Pamilya: Ang Tuburan sa Kalipay

Mipadayag ang Ginoo sa klaro nga paagi kon unsaon sa pagpalambo ug pagbaton og lig-on nga mga pamilya. Gidapit kitang tanan sa pagtuon ug pag-apply sa mga baruganan nga anaa sa “Ang Pamilya: Usa Ka Pamahayag ngadto sa Kalibutan.” Dugang pa, kinahanglan natong mahibaloan nga ang pag-angkon og personal nga kalig-on ug kalipay gikan sa kinabuhing pamilya nagkinahanglan og sakripisyo ug pagtuo.

Ang pamahayag sa kalibutan nag-ingon nga “ang kaminyoon tali sa usa ka lalaki ug usa ka babaye gi-orden sa Dios ug ang pamilya mahinungdanon sa plano sa Tiglalang alang sa walay katapusan nga destinasyon sa Iyang mga anak.” Mipadayon pa kini sa pag-ingon “nga ang sugo sa Dios alang sa Iyang mga anak sa pagdaghan ug pagpuno sa yuta nagpabilin nga ipatuman.”¹

Para sa daghang katawhan, ang imahe ug ang katuyoan sa pamilya dako kaayo og kausaban. Sa nagkadaghang paagi, ang katilingban misagop na sa gitawag og “perpektong kaparis” sumbanan sa kaminyoon, nga nagtutok sa panginahanglan ug pagbati sa mga hingkod nga supak sa mga bata. Agig resulta, daghan ang nagminyo human sa taas nga relasyon kay sa pagminyo human sa tukmang paghigugmaay. Ang pagpangita og perpektong kaparis, pagsulay sa relasyon pinaagi sa pagpuyo nga walay kasal, o pagpuyo og luho o hamugawayng kinabuhi nga sinuportahan sa pagsabut-sabut unsaon pagbahin ang kabtangan kon magbulag sila nahimo nang komon nga buhat sa daghang tawo sa dili pa mohukom nga magminyo.

Lahi ra ang gitudlo kanato sa kasulatan ug sa modernong adlaw nga mga propeta. Itukod nato ang atong kaminyoon pinaagi sa pundasyon sa kaputli ug kamaunungon, sa tuyo nga makaestablisar ug makaamuma og pamilya. Mitudlo si Presidente Spencer W. Kimball (1895–1985): “Dunay daghang mamulong ug mosulat batok sa kaminyoon. Gani ang uban nato molangay pa sa kaminyoon ug makiglalis batok niini. … Manawagan kami sa tanang katawhan nga dawaton ang [tradisyunal] nga kaminyoon isip basihan sa tinuod nga kalipay. … Una sa tanan kon ugaling magminyo na buot ipasabut mangandam na kita nga magkapamilya.”²

Dihang ang akong asawa, si Christiane, ug ako batan-on pa, mao kini ang mga pulong sa buhing propeta, ug misalig kami ug gisunod ang iyang tambag. Nangluhod kaming nag-atubangay sa altar sa Bern Switzerland Temple, nag-edad lang kami og 20 ug 22. Takus kami sa pakigsaad, wala gyud mi nahibaloan unsay umaabut, wala mi kasinatian sa panarbaho o wala makahuman og edukasyon, ug kabus gayud kami.

Ang bugtong butang nga buhong kanamo mao ra ang among paghigugmaay ug dili hingkod nga kadasig. Apan nagsugod kami pagtambayayong og tukod sa among kalibutan. Wala namo ilangay ang pag-angkon og mga anak, ug nagkinahanglan kami nga magsuportahay sa usag usa aron makaangkon og edukasyon. Lig-on kaming mituo sa saad sa Ginoo nga “kon kamo maghupot sa iyang mga sugo kamo gayud mouswag dinhi sa yuta” (Mosiah 2:22).

Ug Iya kining gihimo. Dihang naminyo mi, si Christiane nag-eskwela og nursing. Ang among panglantaw naglakip sa iyang pagkakuha og degree, apan sa samang higayon usab mihimo kami og mahunahunaong desisyon aron masugdan sa pagtuman ang among damgo nga magkapamilya. Isip resulta, natawo ang una namong anak mga duha ka semana sa wala pa mokuha si Christiane sa iyang final exam isip certified nga nurse.

Karon, hapit 40 ka tuig nang milabay, nagpasalamat kami nga nakatukod kami og pamilya. Ang among pagtuo sa Dios ug ang among relasyon dili matarug samtang nakita namo ang kamot sa Ginoo nga naggiya kanamo atol sa proseso sa pagtukod sa gingharian dinhi sa mortalidad. Magpadayon sa pagtubo kini nga gingharian hangtud sa hangtud.

