Pangbukas nga Mensahe

Akong minahal nga mga kaigsoonan, samtang amo kamong gi-welcome niining makasaysayanong Abril 2020 nga kinatibuk-ang komperensya sa Ang Simbahan ni Jesukristo sa mga Santos sa Ulahing mga Adlaw, alang sa mga rason nga inyo nang nahibaloan, nagbarug ko atubangan sa walay sulod nga awditoryum!

Wala nako damha, sa dihang misaad ko kaninyo atol sa Oktubre 2019 nga kinatibuk-ang komperensya nga kining Abril nga komperensya mahimong “halandumon” ug “dili makalimtan,” nga ang pagpamulong sa usa ka makita nga kongregasyon nga mas minos pa sa 10 ka tawo makapahimo niining komperensya nga halandumon ug dili gayud makalimtan alang kanako! Apan ang pagkasayud nga kamo miapil pinaagi sa elektronik nga transmisyon, ug ang matahum nga pasundayag sa choir sa “It Is Well with My Soul,” nagdala og dakong kahupayan sa akong kalag.

Sama sa inyong nahibaloan, ang nanambong niining kinatibuk-ang komperensya higpit nga gilimitahan isip kabahin sa atong mga tinguha nga mahimong maayong tibuok kalibutan nga mga lumulupyo ug buhaton ang tanan kutob sa atong mahimo sa pagpugong sa pagkaylap sa COVID-19. Kini nga virus adunay dakong epekto sa tibuok kalibutan. Kini usab nakapausab sa atong mga miting sa Simbahan, misyonaryo nga pagserbisyo, ug sa buhat sa templo sa mubo nga panahon.

Bisan kon ang mga restriksyon karon adunay kalabutan sa makamatay nga virus, ang personal nga mga pagsulay sa kinabuhi moabut lapas pa niining pandemic. Ang umaabut nga mga pagsulay mahimong moresulta tungod sa aksidente, natural nga katalagman, o sa wala damha nga personal nga kagul-anan.

Unsaon man nato paglahutay sa maong mga pagsulay? Ang Ginoo misulti kanato nga ““Kon kamo andam dili kamo mahadlok.”¹ Siyempre, makapundo kita og kaugalingon natong mga reserba sa pagkaon, tubig, ug tinigum nga kwarta. Apan sama ka mahinungdanon mao ang atong panginahanglan nga pun-on ang atong personal nga espirituhanong mga tipiganan og hugot nga pagtuo, kamatuoran, ug pagpamatuod.

Ang atong kinatas-ang paninguha sa kinabuhi mao ang pag-andam nga mohimamat sa atong Tiglalang. Ato kining buhaton pinaagi sa pagpaningkamot kada adlaw nga mas mahisama sa atong Manluluwas, si Jesukristo.² Ug buhaton nato kana samtang maghinulsol kita kada adlaw ug modawat sa Iyang makalimpyo, makaayo, ug makapalig-on nga gahum. Dayon mobati kita og malungtarong kalinaw ug hingpit nga kalipay, bisan atol sa gubot nga mga panahon. Kini mao gayud kon nganong ang Ginoo mihangyo kanato sa pagbarug sa balaang mga dapit ug “ayaw pagbalhin.”³

Karong tuiga, atong gihandum ang ika-200 nga anibersaryo sa usa sa labing mahinungdanong mga panghitabo sa kasaysayan sa kalibutan—nga mao, ang pagpakita sa Dios nga Amahan ug sa Iyang Hinigugmang Anak, si Jesukristo, ngadto ni Joseph Smith. Atol nianang talagsaong panan-awon, ang Dios nga Amahan mitudlo ngadto ni Jesukristo ug miingon: “Kini mao ang Akong Hinigugmang Anak. Paminaw Kaniya!”⁴

Kana nga tambag nga gihatag kang Joseph kay alang sa matag usa kanato. Kita kinahanglang magtinguha, sa matag paagi kutob sa atong mahimo, sa pagpaminaw kang Jesukristo, kinsa namulong kanato pinaagi sa gahum ug pagpangalagad sa Espiritu Santo.

Ang katuyoan niini ug sa matag kinatibuk-ang komperensya mao ang pagtabang kanato nga maminaw Kaniya. Kami nag-ampo, ug nagdapit kaninyo nga mag-ampo, nga ang Espiritu sa Ginoo magauban kanato sa ingon kaabunda nga inyong madungog ang mga mensahe nga gitagana gayud sa Manluluwas alang kaninyo—mga mensahe nga magdala og kalinaw sa inyong kalag. Mga mensahe nga moayo sa inyong nasakitan nga kasingkasing. Mga mensahe nga molamdag sa inyong hunahuna. Mga mensahe nga motabang kaninyo nga masayud kon unsay buhaton samtang magpadayon kamo sa inyong kinabuhi sa mga panahon sa kagubot ug pagsulay.

Kami nag-ampo nga kining komperensya mahimong halandumon ug dili makalimtan tungod sa mga mensahe nga inyong madungog, sa talagsaong mga pahibalo nga pagahimoon, ug sa mga kasinatian diin kamo dapiton nga moapil.

Pananglitan, atol sa pagtapos sa sesyon sa Dominggo sa buntag, atong himoon ang usa ka tibuok kalibutan nga maligdong nga katiguman kon kanus-a mangulo ko kaninyo sa sagradong Singgit nga Hosanna. Kami nag-ampo nga mahimo kining usa ka espirituhanong panahon alang kaninyo samtang mopahayag kita sa tibuok kalibutan sa atong tulukibong pagpasalamat sa Dios nga Amahan ug sa Iyang Hinigugmang Anak pinaagi sa pagdayeg Kanila niining talagsaong paagi.

Alang niining sagradong kasinatian, mogamit kita og limpyo nga puting mga panyo. Apan kon wala kamo niini, mahimo lang ninyong iwara-wara ang inyong kamot. Atol sa pagtapos sa Singgit nga Hosanna, ang kongregasyon moapil sa choir sa pagkanta sa “The Spirit of God [Ang Espiritu sa Dios].”⁵

Akong minahal nga mga kaigsoonan, kini nga komperensya mahimong mahimayaon. Kini nga tuig mahimong dili kasarangan samtang nakatutok kita og maayo sa Manluluwas ug sa Iyang gipahiuli nga ebanghelyo. Ang labing importante nga malungtarong mga epekto niining makasaysayanong komperensya mao nga ang atong kasingkasing mausab ug magsugod kita og tibuok kinabuhi nga paninguha nga maminaw Kaniya.

Welcome sa Abril 2020 nga kinatibuk-ang komperensya! Ako nasayud nga ang Dios, atong Langitnong Amahan, ug ang Iyang Anak, si Jesukristo, nagpakabana kanato. Magauban Sila kanato sa tibuok nga mga kahimoan [proceedings] niining duha ka mahimayaong adlaw samtang nagtinguha kita nga mas mahiduol Kanila ug mopasidungog Kanila. Sa sagradong ngalan ni Jesukristo, amen.