Highlights gikan sa Ika-187 nga Semiannual nga Kinatibuk-ang Komperensya

Sulod sa sobra sa 50 ka tuig, ang makatandog nga personal nga mga istorya ni Presidente Thomas S. Monson ug gamhanang saksi ni Jesukristo nahimong kabahin sa kinatibuk-ang komperensya. Apan tungod sa dili maayong panglawas, sila si Presidente Monson ug Elder Robert D. Hales sa Korum sa Napulog Duha ka mga Apostoles namatikdan nga wala makatambong sa komperensya.

Wala katungha, apan wala hikalimti.

Bisan og si Presidente Monson nagtan-aw didto sa iyang panimalay ug si Elder Hales malinawong namatay sa ospital sa wala pa ang katapusang sesyon, silang duha wala lamang sa among mga hunahuna samtang nag-ampo kami alang kanila, apan ang ilang impluwensya nabati sa tanang mga pakigpulong.

Si Presidente Monson gikutlo sa sobra sa usa ka dosena nga mga mamumulong, lakip ni Presidente Russell M. Nelson (tan-awa sa pahina 60), kinsa mihisgot sa imbitasyon ni Presidente Monson sa miaging komperensya “nga mainampoong magtuon ug mamalandong sa Basahon ni Mormon kada adlaw.”¹

Si Elder Neil L. Andersen, ang panapos nga mamumulong (tan-awa sa pahina 122), mipakigbahin sa pakigpulong ni Elder Hales nga giandam alang sa komperensya apan wala makahimo sa paghatag: “Kon kita mopili nga magbaton og hugot nga pagtuo, andam kita nga mobarug sa presensya sa Dios,” sulat ni Elder Hales. Sa tinuod, si Elder Hales mipili sa hugot nga pagtuo.

Absent, apan wala mawala, si Presidente Monson ug Elder Hales wala sa pulpito, apan nakahimo sila og importante nga bahin sa paghimo sa komperensya nga makahuluganon sa kadaghanan.