Me Tiki ni Noda Bula na Koniferedi

Tabana e 86: A kerei keda o Peresitedi Thomas S. Monson meda ivakaraitaki vinaka ena noda muri Jisu Karisito. Ni da sa muri Koya, eda sa rawa ni rarama kei vuravura. Ena rawa vakacava mo ivakaraitaki ki na nomu matavuvale kei na itokani? Sa rawa mo tekivu ena nomu lalawataka e dua na ka mo vakataki Jisu vakalevu cake kina.

Tabana e 104: E talanoataka o Henry B. Eyring, iMatai ni Daunivakasala ena Mataveiliutaki Taumada, na nona a vakasaqara tiko o tamana na valenilotu ena dua na Sigatabu ni nona veisiko yani i Ositerelia. Ni sa vakasaqara tiko, a masu ena ilesu kece ni gaunisala me kila na sala me gole kina. Vakalailai ga sa rogoca sara na domo ni sere ka kila ni sa vukei koya na Yalo Tabu me kunea na nona sala. Vakasamataka mada na gauna o a vakila kina na Yalo Tabu. O a vakila vakacava?

Tabana e 6: E talanoataka o Sisita Rosemary M. Wixom, na peresitedi raraba ni Lalai, e dua na goneyalewa lailai o Amy. A masulaka o Amy me kila ke sa lomani koya dina tiko na Kalou ka sa tu e yasana. Wilika se tukuna tale vakamatavuvale na italanoa oqo ka tukuna na gauna o a vakila kina na loloma ni Kalou. Na veika cava o vakila ni ko kila ni ko sa luvena na Kalou? O na vukei ira vakacava eso mera kila ni ra sa luvena na Kalou?

Tabana e 121: E tukuna o Elder Allen D. Haynie ena Vitusagavulu na gauna a kelia kina kei rau na tuakana e dua na qara levu me sa dua na tobu ni sisili. E ratou sa bau soso sara ga na qito kina. A sega ni vakatarai Elder Haynie o buna me curu i vale me yacova ni sa sili ka vakasavasavataki. Na cava e vakavulica na italanoa oqo baleta na Veisorovaki i Jisu Karisito? Na cava na vuna e bibi kina me da savasava tikoga e mata ni Kalou?

Tabana e 83: E kaya o Peresitedi Thomas S. Monson ni ivakaro ni Kalou e sega ni veivakataotaki ia era sa idusidusi ki na bula marau. “O koya sa buli keda ka sa lomani keda vakauasivi sara,” a kaya, “sa kila tu na sala sa gadrevi meda bulataka kina na noda bula me rawa ni da taukena na bula marau cecere duadua e vakasamataki rawa.” Mo vakatovolea mada na vosa nei Peresitedi Monson, ka maroroya na ivakaro ni Turaga. Kakua ni kurabui ni ko sa vukei ka taqomaki mai vakalou.

Tabana e 6: Ni da raici ira yani na tamata meda kilikili kina, eda na dau yalorarawa ga. E kaya kina o Sister Rosemary M. Wixom, na peresitedi raraba ni Lalai, “Eda sa rawa ni raica na noda dodonu mai vua ga [na Turaga], sega mai na vuravura e voliti keda tiko se mai na Facebook se Instagram.” Vola ena nomu volaniveisiga ena macawa oqo me baleta na kemu ituvaki vakalou kei na veivakalougatataki e tadu mai na kila o ya.

Tabana e 20: E kaya kina o Peresitedi Dieter F. Uchtdorf, iKarua ni Daunivakasala ena Mataveiliutaki Taumada, “Kevaka o nanuma ni sega tiko ni cakacaka vinaka vei iko na kosipeli, au sureti iko mo kalawa mada e muri, raica na nomu bula mai na dua na vanua cecere, ka vakarawarawataka na nomu raica na bula vakatisaipeli. Raica matua na yavu ni vunau, ivakavuvuli, kei na kena bulataki na kosipeli.” Kevaka o lomaocaoca tiko se tiko veilecayaki, raica na sala mo vakarawarawataka kina na nomu bula kei na sokalou ena kosipeli.

