O Le Faatosinaga Faaleagaga a Tamaitai
E alaala le tusitala i Iuta, ISA.
Pe o tatou iloaina le mamana o o tatou malosi faaleagaga?
O Afafine o le Atua, saunia e Kathleen Peterson, E LE MAFAI ONA KOPIINA
E toatele tamaitai lelei, lotomaualalo i le Ekalesia ua tuuina atu se auaunaga tuuto e aunoa ma le iloaina le aafiaga o’oo’o o o latou olaga—o ni faataitaiga o le auaunaga i la le tino, ae faapena foi ona avea o ni measina o le malosi faaleagaga. O se tasi o tamaitai faapena o lo’u tinamatua o Cherie Petersen. Sa tautua faamaoni o ia i valaauga le leoa i lona olaga atoa. A e fesili atu ia te ia, o lana lava tali e le ni ana taleni e ofo atu i le lalolagi. Peitai, ina ua amata ona ou aoao e uiga i lona soifua, sa ou iloa ai le tele o lona malosi faaleagaga na aafia ai lo’u olaga.
Na le toe o matua o Cherie i le lotu ma sa tete’a i la’ua a o itiiti lava o ia, o lea na ola a’e ai o ia i se tina, o Felolina, o le sa faigaluega i taimi uma. O Felolina foi ia sa sili atu ona tuulafoaiina a o teineitiiti, a o ola a’e i se aoga nofotumau, i le taimi lea sa ola ai lona tina, o Siota i se olaga faasalemausau. Ae ui i luitau i lona tuputupu ae, sa tumau pea ona toaga Cherie i le talalelei, ma auai atu i le lotu ma le aiga o le tina o lona tinamatua, po o ni uo. Sa ia vaaia i o latou aiga le mea sa ia manao ai mo sona lava aiga. Na te lei iloaina pe o le a le mea e tatau ona i ai se aiga, ae sa ia iloaina le mea e le tatau ona i ai, ma sa naunau o ia ina ia ese lona aiga i le lumanai.
Na ta’u mai i se taimi ia te au e le toalua o Cherie—lo’u tamamatua o Dell—“Ina ia i ai se molimau, e tatau lava ona e manao i ai. Sa manao lava Cherie i taimi uma i se molimau.” E ui ina sa faatumulia uluai tausaga o la la’ua faaipoipoga i tauiviga, ae sa la naunau lava ina ia tumau malolosi o se aiga. Sa lei malolosi i laua i le tausaga muamua o la la’ua faaipoipoga ona o le galuega a Dell, peitai o se valaauga e galue i le Peraimeri na uunaia ai Cherie e amata ona alu, ma e lei pine ae la o faatasi ma Dell i le lotu, o se faufautua o le korama a tiakono. Na amata mai lena taimi ona la toaaga ma malolosi i le Ekalesia. O le naunautaiga o Cherie e auauna atu ma le pulunaunau e atiae se aiga malosi, na fesoasoani lea i lo’u tina ia avea ma se tamaitai malosi ua i ai nei, ma ua fesoasoani le faataitaiga a lo’u tina e faamatala ai lo’u olaga aemaise ai o lea ua amata nei lo’u lava aiga.
O le avea ai ma tamaitai, e mafai ona i ai la tatou faatosinaga maoae faaleagaga i olaga o i latou o loo siomia ai i tatou. Ioe, sa aoao mai Iosefa Samita e faapea o la tatou matafaioi e “le gata ina laveaiina e matitiva, ae faaolaina foi o latou agaga.”1 Ua valaauina e Iesu Keriso ia tamaitai o Lana Ekalesia ia avea ma Ona soo ma ia malolosi faaleagaga. E taua tele lo tatou malosi ma faatosinaga faaleagaga i le alualu i luma o le galuega o le faaolataga, ma e tatau ona tatou sailia avanoa e faamalolosia ai faaleagaga i latou o loo siomia ai i tatou. A tatou faia lena mea, o le a tumau le faatosinaga o lo tatou faatuatua ma le amiotonu i luga atu o mea e mafai ona tatou vaaia.
