AGAI I LUMA I LE Faatuatua
Saunia e Elder Anthony D. Perkins
O Le Fitugafulu
Mai se saunoaga i le faigalotu “E ui o Lea Na Ou Alu Lava,”i le Iunivesite a Polika Iaga i le aso 4 Fep., 2014. Mo le saunoaga atoa i le gagana Peretania, asiasi i le speeches.byu.edu.
E mafai e lesona e fa o faaiuga musuia na faia e Nifae ona faaitiitia lou fefe ae faateleina lou talitonuga mautinoa e agai i luma.
Auiliiliga mai le O Le Agaga o le Tatalo, saunia e Claudio Roberto Aquiar Ramires
Ua ola nei le autalavou matutua i le mea ua ta’ua “o le Vaitausaga o Faaiuga.” O loo e faia le tele o filifiliga aupito taua o lou olaga, e pei o le “alu i le malumalu, faia o se misiona, o le a’otauina, filifilia o se galuega, ma le filifilia o se soa ma faamauina mo le olaga nei ma le faavavau atoa i le malumalu sa.”1
Ou tautala faapitoa atu ia i latou o loo tauivi ma se tasi pe sili atu foi o nei faaiuga taua—o nisi atonu ua gase mai le fefefe i le faia o faaiuga sese po o le manaomia foi o le faamalosiauga ina ia tumau mautinoa i se faaiuga sa faia muamua.
E mafai e lesona e fa o faaiuga musuia na faia e Nifae ona faaitiitia lou fefe ae faateleina lou talitonuga mautinoa e agai i luma, pe a faaaoga.
1. Usiusitai i Poloaiga.
O le fuaiupu mulimuli o le talafaamaumau paia a Nifae o loo aotele mai ai lona soifua: “Aua ua faapea ona poloaiina ai o au e le Alii, ma e ao ina ou usiusitai” (2 Nifae 33:15).
O le faatuatua ma le alofa o Nifae i le Faaola ua faaalia i lona usiusitai i poloaiga a le Atua. Sa tatalo o Ia (tagai 1 Nifae 2:16). Sa ia faitau i tusitusiga paia (tagai 1 Nifae 22:1). Sa ia sailia ma mulimuli i le taitaiga mai se perofeta soifua (tagai 1 Nifae 16:23–24). O lena usiusitai na mafai ai e le Agaga Paia ona mafuta ma le mamana ma Nifae i lona olaga atoa, ma gauai atu ai i faaaliga patino faifai pea.
E tatau foi ia te outou ona tumau latalata i le Alii e ala i le tausia o poloaiga a le Atua. Ou te molimau atu o le usiusitai faifai pea i nai mea iti, e pei o le faitau o tusitusiga paia, tatalo i aso taitasi, auai i sauniga Lotu, gauai atu i fautuaga a perofeta soifua, ma le auauna atu i isi, tou te agavaa ai mo le Agaga—ma faaaliga e aumai ai.
O le atoatoa e le o se mea e muai manaomia mo faaaliga patino i le tagata lava ia. O le mea e muai manaomia o le salamo i aso taitasi (tagai Roma 3:23). Afai e faamaoni ma atoatoa lelei lou salamo (tagai MF&F 58:42–43), o le a aumaia e le mana faamama o le Togiola le Agaga e taiala ai oe i faaiuga tuga o le olaga.
2. Agai i Luma i le Faatuatua
Manatu faapea o oe o Nifae. Ua fai atu lou tama ia te oe, ua poloaiina e le Alii lou aiga e tuua a outou oa ae o i le vao. Mata e te le fia iloa e uiga i la outou malaga ma lo outou taunuuga?
Ou te manatu semanu e matuai fiafia Nifae pe a na faaalia manino atu e le Alii lona lumanai. Peitai e le o le auala lea na galue ai le Atua ia Nifae, ma e le o le ala foi lea o le a galue ai o Ia ma oe.
A o malaga le aiga o Nifae i le vao, sa na o ia na oo mai i ai faatonuga “mai lea taimi i lea taimi” (1 Nifae 16:29; 18:1). O le vaai atu i lana faigamalaga i le olaga ma le mautinoa muamua i le amataga, semanu na te le maua ai le faatuatua maua’i ma aafiaga na maua ai le faatuatua lea na fesoasoani e avea atili ai o ia o se tagata e pei o Keriso.