Tabana e 65: A talanoataka o Elder Neil L. Andersen ena Kuoramu ni iApositolo Le Tinikarua e dua na cauravou a nuitaka tiko me laki kaulotu ia a qai kila me na qarava mada na nona matavuvale. Ena kaukauwa ni vakabauta kei na veivakalougatataki ni Turaga, a rawa kina vei cauravou oqo me laki kaulotu e muri. Ena rawa vakacava meda vakataki koya ka toso ki liu ena vakabauta se cava ga na veivakataotaki ena noda salatu?

Tabana e 33: A talanoataka o Elder Larry R. Lawrence ena Vitusagavulu e dua na daukaulotu oti a curuma tiko e vuqa na dredre me yacova ni sa cabora na Sigatabu ki na qaravi ni Kalou kei na vulici ni kosipeli. “Na veisau lailai oqo a vakavuna me kune vakacegu ka vakatudonutaki ka a vakasaqara voli,” a kaya o Elder Lawrence. Na cava o rawa ni cakava mo cabora vakaidina kina na Sigatabu me nona na Turaga?

Tabana e 86: E vakananumi keda o Peresitedi Thomas S. Monson meda ivakaraitaki ni rarama kei vuravura. “Ni da muria na ivakaraitaki ni iVakabula ka bula ka veivakavulici me vakataki Koya,” e kaya o Peresitedi Monson, “na rarama o ya ena ramase e lomada ka na vakararamataka na nodra sala eso.” Na cava so o na cakava mo rarama vakalevu cake ena “ramase ki na dua na vuravura sa buto loaloa tikoga mai”?

Rau a vosa me baleta na nodra bibi na marama kei na veiqaravi vakatina o Peresitedi Russell M. Nelson, Peresitedi ni Kuoramu ni iApositolo Le Tinikarua, kei Elder Jeffrey R. Holland ena Kuoramu ni iApositolo Le Tinikarua. A vakavulica o Elder Holland, “Sega ni dua na loloma ena vuravura oqo me bau tautauvata ki na loloma uasivi i Jisu Karisito me vakataka na nona lomana vakaidina na luvena e dua na tina yalodina” (tabana 47). E vakavulica o Peresitedi Nelson ni o ira na marama era saumaki vou ka maroroya tiko na nodra veiyalayalati “era na tudei tikoga ena vuravura sa ca tikoga mai vakalevu” (tabana 95). Mo vakananuma titobu ena masumasu na veivosa oqo ka veivosakitaka na sala mera tokoni ira kina na marama na lewe ni matavuvale ena nodra ilesilesi sa solia mai na Kalou.

E vica era vosa baleta na bula qaqa ena gauna ni veika rarawa. E vakavulica o Elder Hugo Montoya ena Vitusagavulu ni na yaco ki na tamata kecega na veivakatovolei kei na veitemaki, “ia eda na vaqaqacotaki ka tubu talega kina ni da valuta rawa” (tabana 53). Wilika na nona vosa kei na vosa nei Elder James B. Martino ena Vitusagavulu (tabana 58); Elder Koichi Aoyagi, lewe ni Vitusagavulu vakaemeritesi (tabana 126); kei Neill F. Marriott, iKarua ni Daunivakasala ena mataveiliutaki raraba ni Goneyalewa (tabana 30). Raica na sala mo na vaqaqacotaka kina na nomu vakabauti Jisu Karisito kei na sala me vukei iko kina o Koya ni ko sotava na veika dredre.

Tabana e 33: Ena nona vosa, a vakavulica kina o Elder Larry R. Lawrence ena Vitusagavulu, “Ena bolei keda tikoga na Yalotabu meda vinaka cake tikoga ka toso i cake sara. … Kevaka eda sa yalomalumalumu ka vakavulici rawarawa, ena taura na ligada o Koya ka kauti keda yani ki vale.” Ni ko sa wilika oti na nona vosa, vakasaqara na veidusimaki ni Yalotabu ena sala mo na torocake kina ka veisau.

Tabana e 104: E vakavulica kina o Peresitedi Henry B. Eyring, iMatai ni Daunivakasala ena Mataveiliutaki Taumada ni gadrevi me “sa tu vata ga kei keda na Yalotabu sai koya na noda dusimaki ka vakasalataki ena Yalo Tabu ena veisiga ni noda bula.” Raica na veika o rawa ni cakava se kakua ni cakava tale mena tiko ga kei iko na Yalotabu.