Valaauina e Avea ma Soo
Na tusia e Elder James E. Talmage (1862–1933) o le Korama a Aposetolo e Toasefululua, “O le lagolago silisili i le lalolagi o tamaitai ma le tulaga faatamaitai o Iesu le Keriso.”2 Mafaufau, mo se faataitaiga i le mea sa Ia aoao mai e uiga i soo tamaitai e toalua i le Feagaiga Fou, le auuso o Maria ma Mareta. I le tusi O Afafine i Lo’u Malo o loo faamatala mai ai: “Luka 10 o loo i ai se tala ia Mareta na tatalaina atu lona fale ia Iesu. Sa ia tautuaina le Alii e ala i le saunia o mea sa manaomia i la le tino, ae sa nofo ifo Maria i aao o le Matai ma gauai atu ma le toto’a i Ana aoaoga.
“I se vaitau sa masani lava o fafine e na o le tautua faaletino latou te tuuina atu, na aoao ai e le Faaola ia Mareta ma Maria e mafai foi e fafine ona auai faaleagaga i Lana galuega. Sa Ia valaaulia i laua e avea ma Ona soo ma taumamafa ai i le faaolataga, ‘lea mea lelei’ [Luka 10:42] e le aveeseina mai ia te i laua.”3
E faapei foi o Mareta, o nisi taimi tatou te faia ai le mea sese o le mafaufau faapea o le uluai matafaioi lava a tamaitai o le tautua faaletino, e pei o le saunia o meaai, suisui, ma faamama mo isi. O lea tautua o se osigataulaga e pele ma taua; peitai, e sili atu nai Lona manaomia o tuafafine e mafai ona suisui ma kuka, e manaomia foi e le Alii ia tamaitai o i ai le mana faaleagaga, o e susulu atu i o latou olaga le faatuatua, amiotonu, ma le alofa mama. Ua Ia silafia e tofu i tatou ma le mau mea e ofoina atu. Ua valaauina e Iesu Keriso i tatou uma e atinaae lo tatou malosi faaleagaga ma tomai e talia ai ma faatino ia faaaliga e fesoasoani ai e tulei i luma Lana galuega. Na saunoa Linda K. Burton, le peresitene aoao o le Aualofa i tamaitai, “Ua auina mai outou i le lalolagi i lenei tisipenisione o taimi ona o tagata ua avea ai outou ma mea ua e saunia e fai! E tusa lava po o a mea o le a taumafai Satani e faatauanau ai i tatou e mafaufau i ai po o ai i tatou, o lo tatou faasinomaga moni lava o i tatou o soo o Iesu Keriso!”4
Ua silafia e le Alii i tatou ma o tatou tulaga, ma e i ai Sana galuega mo i tatou taitoatasi e faia i lenei lalolagi. E leai se uso e papa’u sona iloa pe itiiti foi ni taleni e avea ai o se malosiaga faaleagaga mo le lelei ma aumaia ai isi ia Keriso. O le i ai o lea gafatia paia, ua i ai ia i tatou le tiutetauave e avea ai ma taitai faaleagaga i o tatou aiga ma nuu. Na fofogaina mai e Elder M. Russell Ballard o le Korama a Aposetolo e Toasefululua, “o tuafafine uma i lenei Ekalesia, o e ua osi feagaiga ma le Alii, ua ia te i latou se faatagaga paia e fesoasoani ai i le laveaiina o agaga, e taitai tamaitai o le lalolagi, e faamalolosia aiga o Siona, ma fausia le malo o le Atua.”5
Tatou te le tau i ai i ni tofiga maualuluga pe faia foi ni mea uiga ese e fesoasoani ai ia i latou o siomia ai i tatou ia faia filifiliga e faalatalata atu ai i latou ia Iesu Keriso—o lo tatou tiute aupito sili ona taua. O mea aupito tetele ma aupito itiiti tatou te faia i olaga o le tagata e toatasi pe toalua foi, e tusa lava foi pe o totonu lava o o tatou aiga, e mafai ona i ai se aafiaga maoae.
