Բիզնեսը զարգանում է

Տարիներ տևած պայքարից հետո Թեդդին գիտեր, որ եկել է փոփոխության ժամանակը:

«Ես որոշեցի մասնակցել Եկեղեցու ինքնապահովման դասընթացներին»,- ասում է նա: «Ես լսել էի դրանց մասին, բայց միշտ մտածում էի, որ դրանք ինձ համար չեն: Ես մտածում էի, թե դրանք ինչ-որ բաներ ինքնուրույն անելու դասեր են: Դասերը հրաշալի էին:

Նախ, Թեդդին միացավ «Անձնական ֆինանսներ» խմբին: Այնուհետև նա մասնակցեց «Ինչպես սկսել և մեծացնել իմ բիզնեսը» խմբի դասերին: Խմբային դասընթացները օգնեցին Թեդդիին ձեռք բերել գիտելիքներ բիզնեսի վերաբերյալ, բայց նաև օգնեցին նրան զարգանալ հոգևորապես:

«Այս դասերի մասնակցությունն ամեն ինչ փոխեց»,- ասում է նա: «Ես որոշեցի կյանքի կոչել այնտեղ սովորած բոլոր բաները: Եվ իմ ֆինանսական վիճակն անմիջապես փոխվեց: Ես սկսեցի վճարել լրիվ տասանորդ, ամեն օր աղոթել, ուսումնասիրել սուրբ գրությունները և հավատք գործադրել: Եվ ամեն ինչ փոխվեց՝ ես սկսեցի գումար խնայել և Հանգստության օրը սուրբ պահել: Յուրաքանչյուր սկզբունք օրհնեց ինձ:

«Ինչպես սկսել և մեծացնել իմ բիզնեսը» խմբում Թեդդին սովորեց, թե ինչպես բացահայտել այն հնարավոր արտադրանքը, որը կգոհացնի իր բնակության վայրում ապրող հաճախորդներին: Երբ նա պարզեց, թե ինչ են փնտրում մարդիկ, ոգեշնչումը սկսեց ներգործել: Նրա տարածքի մարդիկ սիրում էին թարմ սենդվիչներ, բայց նրանք նաև ցանկանում էին, որ սենդվիչները պատվերով պատրաստվեին և առաքվեին:

«Շատ ռեստորաններ ունեն մի հատուկ սոուս, որն իրենց կերակուրը համեղ է դարձնում»,- ասում է Թեդդին: «Ուստի, ես մշակեցի իմ սենդվիչների հատուկ սոուսը»:

Բիզնեսի առաջին օրը Թեդդին պատրաստեց 30 սենդվիչ:

«Երեսուն րոպե անց տուն վերադարձա»,- ասում է նա: «Կինս անհանգստացավ, երբ տեսավ ինձ՝ թախտին նստած: Նա հարցրեց, թե ինչ եմ անում այս ժամին տանը, չէ՞ որ պիտի սենդվիչներ վաճառեի: «Ես արդեն բոլորը վաճառել եմ»:

Հաջորդ մի քանի շաբաթների ընթացքում Թեդդին կապվեց տեղական ձեռնարկությունների և դպրոցների հետ: Շատերը ցանկացան գնել նրա սենդվիչները և բիզնեսը սկսեց աճել: Նա արագ սովորեց, թե ինչպես պահել թարմ բանջարեղենը, որպեսզի դրանք թարմ մնան: Նա նաև հստակ գիտի, թե որքան է պահպանվում իր հատուկ սոուսը: Ամեն երեկո նա հաց է պատվիրում և ստանում: Շաբաթ օրերին նա գնում է զեղչված բանջարեղեն, որն էժան է, բայց մինչ երկուշաբթի չի փչանա:

Շուտով նա սենդվիչների հատուկ տեսականիի պատվերներ էր ստանում որոշակի առիթների և նույնիսկ մեծաքանակ պատվերներ՝ հատուկ իրադարձությունների համար: Նա օգնության կարիք ուներ և սկսեց աշխատողներ ընդունել:

Տեղական դպրոցների և ձեռնարկությունների հետ դրական հարաբերություններ ստեղծելով, Թեդդին ձեռք բերեց ակտիվ, մշտական հաճախորդներ: Չորս ամսվա ընթացքում նա ընդունել էր ութ աշխատող և վաճառում էր օրական 300 սենդվիչ, շաբաթը հինգ օր: Նրա վաճառքի թիմն այնքան արդյունավետ էր աշխատում, որ սենդվիչները նույնիսկ ամռանը վաճառեցին, երբ դպրոցները փակ էին: Այժմ Թեդդին նորից է պատրաստվում ընդլայնվել:

Քանի որ նա մասնակցել էր ինքնապահովման դասերին, նա ոգեշնչվել էր՝ գործի դնելով սենդվիչների բիզնեսի գաղափարը: Նա ասում է. «Եկեղեցու այս առաջնորդության և ստացած օրհնությունների շնորհիվ ես շատ հզոր վկայություն ունեմ Եկեղեցու և Հիսուս Քրիստոսի մասին»: