Mga Propeta, Mga Apostoles Nangalagad sa Tibuok Kalibutan

Ang mga propeta ug mga apostoles gitawag isip “talagsaon nga mga saksi sa ngalan ni Kristo sa tibuok nga kalibutan” (D&P 107:23). Ania ang pipila sa ilang mga kalihokan sukad sa kinatibuk-ang komperensya sa Abril.

Si Presidente Thomas S. Monson hilum nga misaulog sa iyang ika-90 nga adlawng natawhan sa Utah, USA, niadtong Agosto 21. Iyang gibalik og sulti ang usa ka pangandoy sa birthday nga gipahayag niya kaniadto, nga ang pinakanindot nga gasa nga iyang madawat mao nga ang mga tawo “[mangita] og tawo kinsa anaa sa kalisud o nagsakit o nag-inusara ug [mag]buhat og usa ka butang alang kanila.”

Sa Hamilton, New Zealand, si Presidente Henry B. Eyring mipahinungod sa mga pasilidad sa Temple View, nga kaniadto maoy campus sa Church College sa New Zealand. Human sa Hurricane Irma, mibisita siya sa Puerto Rico, Saint Thomas, ug sa mga boluntaryo sa Simbahan nga mitabang sa mga paningkamot sa pagpanglimpyo sa Florida, USA.

Si Presidente Dieter F. Uchtdorf mibisita sa Texas, USA, ug nakasaksi sa mga pundok sa mga Santos sa Ulahing mga Adlaw sa Houston nga nagtrabaho uban sa ilang mga silingan human sa Hurricane Harvey, nag-ingon nga ang kinaiya nga “motabang-kutob-sa-akong-mahimo” komon sa mga Santos sa Ulahing mga Adlaw sa tibuok kalibutan.

Si Presidente Russell M. Nelson mipresentar sa gobernador sa Nebraska, USA, og usa ka volume sa family history, mibisita sa mga lider ug mga misyonaryo sa New York, USA, ug misulti sa mga estudyante sa institute sa Utah nga ang Biblia “puno sa mga panagna mahitungod … sa Pagpahiuli.”

Human mobisita sa mga miyembro sa Japan ug Korea, si Elder Dallin H. Oaks miingon, “Ang Ginoo mahunahunaon sa Iyang mga anak. Nasayud Siya sa ilang mga kahimtang ug mga kabalaka ug manggihatagon sa Iyang gugma.” Sa usa ka kalihokan nga Face to Face sa Korea, mitubag siya sa mga pangutana gikan sa kabatan-onan. Nakigkita siya sa ministro nga maoy gisangunan sa 2020 Tokyo Olympics. Ug sumala sa hangyo sa presidente sa Peru, si Elder Oaks nakigkita aron sa pagdawat sa pasalamat sa presidente alang sa tabang sa Simbahan panahon sa mga baha.

Sa Utah, si Elder Ballard miawhag sa mga young single adult sa pagbalaan sa Igpapahulay isip “usa ka talagsaon ug mahimayaon nga panahon” ug sa pagtuon sa sukaranang mga baruganan ug mga doktrina sa Simbahan. Gisultihan niya ang mga temple worker nga ang mga templo nga gitukod karon gamiton usab panahon sa Milenyum. Uban ni Elder Ronald A. Rasband, mibisita siya sa Texas sa pag-awhag sa mga boluntaryo nga nanglimpyo sa mga kadaut sa bagyo ug lunop.

Si Elder Robert D. Hales midawat sa 2017 Pioneers of Progress President’s Award gikan sa usa ka organisasyon sa komunidad sa Utah. “Ang makahimo sa pagtabang sa usag usa, pagbayaw sa usag usa, paglig-on sa usag usa mao ang labing mahinungdanong hiyas, sa akong hunahuna, sa pagkahimong pioneer,” siya miingon.

Sa Russia ug Ukraine, si Elder Jeffrey R. Holland mitudlo nga ang kinabuhi gituyo nga adunay mga pagsulay, apan ang ebanghelyo naghatag og panglantaw, paglaum, ug pagdasig. Sa Second Windsor Conference on Religious Persecution [Ikaduhang Komperensya sa Windsor kalabut sa Relihiyusong Pagpanggukod] didto sa England, miingon siya nga ang hugot nga pagtuo nakatabang og daghan nga maulian gikan sa refugee nga kahimtang ug makatampo ngadto sa katilingban. Human sa komperensya, mihatag siya og tambag sa mga miyembro sa Simbahan, mga presidente sa misyon, ug mga misyonaryo sa Portugal ug Spain.

