Vakatabui na Vanua e Vakalesui mai kina na Matabete

Ena 19 ni Sepiteba, 2015, a vakatulewa o Peresitedi Russell M. Nelson, Peresitedi ni Kuoramu ni iApositolo Le Tinikarua, ena kena vakatabui na vanua mai Pennsylvania, Amerika, na vanua rau a ciqoma kina o Josefa Simici kei Oliver Cowdery na Matabete i Eroni mai vei Joni na Daupapitaiso. Ena veiyabaki ni 1820 a kilai tu na vanua oqo me o Harmony, Pennsylvania, ka vuqa na siga bibi ena itekitekivu ni Lotu a yaco e kea:

• Na nodrau sota o Josefa Simici kei Emma Hale, nodrau veimusumuski, kei na tekitekivu ni nodrau bula vakamau.

• Na nona tadu mai o Oliver Cowdery me ivukevuke ni vunivola ena kena vakadewataki na iVola i Momani.

• E vuqa sara na lewe ni iVola i Momani a vakadewataki eke.

• Na vakalesui mai ni Matabete i Eroni kei na (e dina ga ni sega ni kilai na kena vanua dina) Matabete i Melikiseteki.

• Na isevu ni papitaiso a vakayacori ena lewa ni matabete ena gauna oqo.

• Na ivakatakila a ciqomi sa yaco me wase 15 ni Vunau kei na Veiyalayalati kei na dua na tiki ni Mataniciva Talei.

Na vanua sa mai vakavinakataki e oka kina e dua na vale ni vulagi, ka sa valenilotu talega ni dua na tabana lailai e kea; na vale taravou nei Josefa kei Emma kei rau na itubutubu nei Emma, Isaac kei Elizabeth Hale; kei na sala ena Uciwai na Susquehanna ki na vanua e vakabauti rau a papitaiso kina o Josefa kei Oliver.

“Na vanua o Harmony a vakarautaka ki vei Josefa me yaloqaqa vakayalo ka taqomaki, ka rawa vua me raica vakatabakidua na vakadewa ni iVola i Momani,” e kaya o Peresitedi Nelson. “Ena gauna oqo, a vakavulici Josefa na Turaga ena nona ilesilesi vakalou me parofita, daurairai, ka daunivakatakila.”