Mga Miting sa Ikaduha ug Ikatulong Domiggo

Hangyoa ang mga sakop sa inyong korum o Relief Society sa paghunahuna kon sa unsang paagi ang ilang mga kinabuhi naimpluwensyahan alang sa kaayohan pinaagi sa usa ka matarung ug matinud-anon nga babaye. Ikonsiderar ang pagdapit og pipila ka mga miyembro sa pagpaambit kon sa unsang paagi kini nga babaye naghulagway og usa o daghan pa nga mga kinaiya sa matarung nga mga babaye nga gilatid diha sa mensahe ni Sister Eubank. Unsa ang atong makat-unan gikan ni Sister Eubank kon sa unsang paagi kita mahimong “mahinungdanong kusog sa gidaghanon ug sa espirituhanong pagtubo sa Simbahan sa katapusang mga adlaw”?

Kini nga mensahe makatabang sa mga miyembro nga mibati nga nahimulag gikan sa Langitnong Amahan o gikan niadtong naglibut kanila. Unsa ang makatabang niadtong imong gitudloan nga makasabut kon unsa ang kal-ang? Tingali mahimo kang magdala og mga litrato sa lain-laing matang sa mga kal-ang. Giunsa pagpasabut ni Sister Marriott ang usa ka kal-ang? Unsay makahimo sa mga kal-ang diha sa atong mga relasyon sa Dios ug sa uban? Dapita ang mga miyembro sa pagsiksik sa mensahe ni Sister Marriott alang sa mga sugyot kon unsay atong mahimo sa pag-ayo sa mga kal-ang sa atong kinabuhi. Hatagi ang mga miyembro og panahon sa pagsulat kon unsay giaghat sa Espiritu nga ilang buhaton aron mas mapaduol sa Dios ug sa uban.

Unsa nga mga panalangin ang modagayday sa atong kinabuhi kon atong masabtan ang atong balaan nga pagkatawo? Aron matubag kini nga pangutana, ang mga sakop sa inyong korum o Relief Society mahimong dungan nga moribyu sa mga istorya ni Mariama, Renu ug Taiana diha sa mensahe ni Sister Jones. Unsa nga tambag ang gihatag ni Sister Jones sa pagtabang kanato sa “paghinumdom ug pagdawat sa atong balaang pagkatawo”? Dapita ang mga miyembro sa pagpangita ug sa paghisgot og tudling sa kasulatan o usa ka kinutlo gikan sa mensahe ni Sister Jones nga makatabang nila nga makasabut sa ilang tinuod nga bili ngadto sa Dios. Dapita sila sa pagpaambit og usa niini nga mga kasulatan o mga kinutlo ngadto sa usa ka tawo nga nagkinahanglan og pahinumdom sa iyang balaanong bili.

Usa ka paagi sa pagribyu sa mensahe ni Presidente Uchtdorf mao ang pagbahin-bahin sa korum o Relief Society ngadto sa gagmay nga mga grupo. Mahimo nimong i-assign ang matag grupo sa pagbasa mahitungod sa usa sa managsuong babaye diha sa mensahe ni Presidente Uchtdorf. Ang matag grupo mahimong mosulat ngadto niana nga igsoong babaye nga nag-summarize sa iyang tambag ug mopaambit ngadto sa ubang grupo kon unsay ilang gisulat. Unsay atong mahimo aron mas mahimong sama sa ikatulo nga igsoong babaye? Unsaon nato sa paghimo sa atong korum o Relief Society nga usa ka “luwas nga panimalay” alang niadtong nanglimbasug?

Unsaon ninyo pagtabang niadtong inyong gitudloan sa pagkahibalo kon sa unsang paagi ang Dios naggamit kanila sa pagpanalangin sa uban? Mahimo nimo silang dapiton sa pagribyu sa seksyon sa mensahe ni Presidente Uchtdorf nga giulohan og “Ang Dios Mogamit Kaninyo,” nga mangita sa mga saad nga gihimo ngadto niadtong naningkamot sa pagserbisyo diha sa gingharian sa Dios bisan pa sa ilang mga kahuyang. Ang pagbasa niini nga mensahe makapahinumdom usab sa mga miyembro sa mga kasinatian nga mahimo nilang mapaambit diin ang Dios migamit kanila sa pagpanalangin sa uban—o sa dihang migamit Siya sa uban aron sa pagpanalangin kanila. Hatagi ang mga miyembro og panahon sa pagpamalandong sa unsay ilang gibati nga angay nga buhaton tungod niini nga diskusyon.

Usa ka paagi sa pagsugod og diskusyon bahin sa mensahe ni Sister Oscarson mao ang paghatag sa tanan og usa ka piraso nga papel nga adunay nasulat sa ibabaw nga “Kinsa ang nagkinahanglan kanako karon?”. Ang mga sakop sa inyong Relief Society o korum makagahin og pipila ka minuto sa pagpamalandong ug paglista og mga tubag niini nga pangutana. Dayon mahimo nilang siksikon ang mensahe ni Sister Oscarson alang sa mga ideya kon unsaon nila sa pagserbisyo ang mga tawo diha sa ilang lista—o modugang og mga ngalan kon gidasig. Tingali ang pipila mahimong mopaambit sa unsay ilang nakat-unan.

Sa unsang paagi ang mga sakop sa inyong korum, grupo, o Relief Society mosanong sa pagdapit ni Elder Oaks nga “magtudlo [ug] magpuyo sumala sa” pamahayag kabahin sa pamilya, diha sa panimalay, sa komunidad, ug sa simbahan? Dapita sila sa pagpaambit og mga ideya sa usag usa. Tingali makatabang usab ang pagsiksik sa mensahe alang sa pipila ka doktrinal nga mga pamahayag gikan sa pamahayag kabahin sa pamilya. Sa unsang paagi kini nga mga pamahayag makatabang kanato sa pagtubag sa “kasamtangang mga hagit sa pamilya”? Ang seksyon IV sa mensahe ni Elder Oaks naglangkob og pipila ka mga ehemplo sa ingon nga mga pamahayag.

Aniay pipila ka mga pangutana nga mahimong timan-an sa mga sakop sa Relief Society ug korum samtang magribyu sila sa mensahe ni Elder Christofferson: Unsa man ang pagkabalaan? Unsaon nato sa pagtinguha ang pagkabalaan? Sa unsang paagi ang pag-ambit sa sakrament makatabang kanato sa atong mga paningkamot? Ang mga miyembro mahimong mopaambit og mga pulong gikan sa mensahe ni Elder Christofferson nga makatabang sa pagtubag niini nga mga pangutana. Unsaon nato pagtabang ang usag usa isip “isigka-Santos” sa atong mga paningkamot nga mahimong mas balaan?

Ang pipila niadtong imong gitudloan tingali mobati nga sila wala mahaum kon hisgutan na ang pagsunod sa mga pagtulun-an sa Manluluwas. Unsa ang gitudlo ni Elder Holland nga makahupay ug makadasig niadtong tingali mobati niini nga paagi? Mahimo nimong dapiton ang mga sakop sa Relief Society o korum sa pagpangita og usa ka butang niini nga mensahe nga mahimo nilang ipaambit sa usa ka tawo nga nanglimbasug aron mobati nga “igo ang kamaayo” nila. O mahimo silang makakita og usa ka butang diha sa mensahe nga nagdasig kanila nga mobati og “mas dakong gugma ug pagdayeg alang [kang Jesukristo] ug mas dakong tinguha nga mahimong sama Kaniya.”

Aduna bay sakop sa inyong korum o Relief Society nga nakasinati og eklipse sa adlaw [solar eclipse]? Kon mao, mahimo nimong dapiton ang usa kanila nga ipasabut ang pasumbingay nga gipaambit ni Elder Stevenson mahitungod sa “espiritwal nga eklipse.” Unsa nga mga babag ang “nagsalipod sa gidak-on, kasiga, ug kainit sa kahayag ni Jesukristo ug sa Iyang ebanghelyo”? Sa unsang paagi ang social media makabalda kanato gikan sa “kanindot, kainit, ug langitnong kahayag sa ebanghelyo”? Unsaon nato sa pagsul-ob sa “antipara sa ebanghelyo” nga manalipod kanato gikan sa espirituhanong pagkabuta? Unsa ang gitudlo kanato sa pasumbingay ni Elder Stevenson mahitungod sa pagmentinar og panglantaw sa ebanghelyo?

Ang mensahe ni Elder Cook nagpahinumdom kanato sa kaimportante sa pagpaningkamot nga magmapainubsanon sa lain-laing mga paagi. Usa ka paagi sa paghisgot sa unsay iyang gitudlo mao ang pagbahin sa mga miyembro diha sa duha ka grupo. Hangyoa ang usa ka grupo sa pagpangita og mga sugyot diha sa mensahe ni Elder Cook nga makatabang kanato sa pagpalambo og pagkamapainubsanon, ug ang laing grupo sa pagpangita og mga paagi nga ang mga tawo nagpakita og garbo. Dapita ang matag grupo sa pagpaambit sa ilang paghulagway ngadto sa laing grupo. Ang mga miyembro mahimo usab nga mopaambit og mga paagi nga makapakita sila og dugang nga “padayon nga pagkamapainubsanon” diha sa ilang kinabuhi ug ikonsiderar kon sa unsang paagi kini nga pagkamapainubsanon makatabang kanila nga mangandam sa pagsugat sa Dios.

