Elder Dale G. Renlund

Ena nona kurabuitaka ni sa kacivi ki na Kuoramu ni iApositolo Le Tinikarua, a tekiduru ena masu o Elder Elder Dale G. Renlund vata kei watina, o Ruth, me rau vakadinadinataka ni “Sa lewa na Kalou na ituvatuva oqo.”

Sa vuqa na gauna a dau kerea kina o Elder Renlund na veidusimaki vakaoqo—ni a lewena na Vakaitutu Raraba ni Vitusagavulu, ni a vuniwai ni uto, vakakina ni sa tagane vakawati ka tama. Me vaka na gauna a vuli cakacaka voli vaka-vuniwai mai Maryland, Amerika, a tauvi kenisa ni kato ni gone o watina. Oqo na gauna se qai vula 16 tiko kina o Ashley, na luvedrau yalewa. Ena veisiga dredre vakaoqori, a vakalesui mai kina na yaloi Elder Renlund me volekata na Turaga ena gauna a vakavinavinakataka kina o Ruth na Turaga ena masu me baleta na nodratou sa vauci oti e valetabu.

A vakayagataka nona gauna taucoko o Elder Renlund ena qaravi ni uto, ka vakabulai ira era tuvaki ca tu na utodra. E raica nodra mate e vuqa na tamata tauvimate. Ia ni oti nona mate e dua na tamata o Chad, a voroki sara vakaca na yalona vakavuniwai daurarawa ena gauna rau sa mai tomani koya ena rumu ni leqa tubukoso na itubutubu nei Chad. Ena gauna o ya a raici Chad mai na matadrau na itubutubu.

Ena ka oqo, a kaya o Elder Renlund, “Meda na veiqaravi vakavinaka ena Lotu vei ira e so, meda raici ira ena mata vakaitubutubu, ena mata ni Tamada Vakalomalagi. Ena gauna oqori eda na qai kila dina kina na ibalebale ni bibi ni yalo ni tamata” (tabana e 94).

Na bula vakacauravou nei Elder Renlund kei na veiqaravi ena Lotu a vukea talega nona vakarautaki me dau raici ira na tamata mai na mata ni Turaga ka kila vinaka na veimataqali lewe ni Lotu.

A sucu o Dale Renlund ena ka 13 ni Noveba, 1952, mai vei rau e dua na itubutubu mai Suwiteni rau a toki mai ki Utah me rau vauci ena valetabu. Ni se cauravou lailai o Dale, a toki na nona matavuvale ki Finlad ka lesu tale mai ki Suwiteni. A qai lesu tale ki Utah kei na nona matavuvale ni oti e tolu na yabaki. Ni sa yabaki 19 a kacivi me laki kaulotu tudei ki Suwiteni.

Ena 2009 a kacivi o Elder Renlund me laki Vakaitutu Raraba ena Vitusagavulu. Na isevu ni nona ilesilesi o ya ena Mataveiliutaki ni iWasewase na Africa Southeast. A mai vakacegu o Elder Renlund ena nona cakacaka vaka-vuniwai ka parofesa, ia o watina, a kaya,“ a solibula vakalevu cake sara.” A peresitedi tiko o Ruth ena nodratou kabani ni lawa ena gauna a kacivi kina o Elder Renlund ka cegu mai vakakina o Ruth mai na cakacaka o ya. Ia vakatekivu mai na gauna rau a vakamau kina ena 1977, a kaya o Renlund, ni o watina sa dau “tu kece kina” ka sa ivurevure ni kaukauwa qaqa ki vua.

Mai Aferika, rau a vakavulici o Elder kei Sister Renlund “mai vei ira na Yalododonu ena veika e yaga bibi dina.” Dua na gauna, mai na Democratic Republic of Congo, a taroga o Elder Renlund vei ira na lewenilotu na veika cava era sa bolei tiko kina. E nanuma lesu o koya ni oti na veivakatarogi, “a tucake e dua na kena turaga ka kaya, ‘Elder Renlund, e rawa vakacava me tu na neimami bolebole? Sa tu vei keimami na kosipeli i Jisu Karisito.’” E nanuma kina o Elder Renlund: “Keirau gadreva vakaveiwatini me keirau vakataki ira na Yalododonu mai Kananga. … E vaka ni sega tu vei ira na ka, ia sa tu vei ira na ka kecega.”

Ni tini nona isevu ni vosa vaka-Apositolo, a vakadinadinataka o Elder Renlund: “Ena yaloqu taucoko, au vinakata meu sa tisaipeli yalodina i Jisu Karisito. Au lomani Koya. Au taleitaki Koya. Au sa vakadinadinataka ni sa bula dina tiko o Koya. Au vakadinadinataka ni sai Koya na iLumuti, na Mesaia” (tabana 94).