Si Elder David A. Bednar mibisita og tulo ka mga nasud sa West Africa nga wala pa sukad mabisitahi sa usa ka Apostol: Senegal, diin mihalad siya og pagpahinungod nga pag-ampo; Guinea; ug Mali. Nakigkita usab siya sa mga miyembro sa Nigeria ug Ghana. Atol sa usa ka tibuok kalibutan nga debosyonal nga nagagikan sa North Carolina, USA, giawhag niya ang mga young adult nga mahimong “lig-on nga sumpay” sa ilang mahangturong kadena sa pamilya.

Si Elder Quentin L. Cook nakigkita sa mga miyembro ug mga misyonaryo sa Taiwan, Hong Kong, India, ug Thailand, mitimaan nga “ang mga miyembro mahinamon kabahin sa Simbahan, nga nakatutok sa templo ug misyonaryo nga buhat.” Sa New Jersey, USA, namulong siya sa Seymour Institute Seminar on Religious Freedom [Seminar sa Seymour Institute kalabut sa Relihiyusong Kagawasan]. “Kinahanglang mopadayon kita sa atong nagpadayon ug kritikal nga mga paningkamot sa pagpalambo sa moralidad ug pagpanalipod sa pamilya,” miingon siya. Sa California, USA, giawhag niya ang mga sakop sa law society sa pagmentinar sa pagtuo ug balanse diha sa ilang mga kinabuhi ug sa pagpanalipod sa kagawasan sa relihiyon.

Sa Ecuador ug Colombia, si Elder D. Todd Christofferson mitudlo nga ang pagtuo diha sa Pagkabanhaw ni Kristo mohupay ug molig-on kanato. Sa India, midawat siya og World Peace Prize alang sa Simbahan ug mipresentar og mga kopya sa Basahon ni Mormon sa Nepali ngadto sa presidente ug bise-presidente sa Nepal ug sa Kathmandu Branch.

Mga bulan sa wala pa ang mga bagyo ug mga baha, si Elder Neil L. Andersen mibisita sa Puerto Rico, Haiti, ug sa Dominican Republic, namulong kabahin sa self-reliance, edukasyon, ug pagpangandam sa pagdawat sa mga panalangin sa templo. Sa LDS Family Education Night sa Arizona State University sa Arizona, USA, giawhag niya ang mga Santos sa Ulahing mga Adlaw sa “pag-abli sa atong mga pultahan, mosabut sa mga tinuohan sa uban, [ug] dugang pa nga magkat-on mahitungod kanila.” Si Elder Andersen mimugna sa ika-100 nga stake sa Pilipinas ug mipahinungod sa gipadak-an nga missionary training center sa Manila.

Sa South Africa ug sa Democratic Republic of Congo, si Elder Ronald A. Rasband misulti nga uban sa tulo ka mga templo nga gigamit sa Africa ug dugang lima nga gitukod o gipahibalo na, “ang Ginoo nag-andam sa mga tawo sa Africa sa pagdawat sa tanan Niya nga mga panalangin.”

Si Elder Gary E. Stevenson mibisita sa Vanuatu, Australia, New Zealand, French Polynesia, ug Brigham Young University–Hawaii sa Hawaii, USA. “Samtang kita … motan-aw sa atong mga hagit pinaagi sa panglantaw sa ebanghelyo, makakaplag kita og mga tubag nga makahatag kanato og kalipay ug kamaya,” miingon siya. Nakighimamat siya sa presidente ug prime minister sa Vanuatu ug sa arsobispo sa Papeete, Tahiti.

Si Elder Dale G. Renlund mibisita og lima ka mga nasud niadtong Hunyo: Guatemala, Costa Rica, El Salvador, Nicaragua, ug Honduras, miorganisar sa unang Q’eqchi’ og pinulongan nga stake sa Guatemala ug miapil sa usa ka komperensya kalabut sa relihiyusong kagawasan ug sa usa ka youth conference. Niadtong Agosto, siya ug ang iyang asawa, si Sister Ruth L. Renlund, miapil sa unang Face to Face nga kalihokan nga nagagikan sa Accra, Ghana, ug pagka-Septyembre giawhag niya ang mga estudyante sa Brigham Young University–Idaho sa Idaho, USA, nga mosalig sa doktrina ni Kristo.