Tatou te Talanoa ia Keriso
O Le Mana o le Faatuatua
E alaala le tusitala i Oregon, ISA.
Afai e faasaoloto i tatou e le Tama Faalelagi mai o tatou luitau ona sa na ona tatou ole atu i ai, o le a Ia le tuu maia ia i tatou aafiaga tonu e tatau ai mo lo tatou faaolataga.
E tasi le tausaga i le kolisi, ae ou sueina se suega ma sa amata ona tiga lo’u ua. E lei alu ese le tiga ina ua mavae le luluti o le suega. Sa ou talanoa i fomai ma taulasea ma taumafai ni togafitiga eseese, ae sa faaauau pea le tiga. I le tausaga na sosoo ai, sa ou taumafai ai pea e tauivi ma lenei tiga, sa ou tauivi foi ina ia faateleina lo’u faatuatua. Sa tele lo’u taimi i le tatalo, sa ou suesue i tusitusiga paia, ma sa ou talosagaina ni faamanuiaga faaleperisitua. Sa ou lagonaina, afai e lava lo’u faatuatua, o le a ou manuia.
Sa faamalolo e Iesu Keriso e mamai, o tauaso, o pipili, ma lepela—“e tusa ai ma lo [latou] faatuatua” (Mataio 9:29). Sa ou iloaina na ia te Ia le mana e faamalolo ai a’u e faapei ona sa Ia faia i le anoanoai o isi i le taimi o Lona soifua i le tino. O lea sa tonu ai ia te au, e na o le itiiti lava o lo’u faatuatua o le a ou le manuia ai, o lea sa ou faaluaina ai a’u taumafaiga. A o faaauau a’u fofo, sa ou tatalo ma anapogi ma suesue ma talitonu. Ae sa faaauau pea o’u tiga.
Ua aoao mai i tatou e tusitusiga paia, a i ai le faatuatua e mafai ona tatou faia vavega (tagai Mataio 17:20), ae o lea lava e le o mafai ona ou mapu mai si nei mafatiaga laitiiti. O fea sa i ai le mana o lo’u faatuatua? Mulimuli ane, sa ou talia filemu lo’u tulaga, ma maua auala e onosaia ai lo’u faaletonu, ma oo ai ina ou malie e faataatia le malamalama atoatoa i le faatuatua ma le faamalologa mo se taimi oi luma.
I ni tausaga mulimuli ane, sa ma savavali ai ma sa’u uo sa tauivi ma le faafaufau na afua ai ona alu soo i le falemai i le taimi o le afuafua o lona maitaga muamua. Sa manao Erina i se isi pepe, ae sa fefe o ia e toe oo i mafatiaga lava nei sa feagai ma ia i lona maitaga muamua. Fai mai o ia, sa anapogi o ia ma tatalo ina ia matuai talitonu o le a le toe aumaia faalua lena mea ia te ia e le Tama Faalelagi.
A o ma talanoa, sa ou manatua le mau, “Ia soia, ma ia outou iloa o a’u lava o le Atua” (Salamo 46:10). Sa ou mafauau i lo’u aafiaga i le aoao ai ina ia filemu i le taimi o mafatiaga ma sa ou uunaia Erina ina ia faaauau ona faatuatua ae aua nei avea lena faatuatua ma mea e faalagolago ai pe faafaufau pe leai i le isi maitaga.
A o faaauau pea ona ou suesue i le mataupu faavae o le faatuatua, sa ou liliu atu i le aoaoga a Alema e uiga i le faatuatua lea o loo ia aoao mai ai e faapea “afai ua ia te outou le faatuatua ua ia te outou faamoemoe mo mea e le vaaia, a e moni” (Alema 32:21).
I le manatunatu loloto ai i lenei mau, sa ou iloa ai o le faatuatua, e le o le mea lea sa ou manatu ai. O le faatuatua, o loo aoao mai e Alema i tatou, o le faamoemoe lea i mataupu faavae moni. O le i ai o le faatuatua e le faapea tatou te talitonu o le a aumai e lo tatou Tama Faalelagi i taimi uma mea tatou te ole atu ai. O le faatuatua o le a faamalolo e Keriso lo’u ua, po o le avatu ia Erina o se maitaga e le faafaufau ai, e le o se faatuatua lea i mataupu faavae moni. Peitai, e mafai ona tatou faatuatua ia Keriso o loo i ai le mana e faamalolo ai, o loo Ia silafia i tatou, o le a Ia faamalolosia i tatou, ma afai tatou te onosaia lelei, e mafai ona tatou agavaa mo le ola e faavavau.
Na folafola mai e le Alii, “Soo se mea e te ole mai ai i le faatuatua, ma talitonu o le a e maua e ala i le suafa o Keriso, o le a e mauaina” (Enosa 1:15). Ou te talitonu i le mana o i ai i lenei folafolaga, o loo i ai lea i le fautuaga ia talitonu “i le suafa o Keriso.” O le faaupuga o i ai i le Lomifefiloi o le Tusi Paia o loo aoao mai ai i tatou: “Tatou tatalo atu i le suafa o Keriso pe afai o o tatou mafaufau o le mafaufau o Keriso, ma o o tatou manaoga o manaoga ia o Keriso,—pe a tumau foi Ana upu ia i tatou (Ioane15:7). Ona tatou ole atu ai lea mo mea ua saʼo ma o le a mafai e le Atua ona tuuina mai. O ni isi tatalo e lē mafai ona maua mai ni tali ona ua le faia i le suafa o Keriso: ua lē tusa ai ma Lona finagalo ae ua faia ia tatalo i le manatu faapito o le tagata.”
A tatou ole atu i se mea ma le faatuatua ma e tusa ai ma le finagalo o le Atua, o le a Ia to mai ia i tatou e tusa ai ma o tatou manao. E silafia i tatou e le Tama Faalelagi, e alofa ia i tatou, ma e finagalo ia faia mea uma e tatau ai ina ia tatou toe foi atu i Lona afioaga. O nisi foi taimi e aofia ai iina ia tofotofoga, o faafitauli, ma luitau (tagai 1 Peteru 1:7). Afai e faasaoloto i tatou e le Tama Faalelagi mai o tatou luitau ona sa na ona tatou ole atu i ai, o le a Ia le tuu maia ia i tatou aafiaga tonu e tatau ai mo lo tatou faaolataga. E tatau ona tatou aoao ia faatuatuaina le fuafuaga a le Atua mo i tatou ma gauai atu o tatou loto i Lona finagalo. A tatou faaogatasia o tatou manaoga ma Lona finagalo, ma faaalia lo tatou faalagolago atoatoa ia te Ia, e mafai ona tatou agavaa mo le mauaina o “le iuga o [lo tatou] faatuatua, o le faaolaina lea o [o tatou] agaga” (1 Peteru 1:9).