Aron moawhag og diskusyon kabahin sa mensahe ni Elder Rasband, tingali makatabang ang pagdapit og pipila ka mga miyembro sa pagdala og sundanan sa pagtahi, usa ka blueprint, o resipe ug hisguti kon nganong makatabang kini. Unsa nga mga ehemplo o pagtulun-an gikan sa mensahe ni Elder Rasband ang nagdasig sa mga miyembro sa pag-ila sa plano sa Dios alang sa ilang mga kinabuhi? Tingali ang mga miyembro sa klase mahimong mopaambit og mga kasinatian diin ilang nakita ang Ginoo nga naggiya sa ilang mga kinabuhi. Unsay ilang nabuhat aron mapakita sa Dios nga ilang “[gihatagan] og bili” ang Iyang direksyon? Nganong importante man ang pag-ila sa “balaan nga plano” sa Dios?

Si Presidente Nelson midapit sa mga miyembro sa paghunahuna mahitungod sa tulo ka mga pangutana: (1) “Unsa kaha ang inyong kinabuhi kon wala ang Basahon ni Mormon?” (2) “Unsa kaha unta ang wala ninyo mahibaloi?” (3) “Unsa kaha unta ang wala ninyo maangkon?” Dapita ang mga sakop sa inyong korum, grupo, o Relief Society sa pagpamalandong niini nga mga pangutana ug sa pagpaambit kon unsaon nila kini sa pagtubag. Unsa ang ilang nakita niini nga mensahe nga nagdasig kanila nga ipakabililhon ang Basahon ni Mormon labaw pa kay sa “diamante o mga ruby”?

Unsaon ninyo sa pagtabang ang mga sakop sa inyong korum o Relief Society nga makasabut kon sa unsang paagi ang priesthood nagtabang sa paghimo sa mga panalangin sa Pag-ula sa Manluluwas nga maanaa kanila? Mahimo nimong isulat kining duha ka mga ulohan diha sa pisara: “Nganong gikinahanglan nato ang Pag-ula ni Jesukristo” ug “Sa unsang paagi ang priesthood ‘naghatud’ sa mga panalangin sa Pag-ula ngari kanato.” Dayon dapita ang mga miyembro sa pagsiksik sa mensahe ni Elder Renlund, nga mangita og mga pulong nga masulat sa ubos sa matag ulohan. Sa unsang paagi ang priesthood ug ang mga ordinansa niini makatabang sa pagtuman sa mga katuyoan sa Langitnong Amahan para sa Iyang mga anak?

Dapita ang mga miyembro sa pagsiksik sa mensahe ni Presidente Uchtdorf ug sa pagtino kon sa unsang paagi ang pagkaanaa o pagkawalay balaang kahayag makaapekto sa atong kinabuhi. Mahimo nimong dapiton ang mga miyembro sa pagtuon sa pipila sa mga kasulatan nga gihisgutan ni Presidente Uchtdorf ug sa pag-ila sa mga kamatuoran nga may kalabutan sa espirituhanong kahayag. Unsa ang gitudlo kanato sa pasumbingay mahitungod sa eklipse kabahin sa tahas sa kabubut-on sa pagtinguha og espirituhanong kahayag? Unsa ang atong mahimo sa pagpaambit sa balaan nga kahayag ni Jesukristo ngadto sa uban, ilabi na sa atong mga pamilya ug sa “atong kabatan-onan, nga nangita og kahayag”?

Dapita ang mga sakop sa inyong korum o mga sakop sa Relief Society sa pagpaambit og mga kasinatian diin gikinahanglan nila nga makapalambo og hugot nga pagtuo nga ang ilang calling o ang calling sa laing tawo nagagikan sa Dios. Giunsa nila sa pagpakita ang ilang hugot nga pagtuo? Giunsa nila sa pagkasayud nga ang calling gikan sa Dios? Dapita ang mga miyembro sa pagsiksik sa mensahe ni Presidente Eyring ug pag-ila sa mga kamatuoran nga iyang nakat-unan gikan sa personal nga kasinatian nga makatabang kanato sa pagsalig ug pagmapailubon sa atong kaugalingon ug sa uban kinsa gitawag sa Ginoo.