Afai o e faatalitali i le Atua e faaali atu po o le a le matata faa-akatemia e te tulimatai, po o ai e te faaipoipo i ai, po o le a le galuega e talia, po o fea e te nofo ai, pe a’oga mo se faailoga maualuga atu, ma pe fia se lua fanau, atonu o le a le mafai lava ona e laa ese mai lou pa’usisi. Ou te molimau atu e oo mai faaaliga patino na ’o lea taimi i lea taimi.”
E finagalo lo tatou Tama Faalelagi ia tatou tuputupu ae, ma e aofia ai le atiinaeina o lo tatou tomai e iloilo mea moni, faia fetuunaiga, ma faia faaiuga. Ae o loo Ia valaauliaina foi i tatou e avatu a tatou faaiuga ia te Ia i le tatalo (tagai MF&F 9:7–9). Na aoao mai e Elder Richard G. Scott o le Korama a Aposetolo e Toasefululua e faapea (e oo mai tali ia tatou tatalo “i se tasi o ala e tolu.”2
Faamautinoaga Mautu
“Muamua,” na saunoa Elder Scott, “e mafai ona e lagonaina le filemu, mafanafana, ma le mautinoa lea e faamautu mai ai e sa’o lau faaiuga.”3 Na ma iloa ma lo’u toalua o, Christy, lena faamautinoaga mo faaiuga taua e aafia ai le olaga atoa—e mafai ona ala mai i tusitusiga paia, ae masani lava pe a uma se tapuaiga i le malumalu.
Mo se faataitaiga, ina ua mavae ona manatunatu loloto ma tatalo, sa tonu ia i ma’ua e tuua lo ma fale fou sa moemiti i ai i Texas, ae talia se galuega fou, ae matou o ma le ma fanau laiti e toaono i Beijing, Saina. Ae sa matua ma manaomia lava se faamautuuga faaleagaga mo lenei suiga taua. Na oo mai se faamautinoaga paia ia i maua—i totonu o le malumalu—a o ma faitauina nei upu i le Mataupu Faavae ma Feagaiga: “O lo’u loto lenei e tatau ona e … aua le tele ni aso e te nofo ai i le nofoaga lenei; … aua le mafaufau i au meatotino. Alu i laueleele i sasa’e” (MF&F 66:5–7).
O le siufofoga o Iesu Keriso i tusitusiga paia, e o mai faatasi ma lagona mamana mai le Agaga Paia, na faamautu mai ai e le Agaga Paia, e sa’o le ma tonu e o i Saina.
Lagona Lemautonu
O le ala lona lua e tali mai ai e le Tama Faalelagi ia tatalo e ala mai lea i se “lagona lemautonu, faaluafesasi o le mafaufau, e ta’u mai ai e sese lau filifiliga.”4
Ina ua maea mai la’u misiona mai Taiuani, sa ou mafaufau o tulafono faavaomalo o se filifiliga lelei lea mo se galuega. A o ma mafaufau ma Christy i lena lumanai, sa ma malamalama toe lima tausaga taugata o le a’oga o i luma.
Sa matuai pau le tamaoaiga i le I.S. ma sa utiuti a ma tupe, o lea sa ma manatu ai o le auai atu i le Ea Fosi a le ROTC o se filifiliga poto lea e totogi ai la’u aoga. Ae ina ua ou sue i le suega ma faatumu pepa, ma te lei maua se mafanafana i le faia o se tautinoga. E leai se manatu faaluafesasi po o se lagona pogisa na oo mai—na o le leai lava o se toafilemu.
O lena faaiuga tele le talafeauga tautupe sa musuia, i se isi itu, aua semanu e avea au o se loia leaga!
Faatuatuaga Paia
E tali mai le Atua i se ala lona tolu: e leai se tali “Afai e te ola agavaa ma o loo ogatusa lau filifiliga ma aoaoga a le Faaola ma e manaomia ona e gaoioi,” na saunoa mai Elder Scott, “ia faia loa ma le faatuatuaina.”5
O le taumafaiga a Nifae ia maua mai papatiso o loo faapupula mai ai le ala e ao ai ona tatou faaauau ma le faatuatuaga paia. Na ia tusia:
“Ma sa taitai aʼu e le Agaga, ona sa ou lē muaʼi iloa muamua mea e tatau ona ou faia.
“E ui i lea sa ou alu atu” (1 Nifae 4:6–7).
