Tasi le Lafu ma le Leoleo Mamoe e Toatasi

O se faaopoopoga mo se lafu o mamoe ua aoao ai i tatou e uiga i le tausiga a le Faaola i Lona nuu.

Pamamoe Anamua

Uamea

Leoleo Mamoe

Pa maa

Faitotoa

Mamoe

Maata

Tootoo

O le a: O se vaega itiiti, o se puipuiga faaopoopo.

Faamoemoega: Ia puipui ai se lafu o mamoe mai tulimanu ma faomea, aemaise i le po.

Mea fau pa ma le fausaga: O maa, e masani ai, ma laau talatala e masani ona tuu i le pito i luga o puipui. O pupuvao talatala sa masani ona faaaoga e fai ai se papuipui mo le pamamoe mo se taimi le tumau e fesuiai ai. O nisi taimi sa faaaoga ai ana e fai ma pamamoe, ma sina papamaa laitiiti pe tuu ai foi ni pupuni vaotalatala i luma.

Mea Moni mai le Tusi Paia

Sa taua tele le aano o le mamoe, o le suasusu, ga’o, fulufulu, pa’u, ma seu ma sa avea ma uluai manu e osi ai taulaga.
I Isaraelu, o luko, haiena, nameri, ma maile aivao o nisi ia o le au faataumaoi e tulimataia mamoe. I aso anamua, sa maua liona, ma urosa i lea itu (tagai 1 Samuelu 17:33–37).
Sa faaaoga e leoleo mamoe se tootoo e taitai ai mamoe ma se uamea ma se maata e puipuia ai.
E taitai e se leoleo mamoe ana mamoe i le mea e aai ai ma le vai i le ao (tagai Salamo 23:1–2) ma toe faafoi i le lafu i le po. E faitau e le leoleo mamoe ia mamoe pe a toe foi, ma saili i mamoe pe afai e misi. Ona taoto ai lea o ia i le faitotoa o le lafu e puipui i latou.
Na ta’ua e Iesu Keriso Ia lava o le Leoleo Mamoe Lelei (tagai Ioane 10:11–15) aua na Ia tuuina mai Lona soifua mo i tatou. Na Ia faatusa Ia lava i le faitotoa o le pamamoe (tagai Ioane 10:1–9) aua o Ia ua tatou maua ai le faafailelega faaleagaga, malologa, filemu, ma le faaeaga.
Na faatusa e le Aposetolo o Paulo le Ekalesia i se lafu o mamoe (tagai Galuega 20:28).

O Le Mea e Mafai ona Tatou Aoaoina

O pamamoe o:

O le mea e faapotopoto i ai le lafu. O le avea ai ma tagata o le Ekalesia, tatou te taufai faasoa i se sootaga o le lotogatasi e ala i lo tatou faatuatua ma a tatou feagaiga, faapea foi i le faapotopoto faatasi. Na aoao mai Peresitene Henry B. Eyring, Fesoasoani Muamua i le Au Peresitene: “O le olioli o le lotogatasi ua matuai finagalo [le Tama Faalelagi] e tuuina mai ia i tatou, e le ’au toatasi. E ao ina tatou sailia ma agavaa i ai faatasi ma isi. E le o se tulaga la e faateia ai, le uunaia o i tatou e le Atua e faapotopoto ina ia Ona faamanuiaina i tatou. Ua Ia finagalo ia tatou faapotopoto i aiga. Ua Ia faatuina vasega, uarota, ma paranesi ma poloaiina i tatou ia faapotopoto faatasi e le aunoa. O na potopotoga, … e mafai ona tatou tatalo ma galulue mo le lotogatasi o le a faapea ona aumaia ia i tatou le olioili ma faateleina ai lo tatou mana e auauna atu” (“E Fusia o Tatou Loto ia Tasi,” Liahona, Nov. 2008, 68, 69).

O se nofoaga o le saogalemu ma le mapusaga. Ia Iesu Keriso tatou te “maua [ai]… le malologa mo [o tatou] agaga” (Mataio 11:29). O Lana Ekalesia o “se puipuiga, ma … se sulufaiga” (MF&F 115:6). Ma pei ona aoao mai Peresitene Boyd K. Packer, o le Korama a Aposetolo e Toasefululua, “Tatou te maua le saogalemu ma le puipuiga mo i tatou lava… i le faamamaluina o feagaiga ua uma ona tatou faia ma ola e tusa ai ma faatinoga masani o le usiusitai lea e manaomia mai i soo o Keriso” (“O Nei Mea Ua Ou Iloa,” Liahona, Me 2013, 7).

Puipuia e le leoleo mamoe. O Iesu Keriso o le Leoleo Mamoe Lelei ua faasaoina i tatou. Sa mafatia o Ia ma maliu ina ia mafai ai ona tatou faatoilaloina le agasala ma le oti ma toe foi atu ai i lo tatou Tama Faalelagi. A tatou o mai ia Keriso ma usiusitai i Ana poloaiga, Na te faamanuia, taiala, ma puipuia i tatou taitoatasi ma faapea foi Lona nuu o le feagaiga.