Ko e Ngaahi Lea Fakaepalōfita ʻi ha Feituʻu Taʻeʻamanekina

ʻĪmisi

abandoned Church magazines

Tā fakatātā ʻe Dan Burr; lauʻi tā ne ʻomi ʻe he tokotaha faʻu tohí

Naʻe hoko e ʻaho naʻe liʻaki ai ʻe he uaifi ʻo ʻOsikaá ia mo ʻene ongo kiʻi fānau īkí ko e taha ʻo e ngaahi ʻaho faingataʻa taha ʻo ʻene moʻuí. Naʻe lahi ha ngaahi fili naʻe fie maʻu ke fai. Naʻá ne fekumi lahi ki ha ngāue, pea te ne fie maʻu he taimí ni ha feituʻu foʻou ke nofo ai. Naʻe hangē kiate ia kuo fakaʻauha ʻene moʻuí. Naʻá ne fakakaukau ke ne holomui ā, pea naʻá ne mei fai ia ka ne taʻeʻoua ʻene ongo kiʻi fānau fakaʻofoʻofá.

Naʻe ʻikai lahi ha ngaahi ʻapi nofo totongi ʻi Seni Huani, ʻĀsenitina, ne feʻunga mo e ivi fakapaʻanga ʻo ʻOsikaá. Ka naʻe ʻi ai ha kiʻi ʻapi siʻisiʻi ʻi ha tūkui ʻapi malu ne toki mavahe pē mei ai ha kau tangata kei talavou, ko ia naʻe totongi leva ia ʻe ʻOsikā peá ne teuteu ke kamata foʻou mo ʻene fānaú.

Naʻe lī takai ha ngaahi makasini mo ha ngaahi tohi ʻi he faliki honau ʻapi foʻoú, pea ʻi he hili e ngāue ʻa ʻOsikā he ʻahó kakato, ʻi hono fakamaʻa mo fakamaau e falé, naʻá ne tangutu hifo ʻo vakai atu ki ha taha ʻo e ngaahi makasiní. Naʻe hangē ne toʻoa hono lotó ʻi he takafí. Naʻe ʻi ai ha lauʻi tā ʻo ha tangata matuʻotuʻa ʻokú ne tuʻu ʻi ha taua ʻo lea ki he kakaí ʻi lalo hifo he foʻi lea, Liahoná. Naʻe fakamanatu ange ʻe he tangatá kiate ia ha ngaahi tā ʻo ha kau palōfita he tohi tapú.

Naʻe fakaava hake ʻe ʻOsikā e makasiní peá ne kamata lau leva, “ʻOku tau ‘ilo kotoa pē ‘oku totonu ke tau fakahā ki he kakai ‘oku tau ‘ofa aí, ‘oku tau ‘ofa ‘iate kinautolu. Ka ‘oku ‘ikai ke hā maʻu pē ‘i he meʻa ‘oku tau faí ‘a e meʻa ‘oku tau ‘iloʻí.”¹ Naʻe fakakaukau ʻa ʻOsikā ki he ngaahi lea mālohi kuó ne faʻa toutou lea ʻaki mo hono uaifí. Naʻá ne loto ke akoʻi ʻene fānaú ke nau toe lelei ange ai. Naʻe hoko atu hono lau ʻe ʻOsikā ʻa e makasiní, pea kamata ke ne ongoʻi e tupulaki ha ʻamanaki lelei ʻiate ia. Kimuʻa pea ʻosi ʻa e uiké, kuó ne lau ʻa e fakamatala kotoa pē peá ne fie maʻu ke toe ʻilo lahi ange.

Hili ha māhina ʻe taha mei ai ne lue hake ha ongo faifekau ʻi he kaungāʻapi ʻo ʻOsikaá. Naʻe fakafetaulaki atu ʻa ʻOsikā kiate kinaua peá ne ʻeke ange pe ko e ongo faifekau kinaua ʻo e Siasí pea ʻe fiha nai ke ne maʻu ha ngaahi makasini faka-Siasi lahi ange. Naʻe talaange ʻe he ongo faifekaú kiate ia ʻe feʻunga mo ha miniti pē ʻe 20 ʻo hono taimí.

ʻI he ʻaho hono hokó naʻe ʻaʻahi atu ai ʻa e ongo faifekaú kia ʻOsikā ʻi hono ʻapí. Naʻe vahevahe ange ʻe ʻOsikā kiate kinaua ʻene hiki foʻou maí ʻo maʻu ha ngaahi tohi, makasini mo e tohi tufa motuʻa ʻo ne ʻilo ai ʻo kau ki he Siasí. Naʻá ne pehē ko e fuofua fakamatala naʻá ne laú naʻe kaunga tonu ia kiate ia ʻi he taimi ko iá. Naʻá ne ʻosi ʻiloʻi e mahuʻinga ʻo e fāmilí peá ne loto ke ʻilo lahi ange ʻo kau ki he efiafi fakafāmili ʻi ʻapí mo e lotu fakafāmilí. Naʻá ne talaange ki he ongo faifekaú ʻa e ngaahi meʻa kehe naʻá ne ʻilo fekauʻaki mo e Siasí, ʻo kau ai ʻa Siosefa Sāmita pea mo hono Fakafoki mai ʻo e ongoongoleleí.

Naʻá ne sio hangatonu ki he fofonga ʻo e ongo faifekaú peá ne lea ʻaki e ngaahi kupuʻi lea ʻoku ʻikai faʻa tatali e faifekau kotoa pē ke fanongo ki aí: “ʻOku ou tui ko Siosefa Sāmitá ko ha palōfita ia ʻa e ʻOtuá.” Naʻe fakaafeʻi ia ʻe he ongo faifekaú ke ne papitaiso, pea naʻe tali loʻimataʻia ia ʻe ʻOsikā. Hili ha ngaahi uike siʻi mei ai, naʻe papitaiso ʻa ʻOsikā Kasitilo pea fakamaʻu ko ha mēmipa ʻo e Siasí.

Naʻe teuteuʻi ʻe he ʻEikí ʻa ʻOsikā, pea naʻe fakatomala hono laumālié mo mateuteu ke ako mo tupulaki. ʻI he ʻaho fehikitaki fakangalongataʻa ko iá, naʻe ongo ki he loto ʻo ʻOsikaá ʻa e laumālie ʻo e ngaahi pōpoaki ʻi he makasini Liahona ʻo e konifelenisi lahí. Naʻe ʻikai ʻilo ʻe he tokotaha haʻana ʻa e ʻapí kimuʻá, ʻa e ʻaonga ʻo ʻene liʻaki mai ha ngaahi makasini ʻe niʻihi ʻa e Siasí, ka naʻe hoko ʻa e ngaahi pōpoaki ʻo e ongoongoleleí ʻi he ngaahi makasini ko iá ko ha meʻangāue fakafaifekau mahuʻinga. ʻI hono takiekina ia ki he ngaahi moʻoni naʻá ne fekumi ki aí, naʻa nau liliu e moʻui ʻa ʻOsikaá ʻo taʻe ngata. ◼