Tabang sa mga Panahon sa Kalisdanan

Human sa usa ka kusog nga bagyo ug sa grabe nga pagbaha sa Houston, Texas, USA, ang usa ka tigulang nga babaye nakakita sa mga Santos sa Ulahing mga Adlaw nga nagsul-ob og yellow Helping Hands T-shirt nga mipadulong sa pagtabang sa mga biktima sa pagkagun-ob. “Nasayud ko nga moabut ang mga Mormons!” miingon siya.

Kini nga panghitabo, gi-report sa usa ka Facebook post sa presidente sa Texas Houston South Mission, nga si Aaron T. Hall, nagrepresentar kon sa unsang paagi ang Simbahan motabang sa mga miyembro ug mga kasilinganan sa mga panahon sa kalisdanan. “Walay hagit nga dako ra kaayo alang sa mga miyembro sa Simbahan sa Ginoo!” Misulat si Presidente Hall.

Kon ang katalagman moabut, ang Simbahan kanunay nga maoy usa sa unang moresponde, ug diha sa naapektohan nga mga dapit, ang humanitarian nga tabang sa Simbahan kasagaran magpadayon sulod sa mubo ug taas og tagal nga pagkaayo, nga ang tumong mao ang pag-establisar sa pagpaningkamot sa kaugalingon [self-reliance]. Ang lokal nga mga lider nakigtambayayong sa punoang buhatan sa Simbahan sa pagtimbang-timbang ug pagsangkap alang sa mga panginahanglan ug sa pag-organisar sa mga miyembro aron sa pagtabang sa pag-apud-apod sa mga kapanguhaan, pagpanglimpyo, pagpahiuli, ug pagpangtukod pag-usab.

Pinaagi sa LDS Charities ug sa pagpakig-partner sa naestablisar na nga mga ahensya diha sa naapektuhan nga mga dapit, ang Simbahan bag-o lang mihatag og hinabang sa mga biktima sa baha sa Peru; sa pagdahili sa mga lapok sa Sierra Leone; sa mga sunog sa Montana, USA, ug Alberta, Canada; sa mga bagyo sa Texas, Florida, ug sa mga isla sa Caribbean, lakip sa Puerto Rico, Haiti, ug sa Dominican Republic; ug sa duha ka kusog nga mga linog sa Mexico.

Sa Septyembre, ang Simbahan mipahibalo nga mohatag kini og US $11 million aron sa pagsuporta sa mga proyekto sa paghupay sa kagutom [famine relief] ug sa pagpakaon sa malnourished nga mga bata sa walo ka mga nasud sa Africa ug sa Middle East. Ang LDS Charities nakigtambayayong sa 11 ka mga organisasyon sa 25 ka mga proyekto aron sa pag-apud-apod sa hinabang.

Ang LDS Charities mihatag og hapit $2 billion isip tabang sa minilyon ka mga tawo sa 189 ka mga nasud sukad niadtong 1985, sugod sa kahupayan nga gihatag ngadto sa mga biktima sa kagutom sa Ethiopia.