Ang mensahe ni Sister Bingham makatabang sa mga sakop sa inyong Relief Society o korum nga makasabut unsaon sa pagkakaplag og kalipay, bisan pa sa mga kalisdanan sa kinabuhi, kon kita moduol ngadto kang Kristo. Usa ka paagi sa paghisgot sa iyang mensahe tingali mao ang pagdrowing og dalan diha sa pisara padulong sa pulong nga kalipay. Dapita ang pipila ka mga miyembro sa pagsulat diha sa dalan og usa ka sugyot gikan sa mensahe ni Sister Bingham nga mosangput ngadto sa tinuod nga kalipay. Awhaga ang mga miyembro sa paghunahuna og mga paagi nga ilang mabuhat ang tambag ni Sister Bingham. Dapita ang pipila ka mga miyembro sa pagpaambit sa ilang mga hunahuna.

Aron matabangan ang mga sakop sa inyong Relief Society o korum sa paghisgot sa mensahe ni Elder Bednar, mahimo ka nga mobutang og mga litrato diha sa pisara nga nagrepresentar sa adlaw nga Igpapahulay, sa templo, ug sa atong mga panimalay. Dapita ang mga miyembro sa pagbasa sa tukma nga mga seksyon sa mensahe ni Elder Bednar ug isulat sa pisara kon sa unsang paagi ang adlaw nga Igpapahulay, ang templo, ug ang atong mga panimalay makatabang kanato nga tutukan ang mga saad sa Dios ngari kanato. Unsa nga mga butang sa atong kinabuhi ang tingali mobitad sa atong pagtagad gikan niini nga mga saad? Unsa nga mga lakang ang atong mabuhat sa pagsiguro nga makahinumdom kita niini?

Ang mensahe ni Presidente Eyring makatabang niadtong imong gitudloan nga makakaplag og kaisug ug hugot nga pagtuo sa pagbuhat og maayo sa kalibutan. Mahimo ka nga modapit og pipila ka mga miyembro sa pag-summarize sa mga ehemplo sa matinud-anon nga mga tawo nga gipaambit ni Presidente Eyring. Unsa ang gitudlo kanato niini nga mga ehemplo kon unsaon sa pagserbisyo sa uban? Unsa ang gisugyot niini nga mga ehemplo kabahin sa mga paagi nga kita makaalagad isip usa ka korum o Relief Society?

Ang laing paagi sa paghisgot niini nga mensahe mao ang pagribyu sa mga panalangin nga nakita ni Presidente Eyring gikan sa pagsunod sa tambag ni Presidente Thomas S. Monson sa pagtuon sa Basahon ni Mormon. Unsa nga mga panalangin ang atong nakita gikan sa pagtuon sa Basahon ni Mormon?

Aron sa pagsugod og diskusyon kabahin sa mensahe ni Elder Ballard, mahimo ka nga modapit og usa ka tawo sa pagpaambit og kasinatian dihang sila adunay destinasyon apan nadiskubrihan nga anaa sila sa sayop nga agianan. Sa unsang paagi ang mga ehemplo nga sama niini may kalabutan sa atong personal nga “malisud nga panaw” balik sa Langitnong Amahan? Ang mga miyembro makahimo dayon sa pagpangita og tambag ug mga pasidaan nga gihatag ni Elder Ballard nga makatabang kanato nga masayud kon nagpadulong ba kita sa hustong direksyon sa atong kinabuhi. Hatagi ang mga miyembro og panahon sa pagpamalandong sa ilang kaugalingon nga mga dalan ug sa paghisgot og mga paagi nga kita makatabang ug makaawhag sa uban sa ilang “malisud nga panaw” balik sa Langitnong Amahan.

Tingali ang mga sakop sa inyong Relief Society o korum mahimong mopaambit og usa ka kasinatian diin ang usa ka mensahe sa kinatibuk-ang komperensya nabati nga labing makahuluganon ngadto kanila. Nganong makahuluganon man kini nga mga mensahe? Unsa ang gitudlo ni Elder Andersen mahitungod sa kamahinungdanon sa mga mensahe sa kinatibuk-ang komperensya ug sa paningkamot ug proseso nga nalakip sa pag-andam niini? Sa unsang paagi kini nga kahibalo makaapekto sa kadinalian diin kita magtuon ug mosunod niini nga mga pulong? Ikonsiderar ang paghimo og lista sa mga pagdapit gikan sa pinakabag-o nga komperensya. Unsay atong nahimo sa pagsunod niini nga mga pagdapit?