Elder Gerrit W. Gong

O Elder Gerrit W. Gong, ka sa mai kacivi oqo ki na Mataveiliutaki ni Vitusagavulu, a nanuma lesu na nona a vakauqeti ni se kaulotu tiko mai Taiwan.

A gole mai e dua na dauvakatataro ki na soqoni ni sakaramede. “A vakauqeti na yaloqu meu vola vua e dua na itukutuku lekaleka ena vosa vaka-Morse ka vakatoka oqo, ‘Kidavaki kemuni ki na soqoni ni sakaramede. Marau niu raici kemuni!’”

O koya na dauvakatataro oqo e opareita ni retio ka marautaka sara nona ciqoma na itukutuku o ya. “Au kurabui ni dua na ka au a vulica ena vica na yabaki sa oti a rawa me vukei au … meu vukea e dua ena sala digitaki vaka o ya,” e kaya o Elder Gong.

Na vuli kei na vukei ira yani na tamata sa ivakarau tudei tu nei Elder Gong ni se cauravou, ena nona vulica na vosa vaka-Morse ni se Sikauti Cauravou tiko kina. Ena 1977 a taura na nona diqiri ni arts ena Asian Studies vata kei na Vuli Univesiti mai na Brigham Young Univesiti, ka taura na nona diqiri cecere ni filosofi, kei na 1981 a taura kina na nona PhD ni veiwekani vakaveimatanitu mai na Oxford Univesiti.

A veiqaravi mai o Elder Gong ena vica na veikacivi ni Lotu, oka kina na matabose e cake, iliuliu ni ilawalawa ni bete levu, peresitedi ni Matawilivola ni Sigatabu, qasenivuli ni semineri, bisopi, peresitedi ni kaulotu ni iteki, peresitedi ni iteki, ka Vitusagavulu ni iWasewase. Ena gauna sa kacivi kina me Vakaitutu Raraba ena Vitusagavulu ena 2010, a veiqaravi tiko vaka-lewe ni Ka Lima ni Kuoramu ni Vitusagavulu ena iWasewase o Utah South.

Ena 1985 a ivukevuke digitaki tiko o Elder Gong vei karua ni sekeriteri ni vanua ena Tabana ni Vanua kei Amerika, kei na 1987 a cakacaka vaka-ivukevuke digitaki vua na mata ni Amerika e Beijing, Jaina. Mai na 1989 ki na 2001 a veiqaravi ena vica na itutu ena Center for Strategic kei na International Studies e Washington, D.C.

A sucu o Gerrit W. Gong e Redwood City, Calfornia, Amerika ena 1953. O koya kei watina, o Susan Lindsay Gong, e rau itubutubu ni va na gone ka tolu na makubudrau. Rau a toki na tubui Elder Gong ki Amerika mai Jaina. Sa dikeva lesu o koya na nona kawa ki na 33 na itabatamata kivei First Dragon Gong, sucu ena a.d. 837 ena ceva kei Jaina ena gauna taumada vakatui nei Tang.