Mga kamatuoran mahitungod ni Jesukristo, Mga kamatuoran mahitungod Kanimo

Ni David A. Edwards

Mga Magasin sa Simbahan

Ang pagkasabut og pipila ka kamatuoran mahitungod sa Manluluwas ug sa Iyang kinabuhi makaawhag kanato sa pagtuo nga posible gayud ang pagsunod Kaniya.

Imahe

Facts about Jesus Christ, Facts about You

Sa matag paagi, mas labaw kaayo si Jesukristo kay ni bisan kinsa kanato (tan-awa sa Isaias 55:8–9; Abraham 3:19). Dili sulagma nga Siya ang “Hinigugma ug Pinili sukad pa sa sinugdanan” (Moises 4:2) ug Iyang naangkon ang himaya nga anaa na Kaniya.

Apan dili angay nga maghunahuna kita nga ang kabantugan sa Manluluwas nagpalayo kaayo kanato gikan Kaniya nga ang Iyang pagdapit nga mosunod Kaniya sama og usa ka panawagan aron mohimo sa imposible. Ang modernong pagpadayag nagtabang nga atong makita ang kaposible nga maabut gayud ang tumong aron masunod ang ehemplo sa Manluluwas.

Ania ang pipila ka mga kamatuoran mahitungod ni Jesukristo ug pipila ka kamatuoran mahitungod kanimo. Makatabang kini aron imong makita nga sa tinuoray imong masunod ang sama nga mahinungdanong paagi nga Iyang gihimo aron maangkon ang kahingpitan sa mga panalangin nga giandam sa Langitnong Amahan para kanimo.

Jesukristo …	Ikaw …
“Diha sa sinugdanan, sa wala pa ang kalibutan” (D&P 93:7).	“Usab diha sa sinugdnan uban sa Amahan” (D&P 93:23).
“Nakadawat sa kahingpitan sa sinugdanan, apan nakaangkon og grasya ug dugang pa nga grasya” (D&P 93:12). Nagpasabut nga Siya wala pay hingpit nga kahibalo sa Iyang pagkatawo ug misyon sa una Niyang pag-anhi sa yuta, wala usab Kaniya ang tanang gahum. Mitubo siya sa kahibalo ug gahum gikan sa Dios samtang mituman Siya.	Dili hingpit ang imong kahibalo bahin sa imong pagkatawo ug katuyoan dihang ikaw natawo apan milambo niana nga kahibalo sa anam-anam nga paagi. Pinaagi sa Espiritu Santo, hatagan kita sa Dios og espiritwal nga kahibalo ug gahum “pagtulun-an human sa usa ka pagtulun-an, lagda human sa usa ka lagda” (2 Nephi 28:30).
“Padayon gikan sa grasya ug dugang pa nga grasya, hangtud nga siya nakadawat sa kahingpitan” (D&P 93:13).	Makadawat usab og kahingpitan pinaagi kang Jesukristo—kon tumanon nimo ang mga sugo sa Dios (tan-awa sa D&P 93:27).
“[Midaku] nahimong kusgan” (Lucas 2:40).	Nagkaanam kalig-on sa espiritu pinaagi sa pagkat-on ug paggamit sa mga baruganan sa ebanghelyo.
“Mitubo sa kaalam …	Mitubo sa kaalam pinaagi sa edukasyon, maayong mga paghukom, ug kasinatian.
“Ug sa gidak-on,	Nagtubo sa pisikal.
“Ug sa kahimuot sa Dios …	Makaangkon sa kahimuot sa Langitnong Amahan pinaagi sa pagtuman sa mga sugo.
“Ug sa tawo” (Lucas 2:52).	Makaangkon sa pagsalig sa imong mga ginikanan ug sa uban pinaagi sa pagpakita sa nagtubo nga kahingkod ug responsibilidad.
“Siya nga sa tanang paagi gitintal ingon kanato, …	Gitintal.
“Hinoon wala makasala” (Mga Hebreohanon 4:15).	Makasala (sama sa tanang katawhan)—apan malimpyo gikan sa sala pinaagi sa Pag-ula ni Jesukristo pinaagi sa paghinulsol, pagpabunyag, pagkadawat sa Espiritu Santo, ug pag-ambit sa sakrament.

Dayag lang, ang uban pang mga kamatuoran mahitungod ni Jesukristo makapakita kon unsay imong mahimo unsaon pagsunod Kaniya (sama pananglit, gibunyagan Siya, ug ikaw usab—o pwede—usab). Ug ang pagkat-on mahitungod ni Jesukristo makatabang aron imong makita nga kon moabut man kini sa imong agianan niining kinabuhia, Siya sa tinuod ang “dalan N’ya may timaan, ug gisaysay ang tanan” (“Unsa Kadako sa Kaalam ug Gugma,” Mga Himno ug mga Awit sa mga Bata, nu. 195).