Imahe

family walking

Para sa among panan-awon bahin sa kalipay, parehas kaming andam ug matinguhaong mosakripisyo. Gidawat namo ang balaanong pinili nga mga tahas sa amahan “nga mangulo” ug “mosangkap” ug sa inahan “[moatiman] sa ilang mga anak.”³ Si Julie B. Beck, kanhi Kinatibuk-ang Presidente sa Relief Society miingon: “Ang tahas sa mga amahan mahitungod sa priesthood mao ang pagpangulo sa mga ordinansa ug pagpasa sa mga ordinansa sa priesthood ngadto sa laing henerasyon. Ang tahas sa priesthood sa mga inahan mao ang pag-impluwensya. Mga mahinungdanon kini, makamugna og pagdayeg, ug kini mga responsibilidad nga masaligan sa bisan unsa.”⁴

Ang pagtinabangay sa kaminyoon ug pamilya isip magkatugbang nga kaparis wala magpasabut nga parehas ang among gipangbuhat o magdungan sa pagbuhat o sa parehong gidaghanon sa buhaton. Nakasabut kami ug midawat sa managlahing tahas nga gihatag kanamo pinaagi sa balaang plano sigun sa gi-outline sa pamahayag sa pamilya. Wala kami magsunod sa kalibutan sa unsay gihulagway nga “pag-angkon og kagawasan [gikan sa mga responsibilidad sa pamilya],” diin ang bana ug asawa magpakabuhi lang para sa kaugalingon nilang interes. Nagsunod kami sa mga baruganan sa ebanghelyo; magtambayayong ang mga bana ug asawa, ug ang pamilya maningkamot nga magkahiusa ug pagkadili hakog.

Tingali ang uban kaninyo moingon: “Ah, lahi man ang among sitwasyon. Ang kalibutan karon dili maayo. Kinahanglang duna pay lawak para sa mga eksepsyon.” Tinuod, apan gisulayan nako nga matudlo ang lagda sa balaang sumbanan ug tugutan nga atubangon ninyo ang mga eksepsyon samtang magsubay kamo sa inyong dalan sa kinabuhi.

Sa among panan-awon sa among pamilya, gusto namo nga sa balay ra si Christiane aron moatiman sa among mga anak. Nagpasabut kini sa pagsakripisyo. Human dayon sa among pagkahibalo nga hapit na mi magkaanak, gipahinumduman ko ni Christiane bahin sa sinabutan nga desisyon nga among gihimo sa wala pa ang among kasal nga mohunong dayon siya og trabaho sa gawas kon matawo na ang bata. Misulay ko sa paglikay sa nasayran nakong dugang nga responsibilidad sa pag-ingon nga ikatulong bahin ang iyang natampo sa kinitaan sa among pamilya. Mitubag siya sa yanong paagi, “Atimanon nako ang mga bata, ug ikaw ang moatiman nga may pagkaon atong lamesa.”

Nasayud kong eksakto siya; gihisgutan na namo kini dugay na. Haum kini sa among panglantaw sa kinabuhing pamilya, haum kini sa mga pulong sa buhing mga propeta, ug eksakto ang pagbati. Mao nga gibiyaan niya ang maayo’g sweldo niyang trabaho sa pagka-nurse aron mas maduol siya sa mga bata ug aron paghatag sa inadlaw nilang mga gikinahanglan, ug ako maningkamot aron makahatag sa pagkaon ug kasilungan. Gipanalanginan kami sa Ginoo aron matuman kini nga aspeto sa among panan-awon.

Ang uban pang importante nga butang, sama sa pagkaginikanan, pagtudlo, paggiya, pagpanglimpyo, o gani pag-ilis sa diaper, nagtinabangay kami kanunay kutob sa mahimo kon itugot sa higayon. Kini nga pagbahinay sa buluhaton nahitabo kay nahimo kini kanunay nga bahin kon giunsa namo sa paglantaw ang among kinabuhi sa pamilya.

Ako ug si Christiane nakamatikud nga dihang milihok kami inubanan sa pagtuo ug misalig sa Ginoo, Iya kaming gitabangan nga mahimo ang Iyang kabubut-on sa Iyang pamaagi ug sumala sa Iyang tayming. Karon, moingon ko nga ang Iyang pamaagi wala magpasabut nga ang tanan nahitabo dayon sa paagi nga maoy among gihunahuna. Usahay kinahanglan nga magpailub kami, usahay kinahanglan nga dugangan pa namo ang among paningkamot, ug usahay ingon og sulayan sa Ginoo ang among dedikasyon. Hinoon, gidasig kami kanunay tungod sa among panglantaw ug nahimo kining pundasyon sa pinakaimportante namong mga desisyon.

