Elder Ronald A. Rasband

Ni oti nona kacivi o Elder Ronald A. Rasband ki na Kuoramu ni iApositolo Le Tinikarua, a wilika sara na Joni 15:16: “Dou sa sega ni digitaki au, ia kau sa digitaki kemudou, ka lesi kemudou.”

A kaya o Elder Rasband, “Au a vakauqeti vakayalo ni sega ni dua na ka baleta na [veikacivi] oqo a noqu … gagadre ga. E a nona lewa na Turaga.”

Ni sa yabaki 19 o Elder Rasband sa vulica oti mai kina o koya e dua na lesoni vata o ya me baleta na soli koya ki na lewa ni Turaga. A nuitaka tiko me laki kaulotu ki Jamani, me vakataki tamana kei tuakana qase, ia a mani kacivi ki na Tabana ni Kaulou e Eastern States (Amerika). A raica na nona ivolanikalou ka wilika nai ka 100 ni Wase ni Vunau kei na Veiyalayalati.

“Ia mo drau muri au, ka rogoca na noqu ivakasala vei kemudrau.

“… Ena dolavi e dua na katuba ena vanua oqo kei na veivanua vakavolivolita. …

“Ia au sa kaya vakaidina vei kemudrau, drau tabalaka cake na domomudrau vei ira na tamata oqo” (tikina e 2, 3, 5).

Sa vakadinadinataka o koya ni vinakata na Turaga me laki kaulotu o koya ki na Tabana ni Kaulotu e Eastern States.

A sucu o Elder Rasband, ena ka 6 ni Feperueri, 1951, mai na dua na itekitekivu vakaloloma. “O tamaqu a draiva ni lori ni [madrai] ka veiqaravi [tu ga e vale] o tinaqu lomani,” a kaya. O tamaqu e lako mai na matavuvale itabatamata veitaravi Yalododonu Edaidai, e dua na isolisoli e vakamareqeta vakalevu.

Ena 1973 a vakamau o Elder Rasband kei Melanie Twitchell. E 5 na luvedrau ka 24 na makubudrau. E vakacaucautaki watina ni 42 na yabaki o Elder Rasband ena nona vukei koya me tamata yaco ena gauna oqo. “E tauri au o watiqu me vaka na tete ni dautulikuro ka buli au ki na dua na ka e yaga bibi. … A sega walega ni muataki au na nona veivakauqeti vakayalo ki na veikacivi totoka ka digitaki oqo ia ki na veika vakayalo kece au a cakava.”

Ena 1987 a laki peresitedi ka vakailesilesi liu o Elder Rasband ena dua na kabani levu ni wainimate e vuravura. A vulica mai vei ira na nona iliuliu na sala me mana cake kina na nona veiqaravi ena Lotu. “Au a vulica mai na noqu cakacaka … ni ra sa ka bibi cake na tamata mai na veika kece ga eda rawa ni cakava.” Vakakina nona “vulica e vuqa, ka vuqa sara na kila vaka-veiliutaki … au a veiqaravi sara kina vakavinaka ena Vakaitutu Raraba.”

A vuqa sara na veimadigi nei Elder Rasband me vakayagataka kina na kila oqori. A veiqaravi oti vaka-bisopi, peresitedi ni kaulotu; Vakaitutu Raraba ena Vitusagavulu vakatekivu mai na Epereli 2000; supavaisa ena iwasewase e North America West, Northwest, kei na tolu e Utah; daunivakasala ena iWasewase na Europe Central; Dairekita Liu ni Tabana ni Valetabu; lewe ni Mataveiliutaki ni Vitusagavulu vakatekivu mai na 2005, ka Peresitedi Levu ni Vitusagavulu vakatekivu mai na Epereli 2009.

Mai na nona ilesilesi ena Lotu sa yaco kina me dau lomani ira na Yalododonu Edaidai ena veivanua kecega. E dau kaya vei ira na lewenilotu, “Na nomuni vakabauta sa mai vakalevutaka na neimami vakabauta; ka sa umani vata na nomuni ivakadinadina ki na neimami ivakadinadina” (tabana e 90).

E yalomalumalumu o Elder Rasband me veiqaravi me iApositolo ni Turaga o Jisu Karisito. “Au sa dau gadreva tu ga meu qaravi Koya,” a kaya. “Au sa solia na noqu gauna, noqu taledi, kei na veika kecega sa tu vei au nikua ki na vo ni noqu bula. Au sa yalodina kina meu cakava. Au sa doka meu cakava.