Usa ka Bag-ong Direksyon alang sa mga Miting sa Dominggo sa Melchizedek Priesthood ug Relief Society

“Usa ka hagit sa bag-ong kurikulum mao ang pagpugong sa mga tawo nga dili motudlo ‘sa karaang paagi,’” miingon si Bishop Boyd Roberts. “Kinahanglang mohunong kita sa pagpaambit lamang og impormasyon, dili mahimong sagabal, ug tugutan ang Espiritu nga motudlo.”

“Bag-o kini nga paagi sa pagtudlo nga tingali lisud alang sa pipila ka mga tawo,” miingon si Lisa Smith, usa ka presidente sa Relief Society, nga nagpasabut sa Pagtudlo sumala sa Pamaagi sa Manluluwas. “Mao kana nganong importante nga mopakita og maayong mga pamaagi sa pagtudlo ug moawhag sa mga lider nga kanunay motambong sa mga miting sa teacher council uban sa mga magtutudlo,” miingon siya.

Si David Mickelson, usa ka magtutudlo sa high priest group, miingon nga ang mga pulong nga “pagtudlo kamo nga makugihon” diha sa Doktrina ug mga Pakigsaad 88:78 “may kalabutan sa atong pagpangandam daan ug sa atong abilidad nga makugihong mosunod sa Espiritu samtang nagtudlo kita. Kon motudlo kita nga makugihon, ang grasya sa Manluluwas magauban kanato ug kita pagatudloan nga mas hingpit. Nagtuo ko nga kana ang hingpit nga paagi sa Ginoo sa pagtudlo. Ang magtutudlo—ang tawo nga nangulo sa diskusyon—kinahanglang andam nga matudloan sa Espiritu.”

Si Adan Bushman, usa ka magtutudlo sa elders quorum, nangandam alang sa mga leksyon pinaagi sa pagribyu sa gipili nga pakigpulong sa kinatibuk-ang komperensya, dayon mainampoong mokonsiderar kon unsa nga mga konsepto ang labing importante alang sa korum. “Aron sa pagtabang sa mga lalaki nga dunay mas dakong panahon sa pagpamalandong,” mipasabut siya, “usa ka email ang ipadala atol sa semana nga nag-ingon, ‘Kini ang pakigpulong nga atong hisgutan ug gusto namo nga imong ikonsiderar ang mosunod nga mga pangutana.’”

“Ang mga Dominggo sa Relief Society dili na responsibilidad sa mga lider lamang,” miingon si Brooke Jensen, usa ka magtatambag sa kapangulohan sa Relief Society. “Ang matag miyembro mohimo og aktibo nga tahas.”

Si Brother Bushman mibati nga ang paglingkod nga naglibut nakahimo og kalainan. “Ganahan ko niini,” miingon siya. “Nakausab kini sa matang sa panag-istoryahanay. Nakausab kini sa ekspektasyon sa mga tawo. Karon mas daghan na ang moapil. Imbis nga duha o tulo ka kaigsoonan ang kasagarang motubag, duna nay bag-ong mga tawo nga mokomentaryo.”

Sa dihang si Rebecca Siebach, usa ka sister sa Relief Society, unang nakadungog kabahin sa bag-ong pagtutok sa mga council, diha-diha dayon nakahunahuna siya sa mga higala kinsa nahimong dili kaayo aktibo. “Nasayud ko sa ilang mga kabalaka,” miingon siya. “Matinuoron silang mipaambit kanako sa ilang mga kabalaka ug mga panlimbasug sa pagsimba, ug naghunahuna ko, kini ang hingpit nga oportunidad sa pagtabang kanila ug pag-ingon, ‘Gikinahanglan kamo namo sa atong council! Palihug dali ug pakig-ambit!’”

“Sa dihang sa katapusan mitingog ko atol sa miting sa council,” miingon si LonaMarie Cook, usa ka magtatambag sa kapangulohan sa Relief Society, “nindot kaayo nga dunay mga tawo nga mikumpirma sa unsay akong gihunahuna ug nga mahimong parte niana nga komunidad.”

“Nagmugna kita og palibut aron ang Espiritu makatudlo ug aron kita maminaw ug makadungog,” miingon si Bishop Roberts. “Ang Espiritu dayon mahimong magtutudlo, nga magpakita kanato kon unsay kinahanglan natong buhaton diha sa atong personal nga kinabuhi, mga pamilya, ug mga calling. Ang atong buhaton isip resulta niadto nga mga pag-aghat mao ang moresulta ngadto sa tinuod nga pagkakabig ug pagserbisyo.”

Si Susan Farr, usa ka presidente sa Relief Society, miingon, “Kini nga pamaagi modasig kanato sa pagbarug ug pagbuhat, dili lamang mobiya gikan sa leksyon nga maghunahuna ‘makapadasig kadto’, apan malimtan ra dayon kini. Ang pagtinambagay sa usag usa makatabang kanato nga makakita nga ang pagkat-on ug ang mga lihok responsibilidad natong tanan—dili lang sa magtutudlo.”

“Samtang atong irekord ang atong mga impresyon ug dayon molihok sumala niini, atong gipakita ang usa ka kausaban sa kasingkasing ug mahimong mas maayo nga mga sulugoon sa Ginoo,” miingon si Susan Mitchell, usa ka magtatambag sa kapangulohan sa Relief Society.

“Ang pagkasayud nga mahimo kamong manubag alang sa usa ka butang ug nga dunay tawo nga mangutana kaninyo kon unsay inyong gibati,” miingon si Sister Smith, “naghimo kaninyong aktibong partisipante sa pagpalambo sa inyong pagpamatuod.”

Si Landen Roundy, usa ka high priest group leader, miingon nga ang pag-email og mugbong mga sulat sa unsay gihisgutan ug giplano “makatabang sa mga miyembro sa pag-ila og mga kasinatian nga aduna sila nianang semanaha nga tingali gusto nilang ipaambit sa mosunod nga Dominggo.”

“Gikan niadto nga mugbong mga sulat,” midugang si Bishop Roberts, “nakita nako ang padayon nga diwa sa pagpaambit ug pagkat-on sa tibuok semana samtang ang mga kaigsoonan maghisgot pinaagi sa email sa dugang nga mga hunahuna ug pagbati, nga naglig-on sa ilang korum.”

“Gusto sa Ginoo nga mabaling ang atong mga kasingkasing ngadto sa usag usa ug mahimo kana kon mag-abut kita nga dunay katuyoan,” miingon si Sister Siebach. “Kining bag-ong kurikulum makatabang kanato nga moila og mga hilisgutan nga makapaikag, mohimo og mga tumong, modangup ngadto sa sakto nga tinubdan alang sa mga tubag, modawat og personal nga pagpadayag, ug malig-on sa usag usa samtang modangup kita sa buhing mga propeta alang sa mga tubag nga atong gikinahanglan sa atong panahon.”