Usa ka butang nga kanunay namong gilantaw ni Christiane mao nga ikauban namo ang among mga anak sa celestial room sa templo isip pasiuna para sa mahangturon nga kalipay ug himaya nga gipangandoy namo nga masinati. Sulod sa milabayng katuigan nakadala kami og usa human sa usa ka anak aron modawat sa mga ordinansa sa templo, nga nagsimbolo sa pag-uli kanila ngadto sa atong Langitnong Amahan human sila matudloi sa mga baruganan sa pagkamatarung. Nakuyugan namo ang tulo sa among mga anak ngadto sa mga altar sa templo dihang gipakaslan nila ang ilang mga hinigugma, ug nagpaabut pa kami og daghan pang mga pagpakasal sa templo.

Walay laing nakahatag og labaw nga kalipay ug katagbawan sa among kinabuhi kay sa kalipay nga among nakita sa usag usa ug sa among mga kaliwat. Dihang nasabtan namo nga kini mga sinugdanan lamang sa mahangturon namong pag-uswag ug mao lamang ang pinakauna nga ang-ang sa among kamaya ug kalipay, kami kaniadto—ug karon—andam nga mosakripisyo sa tanan nga anaa kanamo aron masunod ang doktrina sa pamilya ug aron makita hingpit nga katumanan sa among panglantaw.

Gidapit namo kamo sa pagpamalandong niini nga doktrina ug hibaloan sa inyong kaugalingon kon unsa gayud ang pinakaimportante. Kini nga matang sa kalipay maoy pinakaimportante sa among pagpakabuhi. Ug ang kalipay nga maoy resulta sa paghigalaay tali sa bana, asawa, ug mga anak magtubo sa kanunay.

Imahe

family on the swings

Human ninyo matun-an ang doktrina sa pamilya ug maestablisar ninyo ang panglantaw para sa kalipay, kinahanglan nga seryusuhon ninyo ang paggamit sa inyong panglantaw.

Ang unang mga pagbalibad nga akong nadawat dihang nangulitawo pa ko ni Christiane nakapasagmuyo nako og gamay. Bag-o pa lang kong mihukom nga magsugod og mabungahon nga panarbaho isip young single adult sa Simbahan, apan usa ka adlaw duna koy espesyal nga espiritwal nga impresyon. Miapil ko og usa ka ordinansa sa Swiss Temple dihang nakadungog ko og tingog sulod sa akong kasingkasing nga daw ingon niini og epekto: “Erich, kon dili nimo seryusuhon ang pagpaningkamot sa pagminyo sa bag-o ug walay katapusang pakigsaad, tanan kini nga pagtulun-an ug gisaad nga mga panalangin dili makahatag og kalainan diha nimo.” Usa kadto ka pahigmata nga akong nadawat sa batan-ong edad nga 21, ug sukad niadtong adlawa mas gipaningkamutan pa gyud nako ang pagkahimong takus niana nga panalangin.

Dapiton ko kamo sa pagtakda og personal nga mga tumong bahin sa inyong panglantaw. Sa Isangyaw ang Akong Ebanghelyo atong mabasa: “Ang mga tumong nagpakita sa mga tinguha sa atong mga kasingkasing ug sa atong mga panglantaw sa unsay atong nakab-ot. Pinaagi sa mga tumong ug mga plano, ang atong mga paglaum mausab ngadto sa pagbuhat. Ang paghimo og tumong ug pagplano mao ang mga buhat sa hugot nga pagtuo.”⁵

Ayaw pagtiaw-tiaw sa sagradong mga butang. Kon moabut ka na sa edad nga pwede ka nang magminyo, ayaw pakig-date aron lang malingaw. Ayaw iamong ang imong mahangturon nga katungod sa pagkatawo pinaagi sa paghimo og bisan unsa nga mohikaw kanimo sa paghimo sa pinakaimportanting mga pakigsaad sa templo. Kon itratar nimo ang tanan nga imong ka-date isip imong potensyal nga mahangturong kompanyon, dili ka gayud mohimo og dili angay nga mga butang nga sa pisikal o sa espiritwal nga paagi modaut sa inyong panag-date o moamong sa kaugalingon nimong katakus ug mopangiub sa imong panglantaw. Kon magpabilin kang takus, ang espiritwal nimong panabut dili gayud moawop, ug kanunay ka nga may katungod sa mga hagawhaw sa Espiritu. Moawhag kanimo ang Espiritu Santo ug ikumpirmar diha nimo ang kaeksakto niining pinakaimportante nga mga desisyon sa imong kinabuhi, bisan sa mga panahon sa makalilisang nga kamatayon.