O le a oo mai taimi o au faaiuga fai, lea e le mafai ai ona e toe faatuutuu ma ua tatau ona faatino. Ua ou aoaoina e pei ona sa aoao mai Elder Dallin H. Oaks o le Korama a Aposetolo e Toasefululua, “o le a tatou mauaina uunaiga a le Agaga pe a tatou faia mea uma tatou te mafaia, pe a tatou galulue i fafo i le la nai lo le nofonofo i le paolo ma tatalo mo se taitaiga po o le a le laasaga muamua e fai.”6
E faapei o Nifae, o le a faamautu mai e le Agaga pe lapatai mai foi lou ala e te filifilia i le taimi e tatau ai.
3. Ola ai i le Taimi Nei
O le tautinoga a Nifae i le malaga i le nuu folafolaina na matua eseese lava mai ona uso o Lamana ma Lemuelu. Sa la filifili e o, ae sa lei aveesea lava o la’ua loto mai Ierusalema. Sa toe fau e Nifae lana aufana na gau e tulimanu ai mo meaai ma saili uamea e fau ai se vaa, ae foliga o la sa malolo lelei ona uso i le faleie.
E toatele ni Lamana ma ni Lemuelu i le lalolagi i le taimi nei. Ae o loo manaomia e le Alii ni alii ma ni tamaitai e matuai tautino atu e pei o Nifae. O le a e iloa le alualu tele i luma i le olaga pe a e tautino atu atoa i au faaiuga, ma taumafai e faalautele ou tulaga o i ai, ma pe a o e fuafua mo le lumanai.
Na faatino e Nifae le fautuaga poto a Peresitene Thomas S. Monson: “O le faasolo o mafaufauga i aso ua tuanai ma le moomoo mo le lumanai, e ono maua ai se nofogofie, ae o le a le suitulaga ai le ola ai i le taimi nei. O le aso lenei o lo tatou avanoa, ma e tatau ona tatou pue maia.”7
4. Nono mai le Malosi o Isi
Tusa lava pe ua maea ona sailia le Agaga, agai i luma i la tatou faaiuga, ma ua matua tautino atu lava i ai, e ono tulai mai pea lava le masalosalo ma afua ai ona tatou fesiligia la tatou faaiuga. O ia tulaga e mafai ai e se tagata faatuatuaina o le aiga po o se uo ona maua mai ai se fautuaga ma se malosiaga e tumau ai i le ala. Ou te manatu i le gasologa o le malaga, na avea ai le toalua o Nifae ma ana taula faatuatuaina.
Na oo mai ia te au se lagona talisapaia mo le toalua o Nifae ina ua ou asiasi atu i le Falemataaga o Talafaasolopito o le Ekalesia. Sa ou maofa i se atavali iina o Nifae o loo saisai i le pou o le vaa, ua matua susu pala i le afa matautia.8
Sa i autafa o Nifae lona toalua ma se tasi o lana fanau. Sa aafia foi o ia i le afa lava lea e tasi ma luitau e pei o Nifae, ae sa le talia e ona mata ma sa opogi mai ona tauau i ona lima. O le taimi lea na ou iloa ai, ua matua faamanuiaina lava au i le i ai o se toalua lotonuu e tuuina mai le malosiaga i taimi o o’u tofotofoga. Ou te faamoemoe o faapena foi ona avea au ma malosiaga ia te ia.
Uso e, o le tausisia ma faalautele o le malosiaga tou te atiinae (po o le a atiinae) o se faifeautalai po o isi auaunaga amiotonu, o lau aseta aupito sili lena i le avea ai o se tane ma se tama manaomia. Tuafafine, o le nofouta faaleagaga, faatuatua, ma le lototele e mulimuli ia Iesu Keriso, o nisi ia o outou uiga auaumama silisili o se ava ma se tina.
Ou te valaaulia oe ia avea ma ituaiga tagata e mafai e lou toalua o i ai nei po o le lumanai, ona nono mai ai mo fautuaga poto ma le malosiaga. O se tane amiomama ma se tamaitai agavaa, e faamauina mo le olaga nei ma le faavavau atoa i le malumalu, e mafai ona faia mea faigata o se paaga tutusa.
Ou te folafola atu afai tou te faaaogaina lesona na aoao mai ia Nifae ma perofeta o onaponei, e uiga i le faia o faaiuga, o le a taitaiina outou i faaaliga patino mai “lea taimi i lea taimi.” A o e agaigai atu i luma i le faiga o au faaiuga, ia e faia e pei ona faia e Nifae, ia faatuatua e fai atu:
“Sa taitai aʼu e le Agaga, ona sa ou lē muaʼi iloa muamua mea e tatau ona ou faia.
“E ui o lea sa ou alu” (1 Nifae 4:6–7).