Hangtud sa Sunod Natong Panagkita
Himoon Niya nga Magaan ang Atong Gipas-an
Ni Elder Robert D. Hales (1932–2017)
Sa Korum sa Napulog Duha ka mga Apostoles
Gikan sa “Special Witnesses of Christ,” Liahona, Abr. 2001, 12–13. Aron makatan-aw sa pagpamulong ni Elder Hales niini nga mensahe, “Jesus Christ Is the Perfect Example of Obedience,” bisitaha ang prophets.lds.org ug i-select ang “Special Witnesses of Christ.”
Ang makatubos nga gahum sa Manluluwas mousab sa atong tawhanon nga pagpakabuhi kon kini atong hatagan sa pagtugot.
Imahe gikan sa Getty Images
Dako ang akong paghigugma sa mga kasulatan. Ganahan kong mobasa mahitungod sa mortal nga kinabuhi ni Jesukristo. Dunay daghan kaayo sa Iyang kinabuhi nga makabayaw ug makadasig, ug makalig-on kanato sa panahon sa atong panginahanglan. Para nako, usa sa pinakasagradong mga kapitulo sa tanang kasulatan mao ang Juan kapitulo 17. Ang tibuok kapitulo usa ka pangaliyupo nga pag-ampo nga gihalad ni Jesukristo sa Iyang Amahan. Sa ingon niini, miingon Siya, “Kon mailhan pa lang kamo sa kalibutan sama sa akong pagkaila kaninyo.” Gisultihan Niya ang Iyang Amahan nga nabuhat na Niya ang tanan nga gipabuhat Kaniya.
Usahay ato rang makalimtan ang katalagsaon sa pagkamasulundon sa Manluluwas. Ang tanan nga Iyang gihimo, ang tanan nga Iyang gisulti nagsukad sa Iyang pagkamasulundon sa Amahan. Ang iyang pagpangita ug paghunahuna sa mga kabus, sa pagtawag sa Iyang mga disipulo, ang Iyang mga pagtulun-an dinhi man sa yuta sa Palestina ug sa Amerika—tanan kini gihimo tungod kay ang Iyang Amahan misugo Kaniya sa pagbuhat niini. Wala Siyay personal nga plano. Miingon Siya “Wala akoy ginabuhat sa kinaugalingon kong pagbulut-an, hinonoa nga nagasulti ako sa ingon sumala sa gitudlo kanako sa Amahan” (Juan 8:28). Pagkahingpit nga ehemplo sa pagkamasulundon!
Sa mga pagpili nga atong himoon sa kinabuhi, kinahanglan nga makaila kita sa Manluluwas. Ang Iyang yano nga pahimangno “Umanhi ka … sumunod kanako” (Mateo 19:21) makausab sa tawhanong pagpakabuhi kon kini atong hatagan sa pagtugot. May gahum Siya sa paghimo nga mogaan ang atong mga palas-anon kon moduol kita Kaniya.
Isip Apostol ni Ginoong Jesukristo, may oportunidad ko sa pagpamatuod isip sagradong saksi sa Manluluwas. Ang pinakadako nakong tinguha mao nga ang akong pagpamatuod motuhop sa mga kasingkasing niadtong makadungog niini.
Ako nasayud nga si Jesukristo buhi. Nasayud ako nga Siya naggiya ug nagdumala sa Iyang Simbahan pinaagi sa pagpadayag ngadto sa Iyang propeta niini gayud nga adlaw ug panahon. Kon magbaton kita og pagtuo sa atong Manluluwas, Iya kitang himamaton pinaagi sa mga pagsulay ug kalisdanan, ug makalahutay kita hangtud sa katapusan ug makabalik sa Iyang presensya human niining mortal nga pagsulay. Buhi Siya ug nakaila ug nahigugma sa matag usa kanato. Gusto kaayo Siya nga mopanalangin kanato kon kita moduol Kaniya.