Pagtabang ni Anna

Imahe

crumpled note

Litrato gikan sa Getty Images

Pipila ka tuig na ang milabay, nagtudlo ko sa mga sayis anyos sa Primary. Naa si Anna sa akong lista. Nakaila kaayo ko sa maong pamilya nga ang iyang mga ginikanan nagbulag ug nagpuyo siya kauban sa iyang amahan. Panagsa ra silang mosimba.

Mihapit ko sa balay aron makigkita ni Anna ug sa iyang papa ug dapiton si Anna sa Primary. Daw interesado si Anna, apan wala siya gayud moadto. Matag Dominggo sa buntag sulod sa mga semana, manawag ko niya sa pagdapit niya sa Primary. Walay mitubag bisan usa, apan kanunay kong magbilin og mensahe nagsulti ni Anna nga malipay kong makita siya sa Primary.

Usa ka Dominggo sa buntag, miadto si Anna. Gitabangan siya sa iyang amahan nga maandam para sa Primary sa pagsul-ob sa pang-Dominggo niyang sinina ug dayon gihatud siya sa simbahan. Nalipay ko nga nakita siya, gi-welcome nako siya ug gitabangan nga ikaila niya ang uban nga diha sa klase.

Nagleksyon mi, nanganta, ug nagkolor-kolor sa hapit nang mahuman ang klase. Dihang nanglakaw na ang mga bata, miduol nako si Anna ug mibutang og nagum-os nga papel sa akong mga kamot. Sa una, nagtuo kong sagbut ra to. Ilabay na unta nako, apan giaghat ko sa Espiritu sa pag-abli niini. Duna diay gisulat si Anna sa papel. Sa sinulatan sa sayis anyos, nag-ingon kini, “Gimahal ko ikaw.”

Wala kaayo si Anna makaila nako nga ako iyang higugmaon. Ang iya rang nailhan mao ang akong tingog sa iyang answering machine nga nagdapit niya sa Primary. Apan kadtong gamayng paningkamot sa pagtabang kaniya nakatabang ni Anna aron mahibalo nga dunay nagpangga kaniya ug gusto nga matabangan siyang mobati sa gugma sa Manluluwas.

Panagsa makit-an na nako si Anna sa Primary ug ang iyang amahan nagsugod na usab sa panagsang pagsimba. Apan kon ang mga kahimtang sa ilang pamilya mausab, dili namo sila makita sa kanunay.

Naghunahuna ko mahitungod ni Anna sulod sa katuigan. Sa tibuok nakong kasingkasing unta iyang mahinumduman ang iyang panahon sa Primary. Tingali mahinumduman niya ang pipila nga iyang nakat-unan, apan nanghinaot ko og labaw pa kay sa paghinumdom sa pagbati sa gugma sa Ginoo, sa kahupayan sa Espiritu, ug sa gugma sa usa ka magtutudlo.