O Tamaitai i le Galuega o le Faaolataga
O loo ta’ua i se viiga lauiloa, “O le galuega a agelu lava; Ua tuuina mai ia i tatou nei.”6 E tele naua mea e mafai ona tatou ofo atu i olaga o i latou tatou te alolofa i ai. Na faamatala mai e Elder Richard G. Scott o le Korama a Aposetolo e Toasefululua ni tala i ni tamaitai se toalua na aafia ai lona olaga ona o lo la’ua malosi faaleagaga:
“A o o’u laitiiti, sa le i avea lou tama ma se tagata o le Ekalesia ma sa oo ai ina le toaga lo’u tina. … I nai masina ina ua mavae le atoaga o lou valu tausaga, sa sau ai Tinamatua Whittle mai le isi itu o le atunuu e asi i matou. Sa popole Tinamatua i le le papatisoina o au faapea foi ma lou uso matua. Ou te le iloa le mea na ia tau atu i ou matua e uiga i lenei mea, ae ou te iloa i se tasi taeao sa ia ave ai i ma’ua ma lo’u uso i le paka ma faasoa mai ai ona lagona e uiga i le taua o le papatisoina ma le auai soo i sauniga a le Ekalesia. Ou te lē manatua auiliiliga o mea sa ia tau mai, ae o ana upu sa gaepuina ai se mea i lou loto, ma e le i umi ae papatisoina i ma’ua ma lo’u uso. …
“Sa faaaoga e Tinamatua le aofaiga talafeagai o le lototele ma le faaaloalo e fesoasoani ai i lo ma tama ina ia iloa le taua o lona aveina o i maua i le lotu mo a ma sauniga. I soo se auala talafeagai, sa ia fesoasoani ai ia i maua ia lagona se manaomia mo le talalelei i o maua olaga.”7
O se punavai lona lua o le malosi faaleagaga o le faletua lea o Elder Scott, o Jeanene. I le taimi a o tafafao faamasani i laua, sa amata ona la talatalanoa e uiga i le lumanai. Sa folasia e Jeanene, o le sa ola ae i se aiga faafaifeautalai malosi, lona manao e faaipoipo i se faifeautalai ua maea le misiona, i le malumalu. Sa malosi le aafiaga o Elder Scott, o le sa lei mafaufau tele muamua e alu e faamisiona. “Sa ou alu i le fale, ma sa le mafai ona ou mafaufau i se isi mea. Sa ou ala i le po atoa. … Ina ua mavae le tele o tatalo, sa ou faia le faaiuga e vaai lo’u epikopo ma amata la’u talosaga e avea ma faifeautalai.”8 E ui lava ina sa tuuina atu ia te ia e Jeanene le taiala ma le uunaiga sa ia manaomia, ae fai mai Elder Scott, “E lei fesili mai lava Jeanene ia te au e fai se misiona ona o ia. Sa lava lona alofa ia te au e faasoa mai ai lona talitonuga maumaututu ma tuuina mai ia te au le avanoa e filifili ai le itu e agai ai lo’u lava olaga. Sa ma tau fai auauna atu uma i ni misiona ma mulimuli ane ai faamauina i le malumalu. O le lototele o Jeanene ma le tuuto i lona faatuatua na faia uma ai se eseesega i o maua olaga faatasi. Ou te mautinoa semanu ma te lē maua lava le fiafia lea ua ma olioli ai nei pe ana le seanoa ma lona faatuatua malosi i le mataupu faavae o le auauna atu muamua i le Alii. O ia o se faataitaiga matagofie, ma le amiotonu!”9
O le faatosinaga faaleagaga a nei tamaitai agelu i lona olaga sa fesoasoani ai i se alii talavou e toatasi—Elder Scott—e faia nisi o faaiuga aupito taua i lona soifua: ia papatiso, ia faamisiona, ma ia faaipoipo i le malumalu.
E mafai ona tatou fesoasoani i isi ia mananao e faia ni filifiliga lelei e ala i a tatou faataitaiga, taga e fai, upu, ma le amiotonu faaletagata lava ia. Na saunoa Sister Carole M. Stephens, fesoasoani muamua i le au peresitene aoao o le Aualofa, “O i tatou o ni afafine o le feagaiga i le malo o le Alii, ma ua tatou maua le avanoa e avea ai ma ni meafaigaluega i Ona aao. … Tatou auai i le galuega o le faaolataga i aso taitasi i auala itiiti ma faigofie—fetausiai, faamalolosia, ma aoao e le tasi le isi.”10 A tatou faalagolago i le Agaga ma fetuleni atu i luma ma taumafaiga faamaoni mai le loto ma le agamaualalo e fesoasoani ai ia i latou o loo siomia i tatou, ina ia latalata atili ia Keriso, o le a taialaina i tatou i mea e mafai ona tatou faia ma tuuina mai le malosi e faia ai, ma o le a tatou lagonaina le olioli i le aumaia o fanau a le Alii ia te Ia.
