Ngaahi Fakakaukau Maʻá e Efiafi Fakafāmili ʻi ʻApí
ʻOku ʻi he makasini ko ʻení ha ngaahi fakamatala mo e ngaahi ʻekitivitī ʻe lava ke fakaʻaongaʻi ʻi he efiafi fakafāmili ʻi ʻapí. Ko ha sīpinga ʻeni ʻe ua.
“Fānau Īkí mo e Sākalamēnití,” peesi 16: Hili homou lau ko e ngaahi mātuʻa ʻa e fakamatalá ni, te mou lava ʻo aleaʻi ha ngaahi founga ke akoʻi ʻaki homou fānau kei talavoú fekauʻaki mo hono mahuʻinga ʻo e sākalamēnití mo e ngaahi fuakava te nau fakahoko ʻi ha ʻaho ʻi he papitaisó. Te mou lava ʻo fakaʻaongaʻi e ongo lotu ʻo e sākalamēnití (maʻu ʻi he Tokāteline mo e Ngaahi Fuakava 20:77, 79) ke akoʻi fekauʻaki mo e ngaahi fuakava ʻoku tau fai ʻi he papitaisó mo e founga ʻoku fakaʻatā ai ʻe heʻetau maʻu ʻa e sākalamēnití ʻi he Sāpate kotoá ke fakafoʻou ʻa e ngaahi fuakava ko iá. Te ke lava foki ʻo maʻu ha ngaahi fakakaukau ke tokoni ki hoʻo fānau kei īkí ke nau tokanga taha ki he Fakamoʻuí lolotonga ʻa e sākalamēnití, hangē ko hano faʻu ha kiʻi tohi fakatātā faingofua ʻoku fakafonu ʻaki e ngaahi ʻīmisi ʻo e Fakamoʻuí.
“Ko Ha Founga ki he Akó,” peesi 62: Kapau ʻoku ʻi ai haʻo fānau lalahi ange ʻoku nau ako ʻa e folofolá ʻiate kinautolu pē, fakakaukau ke lau fakataha mo kinautolu ʻa e fakamatalá ni pea fakaafeʻi ke nau ʻahiʻahi ʻa e ngaahi fakakaukau mei he fakamatalá. Te ke lava ʻo ʻai e mēmipa kotoa ʻo e fāmilí ke nau faʻu ha tohinoa ako fakataautaha pea fokotuʻu ha ngaahi taumuʻa ke tohi maʻu pē ai. ʻE lava ʻa e kau mēmipa ʻo e fāmilí ke vahevahe tauʻatāina ʻenau ngaahi fakakaukaú mo e ongó mei heʻenau tohinoá ʻi he ngaahi efiafi fakafāmili ʻi ʻapi ʻi he kahaʻú.