Elder L. Whitney Clayton

Ni se cauravou lailai, a vulica mai o Elder L. Whitney Clayton me taleitaka na cakacaka kei na matavuvale. Ena veimataka lailai ni Vakarauwai, e dau gole yani o tamana, me laki veiqaravi vakavuniwai. Ni bera ni biubiu, a dau vola ena vava ni volavola na veiitavi yadua me na caka ena siga o ya. Ni sa lesu mai e dau tomani iratou na luvena tagane ena cakacaka vata kei iratou. A vulica mai vei tamana, o Elder Clayton na ivakarau ni cakacaka a vakalougatataki koya.

E kila talega na matavuvale nei Elder Clayton ni vakayakavi sa gauna vata vakamatavuvale. “Keitou dau veivosakitaka na politiki, na veika e yaco tiko e koronivuli, ena itikotiko raraba, na kosipeli, kei na Lotu. … Sa dua dina na isaluwaki totoka ni tubu cake.” Na veivosaki ena gauna ni kana sa dua na ivakarau rau sa vakamuria tiko vakaveiwatini kei iratou na luvedrau.

A vakatikori o Elder Clayton me Peresitedi iLiuliu ni Vitusagavulu ena ka 6 Okotova, 2015. A sosomitaki Elder Ronald A Rasband, ka sa kacivi ki na Kuoramu ni iApositolo Le Tinikarua.

A tokoni o Elder Clayton me Vakaitutu Raraba ena Vitusagavulu ena 31 ni Maji, 2001. A lewena tu e liu na Mataveiliutaki ni Vitusagavulu mai na 2008 ka sa liutaka tu mai na vei iwasewase eso mai Utah. A ivukevuke vei Elder David A. Bednar ena Kuoramu ni iApositolo Le Tinikarua ena kena vakaraici na iWasewase o Africa Southeast kei na Africa West. A lewena talega mai na Komiti ni Veika Raraba. A daunivakasala ena Mataveiliutaki ni iWasewase na South America South ena 2002–2003 ka kena peresitedi ena 2003–2006.

A sucu mai Salt Lake City, Utah, Amerika ena 1950, ka vakamau kei Kathy Ann Kipp ena 1973 ena Valetabu e Salt Lake. E rau itubutubu ni 7 na gone ka tubudra e 20 na makubudrau.

A taura o Elder Clayton na nona diqiri ni veika vakailavo ena Univesiti o Utah kei na diqiri ni lawa mai na Univesiti ni Pasifika. A vu-ni-lawa mai California, Amerika mai na 1981 ki na 2001.

A veiqaravi mai ena Vitusagavulu ni iWasewase, mata ni iwasewase levu, daunivakasala ni peresitedi ni kaulotu, lewe ni matabose e cake, bisopi, peresitedi ni kaulotu ni iteki, ka qasenivuli ni Vunau ni Kosipeli. A laki kaulotu tudei e Peru mai na 1970 ki na 1971.