Avea ai ma se Faatosinaga Faaleagaga
O le iloa ai o lo tatou tiutetauave, tatou te ono fesili ai e faapei o soo anamua, “O le a se mea tatou te fai” (Galuega 2:37) ia avea ai o se faatosinaga faaleagaga? I se konafesi aoao talu ai nei, sa valaaulia ai e Sister Burton ia tamaitai e mafaufau “i nisi o faailoga faigofie faaleagaga o le ’manaomia le fesoasoani’ e faatatau i le galuega o le faaolataga:
-
Manaomia le fesoasoani: mo matua ia tausia ae a latou fanau i le malamalama ma le upumoni
-
Manaomia le fesoasoani: mo afafine … , tamaitai … uso o tina, tuafafine o tama … , tausoga, tina ma tama matutua, ma uo moni e galulue o ni faufautua ma ofo atu lima fesoasoani i luga o le ala o feagaiga
-
Manaomia le fesoasoani: mo i latou o e faalogo i musumusuga a le Agaga Paia ma faatinoina uunaiga e maua
-
Manaomia le fesoasoani: o i latou o e ola i le talalelei i aso taitasi i nai ala iti ma le faigofie
-
Manaomia le fesoasoani: le au galulue i talafaasolopito o aiga ma le malumalu ina ia soofaatasi ai aiga e faavavau
-
Manaomia le fesoasoani: mo faifeautalai ma tagata o le au paia e faasalalau atu le ’tala fiafia’—o le talalelei a Iesu Keriso
-
Manaomia le fesoasoani: au laveai e sailia i latou ua leiloa lo latou ala
-
Manaomia le fesoasoani: mo e tausi feagaiga ia tutu mausali mo le upumoni ma le mea sa’o
-
Manaomia le fesoasoani: mo soo moni o le Alii o Iesu Keriso.”11
E le o ni mea fou nei mea, ae a tatou sailia avanoa e auai ai i le faatinoga o le galuega o le faaolataga, o le a faaleleia o tatou tomai e fesoasoani ai ia i latou o siomiaina i tatou. Na saunoa Elder Ballard, “E leai se isi lava mea i le lalolagi e sili ona patino, sili ona faamalosiauina, pe sili ona suia ai olaga e pei o faatosinaga a se tamaitai amiotonu.”12 A tatou atinaeina lo tatou mana faaleagaga e ala i le tatalo a le tagata lava ia ma le suesue i tusitusiga paia, usitai ma le maua’i, ma tausia ma le faamaoni a tatou feagaiga, o le a avea i tatou ma lena faatosinaga.
I Talaatu o Mea e Mafai ona Tatou Vaaia
Na saunoa Peresitene Polika Iaga (1801–1877), “Mata e mafai ona e iloa le aofai o mea lelei e gafataulimaina e tina ma afafine o Isaraelu ona fai? Leai, e le mafai. Ma o mea lelei o le a latou faia o le a mulimuli atu ia i latou i le faavavau atoa.”13
O faaiuga amiotonu a lo’u tinamatua ua aafia ai augatupulaga o ona aiga, ua silia ma le mea na mafai ona ia vaai i ai ao tamaitai talavou. Peitai, o le faatosinaga faaleagaga a tamaitai i lo’u aiga ua sili mamao atu i tua le mea ua oo i ai. Na maua e Cherie lona lava malosi faaleagaga mai le mataituina o le tina o le tinamatua o lona tina (o lo’u tinamatua lona tolu) o Elisapeta. O le faataitaiga a Elisapeta o le faatuatua ma le molimau na pasia augatupulaga e lua o le le toe toaaga mai, e fesoasoani ai i le tamateine a le tama a lana tama, o Cherie e suia se aga o aiga malepelepe ae toe foi mai i le Ekalesia.
A oo ina avea i tatou o se malosi faaleagaga ia i latou o loo siomia ai i tatou, o le a oo atu la tatou faatosinaga i talaatu o mea e mafai ona tatou vaaia. Na saunoa Peresitene Gordon B. Hinckley (1910–2008), “Matou te valaau atu i tamaitai o le Ekalesia ina ia tutu faatasi mo le amiotonu. E tatau ona latou amata i totonu o o latou lava aiga. E mafai ona latou aoaoina atu i totonu o a latou vasega. E mafai ona latou faaleoina atu i totonu o o latou nuu. …
“Ua ou vaaia lenei mea o se tasi o faamoemoe susulu i se lalolagi ua savavali atu i lona faafanoga.”14
A tatou faataunuuina lenei poloaiga, o le a tele’a’i i luma le galuega a le Alii e le gata i le lalolagi o loo siomia ai i tatou, ae aupito sili ona taua, i o tatou aiga ma olaga o i latou tatou te alolofa i ai.