Pagtan-aw diha sa usa ka Miting sa Council

Dominggo sa buntag kadto, ug 45 ka mga sister sa Bugambilias Ward sa Guadalajara, Mexico, nanaglingkod diha sa council. Human sa pangbukas nga himno, si Relief Society president Yara Ramirez midapit sa pipila kanila sa pagpaambit og mga kasinatian gikan sa ilang leksyon sa miaging semana.

Human ang mga sister mipaambit sa ilang mga kasinatian sulod sa pipila ka minuto, si Sister Ramirez misulat og usa ka pulong diha sa pisara sa wala pa mobalik og lingkod diha sa sirkulo.

“Pagkahiusa,” miingon kini.

Ubos sa direksyon ni Sister Ramirez, mipakli sila ngadto sa Mosiah 18:21 ug mibasa, “… diin ang ilang mga kasingkasing nabugkos diha sa pagkahiusa ug diha sa gugma sa usag usa.”

“Unsay mabuhat nato isip Relief Society aron magamit kini nga kasulatan?” nangutana siya.

Ang mga sister naghunahuna sa makadiyot. “Ang kabatan-onan dili makaadto sa templo,” ang usa ka sister mipaambit. “Dili igo ang gidaghanon sa hingkod nga mga sister nga makakuyog kanila.”

“Wala ko kahibalo,” miingon ang usa, makita nga nasurprisa. “Kon wala ka kahibalo nga adunay panginahanglan,” nangutana siya, “unsaon nimo sa pagtabang?”

“Mao kana nganong nia ta dinhi,” mitubag si Sister Ramirez. “Adunay mga panginahanglan nga sama niini nga akong nasayran sa ward council nga kitang tanan mahimong makatabang.”

“Nganong dili man ta maghimo og iskedyul sa mga kalihokan?” misugyot ang usa ka tawo. Mas nainteresado na karon ang grupo. “Morag dunay iskedyul ang kabatan-onan diha sa templo usa ka Huwebes matag bulan.”

“Maglisud pud gani ko mismo sa pag-adto sa templo,” miangkon ang usa ka batan-ong inahan diha sa grupo. “Dugay na kaayo nga wala ko kaadto didto, ug morag ang ako rang kaugalingon ang akong gihunahuna. Ganahan kong moadto ug moserbisyo,” miingon siya.

Ang uban miyango sa pag-uyon. Sila usab maglisud sa pagtambong kanunay kutob sa ilang gusto.

Laing batan-ong inahan misugyot nga magbinayloay sila sa pagbantay og bata ug magpuli-puli sa pag-adto sa templo.

Dayon, ang mga sister misugod sa pagpangutana sa usag usa kon asa sila nagpuyo ug kinsa ang nagpuyo nga duol ni kinsa nga batan-on. Gihisgutan nila kon sa unsang paagi sila makapuli-puli sa pagtabang sa kabatan-onan sa pagtambong sa ilang mga kalihokan.

“Nan, gikinahanglan usab nato nga makaila ang usag usa,” miingon ang usa ka tawo. “Kinahanglan nga aduna kitay mga kalihokan!”

Ang mga sister padayon nga mikomentaryo, mitanyag og mga sugyot ug nangutana.

Pagkahuman sa council, si Sister Ramirez mihangyo sa iyang secretary sa pag-summarize sa mga hilisgutan [minutes]. “Unsay gibati ninyong tanan atol sa council?” nangutana siya.

Mitubag sila nga gibati nila nga mas nakahibalo sa mga panginahanglan sa tanan, nga gikinahanglan ang ilang serbisyo, ug nga anaa sila taliwala sa mga higala.

“Base sa unsay atong nasinati karon, unsa nga piho nga mga buhat ang gusto natong tutukan niining bulana isip Relief Society?” nangutana siya.

Isip grupo, midesisyon sila nga magdala sila og bisan unsang pagkaon nga ilang ipaambit [potluck] nianang Dominggo human sa pagsimba, mosugod og dula og volleyball matag Huwebes sa gabii, mohimo og iskedyul sa pag-adto sa templo, ug moplano unsaon sa pagtabang sa kabatan-onan nga makatambong sa mga kalihokan.

“Nakasinati kita og pagkahiusa karon,” mitapos si Sister Ramirez, nagdapit sa matag sister sa paghunahuna og mga paagi nga makaserbisyo siya nianang semanaha. “Ang Espiritu Santo magpadayon sa paghatag kanato og mga pag-aghat kon kita molihok sa tagsa-tagsa ug isip Relief Society. Dapiton ko kamo nga mangandam sa pagpakigbahin sa inyong mga kasinatian sa sunod Dominggo.”