Natuman ang Akong Pangandoy

Natawo ko sa Hong Kong, China. Sa batan-on pa ko, nangandoy ko nga makapuyo sa matahum nga nasud nga gilibutan sa kinaiyahan.

Dihang midako na ko ug naminyo, ako ug ang akong bana namalhin sa Australia. Batid siya nga mekaniko ug nahatagan og work visa, nga nagtugot nga makapuyo mi sa Australia sulod sa upat ka tuig. Dihang kaming duha ang nakatrabaho nakadawat mi og laing upat ka tuig nga ekstensyon sa among visa.

Atol niini nga panahon, naningkamot mi nga molambo ang among kahimtang aron makapermanente mi sa pagpuyo. Dili namo kaya ang mogasto para moeskwela og English, apan ang usa ka brother ug sister sa among ward mitudlo namo sa pagkat-on. Mao ra gihapon daw inigkahuman sa walo ka tuig mobiya gihapon mi sa Australia. Nagpuasa mi ug nag-ampo aron magpabilin lang mi. Ang among ward nagpuasa ug nag-ampo usab para namo.

Daw walay paglaum ang among sitwasyon. Nagsugod na mi sa pagpang-impake ug giplano ang among pagbalik sa Hongkong. Usa ka gabii ang usa ka higala nanawag ug nangutana mahitungod sa among visa. Among gipasabut ang among sitwasyon ug gisultihan mi nga may nailhan siyang usa ka ahente sa imigrasyon nga makatabang.

Pagkasunod adlaw gibisitahan namo ang ahente. Dali dayon niyang gihupay ang among mga hunahuna. Magsumiter siya og mga papeles para sa ekstensyon sa lahi nga visa—nga permanent-residency nga visa nga nagkinahanglan nga mobalhin mi sa Sydney ug moadto sa layo-layo nga lungsod.

Namalhin mi sa usa ka siyudad mga usa ug tunga ang biyahe padulong sa norte sa Sydney. Nakakita mi og balay duol ra sa chapel, nga gilibutan sa berde nga Australian nga mugbong tanom. Ganahan mi sa among bag-ong balay ug ward.

Wala madugay gitugutan na mi og mga temporaryo nga visa. Ang akong bana ug ako padayon sa pag-ampo. Nagpuasa siya matag Dominggo sulod sa unom ka bulan. Magbasa mi kada adlaw sa mga kasulatan ug moadto sa templo kada semana.

Dayon usa ka adlaw nakadawat mi og tawag gikan sa ahente sa imigrasyon. Kinahanglan ming mobalik sa opisina sa Sydney aron ihatud ang among mga passport. Gibalik kini og hatag ngari namo nga gi-stampahan og naaprubahan para sa permanent residency [permanente nga pagpanimuyo]. Nagpasalamat mi sa Langitnong Amahan niini nga panalangin. May pagtuo kami nga matubag ang among mga pag-ampo, ug nahitabo. Ug natuman ang akong pangandoy nga makapuyo sa nasud nga gilibutan sa kinaiyahan.