Ibutang nga may tulubagon ang imong kaugalingon ngadto sa Ginoo bahin sa imong panglantaw ug mga tumong sa kinabuhi. Kon duna ka may angayang hinulsulan, ayaw pagduha-duha sa pagbuhat niini. Niining kinabuhia man ug sa mahangturong kinabuhi importante nga “dili ilangay ang adlaw sa inyong paghinulsol” (Alma 13:27; 34:33). Sunda ang imbitasyon sa propeta sa Dios, kinsa nag-awhag kanato sa “[pag]pangayo sa Amahan diha sa ngalan ni Jesus alang sa bisan unsa nga butang nga kamo nagkinahanglan. Ayaw pagduha-duha, apan pagmatinuohon, ug pagsugod sama sa karaan nga mga panahon, ug duol ngadto sa Ginoo uban sa tibuok ninyo nga kasingkasing, ug buhata ang inyong kaugalingon nga kaluwasan uban sa kahadlok ug pagpangurog sa iyang atubangan” (Mormon 9:27).

Nakabantay ko nga ang uban ninyo, tungod sa inyong mga kahimtang, nagkinahanglang mohangop sa sumbanan nga panglantaw sa pamilya aron mohaum sa inyong personal nga sitwasyon. Apan akong nakat-unan nga ang Ginoo motabang nato kon molihok kita pinaagi sa pagtuo ug mosunod sa sumbanan kutob sa mahimo.

Ang ebanghelyo ni Jesukristo naglakip og pinakamakahupay nga bahin. Mao kini ang paglahutay o paghuman nga aspeto sa atong pagtuo sa Ginoo nga si Jesukristo. Gipasidan-an kita ni Moroni sa pagpabilin kanunay sa eksaktong dalan, “mosalig lamang diha sa mga maayo nga buhat ni Kristo, kinsa mao ang tigpasiugda ug ang tiglahutay sa [atong] hugot nga pagtuo” (Moroni 6:4).

Tungod sa atong pagtuo kang Jesukristo, makapadayon kita sa kinabuhi nga angay natong subayon. Apan kon mapandol kita tungod sa kahuyang o nawala nga mga oportunidad, motabang Siya kanato, mopuno sa kal-ang, ug mamahimong tighingpit sa atong pagtuo. Miingon Siya, “Kay Ako, ang Ginoo, mohukom sa tanan nga mga tawo sumala sa ilang mga buhat, sumala sa tinguha sa ilang mga kasingkasing” (D&P 137:9).

Gikan sa Handbook 2 atong mabasa nga “Ang matinud-anong mga miyembro kansang mga kahimtang wala motugot kanilang makadawat sa mga panalangin sa mahangturong kaminyoon ug pagkaginikanan niining kinabuhia makadawat sa tanang gisaad nga mga panalangin sa kahangturan, samtang gihuptan nila ang mga pakigsaad nga ilang gihimo ngadto sa Dios.”⁶

Mopamatuod ko nga motinuod gayud ang Ginoo unsay Iyang gisulti nga “dili maayo nga ang lalaki mag-inusara” (Genesis 2:18) ug ang kinatas-an Niyang tinguha para kanatong tanan nga Iyang mga anak mao ang pagkadawat sa “kahingpitan sa kalipay” (Moises 7:67). Busa, ikanunay ang inyong panglantaw sa unahan ug “paningkamuti ang pagsunod sa mga sumbanan sa pagpakabuhi sa usa ka mahangturon nga pamilya. Nagpasabut kini sa pagpangandam nga mahimong takus ug mapinananggaong mga amahan ug inahan. Sa ubang sitwasyon, dili matuman kini nga mga panalangin hangtud sa sunod nga kinabuhi, apan ang kinatas-ang tumong managsama ra para sa tanan.”⁷

Nasayud kong dunay daghang managlahi nga kahimtang sa kinabuhi samtang dunay mga tawo sa kalibutan. Nasayud kong dunay mga kalainan sa mga kultura, tradisyon, ug mga ekspektasyon. Hinoon, kini nga mga doktrina ug mga baruganan mga mahangturon ug tinuod, ug nagbarug kini nga dili magsalig sa personal natong mga kahimtang sa kinabuhi. Ako masaligon gayud nga kon tinuoray nimong pamalandungan ug pagaampoan ang pakonsiderar niini nga mga doktrina ug baruganan, mapalambo nimo ang personal nga panan-awon para sa imong kinabuhi nga ikahimuot sa Ginoo ug motultol kanimo sa kinadak-ang kalipay.