faamanuiaina i tatou e le Atua ona o lena mea.”

I le taeao na sosoo ai, sa ofoina mai ai e se tagata ia te au se tupe tele e la’u ai se uta o mea mamafa mai se tasi fale i le isi mo aso e lua. Sa mamafa le galuega, ae ina ua ou mauaina le tupe, sa ou alu sa’o loa i le fale ma ofoina atu se tatalo o le lotofaafetai. E lei pine ae maua la’u galuega lea sa mafai ona ou malolo i Aso Sa, ma talu mai lena taimi e lei toe misi ona ou faigaluega.

Ua ou fiafia ona sa ou filifili e tausi ia paia le aso Sapati. E tele luitau o le olaga, ae ou te iloa afai tatou te taumafai ia malolosi tusa lava po o a na luitau, o le a faamanuiaina i tatou e le Alii.