Elder Gary E. Stevenson

Ni nanuma lesu na nona kacivi ki na Kuoramu ni iApositolo Le Tinikarua, sa vakadeitaka kina o Elder Gary E. Stevenson ni nona veiqaravi ena matanitu ni Turaga ka vakabibi ni sa iApositolo sa na baleta vakalevu cake tiko na veiliutaki ena veiqaravi ka sega ena veiqaravi ena veiliutaki.

“O Jisu Karisito a vakatokai Koya me tamata dauveiqaravi,” a kaya o Elder Stevenson ena koniferedi kei ira na dauvolaitukutuku ni oti nona tokoni. “Meda sa vakatokai keda talega meda tamata dauveiqaravi” (raica na Marika 10:44).

A yaco mai vakasauri na nona kacivi o Elder Stevenson ki na Kuoramu ni iApositolo Le Tinikarua. E nanuma o koya, ni nona veiqaravi ena Lotu—vakabibi ena Vakaitutu Raraba ena Vitusagavulu mai na 2008 ki na 2012 ka BIsopi Vakatulewa mai na Maji 2012—a vukea nona vakarautaki ki na nona ilesilesi vou.

Dua vei ira na ka bibi sa vulica mai ena veiqaravi ni Turaga na kedra yaga bibi na luvena na Tamada Vakalomalagi. Sa vakanamata tiko o Elder Stevenson ki na veimadigi e vuqa ena yaco mai ni sa iApositolo ka soli ivakadinadina kivei ira na luvena na Kalou e vuravura raraba.

Sa vakanamata tale tikoga na duavata tiko kei ira na liutaka tiko na Lotu ni Turaga. “Ni da vakasamataka noda tiko ena matabose ka rawa meda vuli mai vei [ira], meda tuberi mai vei [ira], ka vakila na nodra kaukauwa kei na ivakadinadina i Jisu Karisito kei na Nona Veisorovaki,” a kaya, “sa dua na ka au vakabauta ni sa na ka totoka sara.”

A sucu o Gary E. Stevenson ena ka 6 ni Okosita, 1955, mai vei rau o Evan N. kei Vera Jean Stevenson. E dikeva lesu na nona kawa ni matavuvale tekivu sara mai vei ira na painia Yalododonu Edaidai mai Utah. A tubu cake mai na vualiku kei Cache Valley e Utah ena dua na matavuvale kila na kosipeli ka vulica mai kina na bibi ni cakacaka kaukauwa kei na bibi ni veiqaravi. O tamana, “na bisopi niu se cauravou,” a dau sureti koya ki na nodra sikovi na vada e vuqa era tiko ena nodra tabanalevu e kea. Na lesoni a vulica rawa o cauravou Gary mai vei tamana me baleta na veikauwaitaki kei na veiqaravi sa va-Karisito e rawata sara na yalona ka veiqaravi vinaka sara kina vaka-Bisopi Vakatulewa.

“O ira na bisopi ena Lotu,” a kaya, “era sa noqu tamata qaqa dina.”

A tekivu na nona veiqaravi yalodina ena Lotu o Elder Stevenson ena gauna a kacivi kina me laki kaulotu tudei ki na Tabana ni Kaulotu e Japan Fukuoka, na vanua a tauyavutaka kina nona lomani ira tawayalani na lewenivanua o Japani kei na nodra vosa, ka se madila tiko kina. Ni oti na nona kaulotu a laki vuli ki na Utah State Univesiti, na vanua a laki sota kina kei Lesa Jean Higley. Rau a vakamau ena Valetabu e Idaho Falls Idaho ena 1979, ka rau itubutubu ni va na gonetagane. A taura o Elder Stevenson na nona diqiri ni veiliutaki ena bisinisi, ka me vakatabakidua ena makete. E muri a laki tauyavutaka ka veiqaravi vaka-peresitedi ka ilesilesi iliuliu ni dua na kabani levu e vuravura ni buli iyaya kei na maketetaki ni iyaya ni vakaukauwa yago.

E ratou a vakaitikotiko mai Japani na matavuvale na Stevenson ena vica na yabaki. Ena 2004 a kacivi o Elder Stevenson me peresitedi ni Tabana ni Kaulotu e Japan Nagoya. Ni oti na nona kacivi ki na Vitusagavulu ena 2008 a laki veiqaravi vaka-daunivakasala ka peresitedi ni iWasewase na Asia North. A veiqaravi tiko vaka-Peresitedi ni iWasewase ena 2011 ena gauna a kurea kina na uneune na baravi vualiku kei Japani, ka yaco kina e dua na sunami levu kara mate kina e udolu na tamata. Na ka oqo a gauna ni nona vakadidike titobu ki na nona bula.

A veivuke o Elder Stevenson me vakarautaka na veivukei ni Lotu, ka vakarautaka na kakana, iyaya, veitokoni, kei na veivuke ni gauna balavu.

“O ya na ivakadinadina bula ni Lotu i Jisu Karisito ni mai vakayacora e dua na nona ilesilesi vakalou ena nodra lomani na dravudravua kei na vakaleqai,” a nanuma lesu. A kaya ni o ya sa dua na madigi tabu meda “qarava, ka vakalougatataka, ka vakarautaka na veivukei.”