Bisopi Gérald Caussé

Ena gauna se qai tekivuna tiko kina o Gérald Caussé na nona cakacaka ena kabani ni veisoliyaki kakana mai Varanise ni se yabaki 33 kina a kacivi koya vakatikitiki o peresitedi ni nona kabani. A raica rawa o koya na bula vakayalo vakaidina nei Gérald kei na nona dau vakatulewa vinaka ka vakaduavatataki ira na tamata cakacaka—na itovo e tarai cake mai na itaviqaravi, veiqaravi, kei na veiliutaki ena Lotu. A tinia o peresitedi ni o Gérald e dua sa rawa ni nuitaka.

A kurabui o koya, ni sa soli vei Gérald na ilesilesi me liutaka e 1,800 na tamata cakacaka. Ena gauna sa kacivi kina me dua na Vakaitutu Raraba ni oti e tini na yabaki, ena Epereli, 2008, a liutaka tiko o koya e vica na kabani ni veisoliyaki kakana.

Na kila vakabisinisi vakaveiliutaki nei Bisopi Caussé, vata kei na nona veiqaravi vakalotu kei na kila ni veiliutaki, ena qaravi koya vinaka ena ilesilesi ni Bisopi Vakatulewa vou ni Lotu. O Bisopi Caussé, ka a veiqaravi tiko mai vaka-iMatai ni Daunivakasala ena Matabisopi Vakatulewa vakatekivu mai na Maji 2012, a ciqoma na nona veikacivi vou ni oti toka ga e vica na siga na koniferedi raraba ni Okotova. A sosomitaki Elder Gary E Stevenson, ka sa tokoni me lewe ni Kuoramu ni iApositolo Le Tinikarua ena ka 3 ni Okotova 2015.

A ika 15 ni Bisopi Vakatulewa o Bisopi Gérald Jean Caussé, a sucu mai Bordeaux, Varanise, ena 1963. A vakamau kei Valérie Babin ena 1986, ena Valetabu e Bern Switzerland. E lima na luvedrau ka lima na makubudrau.

Me ikuri ni nona vakailesilesi oti mai na Matabisopi Vakatulewa ka lewe ni Vitusagavulu, sa veiqaravi oti vaka-daunivakasala ena Mataveiliutaki ni iWasewase o Iurope ka lewe ni Vitusagavulu ni iWasewase, peresitedi ni iteki, daunivakasala nei peresitedi ni iteki, daunivakasala nei bisopi, iliuliu ni ilawalawa ni bete levu ka peresitedi ni italatala qase.

Ni se cauravou, a kune marau o Bisopi Caussé kei na nona vakabauta ena gauna ni nona qarava na Lotu. A dautabapiano ena Lalai ni se yabaki 12 vakakina a peresitedi ni Matawilivola ni Sigatabu ni sa yabaki 16. A vakaogai koya talega ki na ilesilesi ni Matabete i Eroni.

“Na veiqaravi ena Lotu,” oka kina ena tomani tamana ena nona ilesilesi vaka-bisopi ka peresitedi ni tabana, “a vukea meu taukena noqu ivakadinadina,” a kaya o koya.

A taura o Bisopi Caussé na nona diqiri cecere ni bisinisi mai na ESSEC Business School mai Varanise ena 1987. Ni bera ni tekivutaka nona cakacaka, a lewena tu o koya na Mataivalu ni Vuka ni Varanise, ka lesi sara ki na tabana ni NATO.