Unsa ang Atong Gituohan
Ang Hinungdan sa Atong Paglaum
Dunay mahangturon nga plano ang Langitnong Amahan sa pagdala kaninyo balik ngadto Kaniya. Ang Iyang Anak, si Jesukristo, kanunay ninyong gikauban sa matag lakang sa agianan.
Ang Kinabuhi sa wala pa Matawo
Sa atong premortal nga kinabuhi, gipresentar sa Langitnong Amahan ngadto sa tanan Niyang espiritu nga mga anak ang Iyang plano aron matabangan kita sa pagkahimong sama Kaniya. Ang plano nagkinahanglan og usa ka Manluluwas aron matabangan kita nga makabuntog sa pisikal ug espiritwal nga kamatayon. Mitanyag si Jesukristo nga mahimo natong Manluluwas ug ihatag ngadto sa atong Langitnong Amahan ang himaya (tan-awa sa Moises 4:1–2).
Paglalang
Ubos sa direksyon sa Amahan, milalang si Jesukristo og matahum nga kalibutan alang kanato (tan-awa sa Mga Taga-Colossas 1:15–16; 3 Nephi 9:15). “Ang kalapad sa kahangturan, ang mga himaya ug mga misteryo sa walay kinutuban nga gidak-on ug panahon tanan gimugna alang sa kaayohan sa ordinaryo nga mortal sama ninyo ug nako” (Dieter F. Uchtdorf, “Kamo Importante ngadto Kaniya,” Liahona, Nob. 2011, 20).
Kinabuhi dinhi sa Yuta
Dinhi sa yuta wala na kita sa presensya sa Dios, apan ang ebanghelyo ni Jesukristo makagiya kanato. Bisan og makasala kita sa matag karon og unya, ang Manluluwas makaayo ug makapasaylo kanato kon kita maghinulsol. Giantus Niya “gani labaw nga ang tawo makaantus” (Mosiah 3:7) aron atong mabuntog ang atong mga sala nga dili mapanghimaraot tungod niini! (Tan-awa sa Mosiah 4:2; Alma 42:14–15.)
Kinabuhi human sa Kamatayon
Human sa kamatayon, ang atong mga espiritu ug lawas magbulag, maghulat sa Pagkabanhaw didto sa kalibutan sa espiritu. Ang Pagkabanhaw ni Jesukristo mibuntog sa kamatayon para kanatong tanan, nagtugot nga kita, kon magmatinud-anon, mahiusa sa atong mga pamilya ug sa Langitnong Amahan. “Ang espiritu ug ang lawas pagahiusahon pag-usab diha sa iyang hingpit nga kahimtang” (Alma 11:43) ug mabuhi sa hangtud. (Tan-awa sa 1 Mga Taga-Corinto 15:22; 2 Nephi 9:4–13.)
Adlaw sa Paghukom
Si Jesukristo ang atong maghuhukom. Siya nga mao ang atong manlalaban sa Langitnong Amahan mohatud og hingpit, mapinanggaon, maloloy-on, ug makiangayong paghukom. Iya kitang hukman dili lang kay unsa ang atong gihimo, gisulti, ug gihunahuna apan kon unsa usab ang atong naabut—kon unsa na kita ka Kristohanon. (Tan-awa sa 2 Nephi 9:15; Mosiah 4:30; D&P 45:3–5.)
Kinabuhing Dayon
Kadtong moduol kang Kristo ug modawat sa gikinahanglang mga ordinansa, sama sa bunyag ug mga ordinansa sa templo, ug matinud-anon sa mga sugo makapanunod sa kinabuhing dayon sa presensya sa Dios. Kini nga panalangin moabut “pinaagi sa mga maayo nga buhat, kalooy, ug grasya sa Balaang Mesiyas” (2 Nephi 2:8; tan-awa usab sa Mosiah 15:23).