Elder Juan A. Uceda

Samtang naglakaw padulong sa mga guba sa Machu Picchu sa Peru isip batan-ong misyonaryo, si Elder Juan A. Uceda nadakin-as sa pig-ot nga agianan. Nanggunit pag-ayo sa pipila ka mga sanga ug nagbitay og 2000 ka pye (610 m) ibabaw sa suba, hugtanon siyang nag-ampo alang sa tabang. Sayo nianang adlawa nag-ampo siya gikan sa iyang mga ngabil, miingon siya, apan “sa dihang hapit na ako mamatay, nag-ampo ko gikan sa kasingkasing.” Sa dihang hapit na gayud siya mahulog, adunay laing misyonaryo ang mibira kaniya ngadto sa kahilwasan.

Usa sa daghang mga leksyon nga miingon siya nga nakat-unan niya nianang adlawa mao nga “kanunay, kanunay nga mag-ampo ‘sa kinasingkasing, uban sa tinuod nga katuyoan, nga [magpakita og] hugot nga pagtuo kang Kristo’ (Moroni 10:4).”

Si Elder Uceda gipaluyohan isip General Authority Seventy niadtong Abril 3, 2010. Nagserbisyo siya isip Assistant Executive Director sa Missionary Department ug usa ka Area Assistant sa North America Southeast Area sa dihang gitawag siya ngadto sa Kapangulohan sa Seventy niadtong Agosto 1, 2017.

Gikan sa 2010 hangtud 2013 miserbisyo siya isip magtatambag sa South America Northwest Area Presidency, ug gikan sa 2013 hangtud 2016 miserbisyo siya isip Presidente sa South America Northwest Area.

Si Elder Uceda naedukar sa Peru. Mi-enrol siya sa Jose Carlos Mariátegui Institute sa Lima, diin gitun-an niya ang accounting ug public relations. Nagtuon usab siya og business administration sa Centro Andino de G.E. Institute. Migradwar siya sa San Luis Gonzaga University, diin nakadawat siya og bachelor’s degree sa public relations.

Si Elder Uceda mitrabaho sa Church Educational System isip area director sa Peru ug Bolivia. Mibiya siya sa Peru niadtong 2003 aron mobalhin ngadto sa New Jersey, USA, aron motabang sa iyang amahan sa ilang negosyo sa pamilya.

Sukad mipasakop sa Simbahan niadtong 1972, si Elder Uceda nakaserbisyo sa daghang mga calling, lakip ang full-time nga misyonaryo sa Lima Peru mission, stake Sunday School presidency, bishop, high councilor, counselor sa stake presidency, stake president, presidente sa Lima Peru North Mission (1992–95), ug Area Seventy.

Iyang giminyoan si Maria Isabel Bendezu niadtong Marso 1979. Mga ginikanan sila sa lima ka anak.