Ang Labing Nindot nga mga Panimalay

Bag-uhay lang dunay billboard diha sa Siyudad sa Salt Lake nga nakadani sa akong panan-aw. Pahinumdom kini sa usa ka kasangkapan sa panimalay ug kompanya sa pangsulod nga disenyo. Yano kining pagkasulti, “Nag-alagad sa Labing Nindot nga mga Panimalay sa Siyudad sa Salt Lake.”

Ang mensahe tulukibon—unsa ang “labing nindot nga panimalay”? Ako naghunahuna niana nga pangutana, ilabi na kalabut sa mga anak nga ang akong asawa, si Kathy, ug Ako mipadako ug sa mga anak nga ilang gipadako karon. Sama sa mga ginikanan bisan asa, kami nabalaka ug nag-ampo para sa among pamilya. Kami nabalaka gihapon. Kami matinguhaon kaayo sa labing maayo alang kanila. Sa unsang paagi nga sila ug ang ilang mga anak makapuyo sa labing nindot nga mga panimalay? Ako namalandong bahin sa mga panimalay sa mga miyembro sa Simbahan nga si Kathy ug ako nakahigayon sa pagbisita. Kami nadapit ngadto sa mga panimalay didto sa Korea ug Kenya, sa Pilipinas ug Peru, sa Laos ug Latvia. Tuguti ko nga mopaambit og upat ka obserbasyon mahitungod sa kinanindotang mga panimalay.

Una, gikan sa panglantaw sa Ginoo, ang pag-establisar sa labing nindot nga mga panimalay dunay kalabutan sa personal nga mga kalidad sa mga tawo nga nagpuyo diha. Kining mga panimalay wala napanindot sa bisan unsang importante o molungtad nga paagi tungod sa ilang mga kasangkapan sa panimalay o pinaagi sa net worth o sosyal nga kahimtang sa mga tawo nga nanag-iya niini. Ang labing nindot nga matang sa bisan unsang panimalay mao ang imahe ni Kristo nga makita sa mga nagpuyo. Unsay importante mao ang pangsulod nga kinaiya sa mga kalag sa nagpuyo, dili ang estraktura mismo.

Ang mga hiyas ni Kristo maangkon diha sa “proseso sa panahon”¹ pinaagi sa tinuyo nga pag-uswag subay sa dalan sa pakigsaad. Ang Kristohanon nga hiyas modayan-dayan sa mga kinabuhi niadtong kinsa naningkamot sa pagpakabuhi uban sa kamaayo. Kini mopuno sa mga panimalay sa kahayag sa ebanghelyo, bisan pa ang salog gama sa lapok o marmol. Bisan kon ikaw lang ang tawo sa inyong panimalay nga nagsunod sa pahimangno sa “pagpangita niini nga mga butang,”² ikaw nakatampo sa espirituhanong mga kagamitan sa inyong pamilya nga panimalay.

Kita nagsunod sa tambag sa Ginoo nga “[ihan-ay] ang [atong mga kaugalingon]; [andamon] ang matag butang nga kinahanglanon; ug [magtukod] og usa ka balay,” pinaagi sa paghan-ay, pagpangandam, ug pag-establisar sa atong espiritual nga kinabuhi, dili ang atong kabtangan. Kon mapailubon kita nga magsubay sa dalan sa pakigsaad sa Manluluwas, ang atong mga panimalay mahimong “usa ka balay sa himaya, usa ka balay sa kahusay, [ug] usa ka balay sa Dios.”³

Ikaduha, ang mga residente sa labing nindot nga mga panimalay mogahin og panahon sa pagtuon sa kasulatan ug sa mga pulong sa buhing mga propeta sa matag adlaw. Si Presidente Russell M. Nelson midapit kanato sa “pag-usab” ug “pagbag-o” sa atong mga panimalay pinaagi sa pagtuon sa ebanghelyo.⁴ Ang Iyang pagdapit moila nianang kinanindotang mga panimalay nga pinuy-anan sa malumo, buhat nga mahinungdanon sa personal nga paglambo ug moayo sa atong mga kahuyang. Ang inadlaw nga paghinulsol mao ang himan sa transpormasyon nga makapahimo kanato sa paglambo og diyutay nga kamabination, mas mahigugmaon, ug mas masinabtanon. Ang pagtuon sa mga kasulatan makapaduol kanato ngadto sa Manluluwas, kansang manggihatagon nga gugma ug grasya makatabang kanato sa atong pagtubo.

Ang Biblia ug ang Basahon ni Mormon ug Ang Perlas nga Labing Bililhon nagsugilon kabahin sa pamilya, mao nga dili ikahibulong nga kadtong balaanon nga kadaghanon dili ikatandi sa mga tamdanan nga basahon para sa pagtukod og labing nindot nga mga panimalay. Kini nagtala sa kabalaka sa mga ginikanan, sa mga kakuyaw sa tintasyon, ang kalampusan sa pagkamatarung, sa mga pagsulay sa kagutom ug kaabunda, ug sa kabangis sa gubat ug mga ganti sa kalinaw. Gibalik-balik sa mga kasulatan sa pagpakita nato kon giunsa sa mga pamilya nga milampos pinaagi sa matarung nga pagpakabuhi ug sa unsang paagi nga sila napukan tungod sa pagsubay sa laing dalan.

Ikatulo, ang nindot nga panimalay mosunod sa plano nga gimugna sa Ginoo alang sa Iyang labing nindot nga panimalay, ang templo. Ang pagtukod og usa ka templo magsugod sa nag-unang mga lakang—paghawan sa mga sagbot ug pagpatag sa yuta. Kadtong pasiunang mga paningkamot sa pag-andam sa luna tingali ikatandi sa paghupot sa sukaranang mga kasugoan. Ang mga kasugoan mao ang pundasyon diin ang pagkadisipulo matukod. Ang makanunayon nga pagkadisipulo modala kanato sa pagkahimong ligdong, makanunayon, ug dili matarug,⁵ sama sa puthaw nga bayanan alang sa templo. Kining lig-on nga bayanan nakapahimo sa Ginoo sa pagpadala sa Iyang Espiritu aron sa pag-usab sa atong mga kasingkasing.⁶ Ang pagsinati og dakong kausaban sa kasingkasing sama sa pagdugang og matahum nga hiyas(disenyo) sa sulod sa usa ka templo.

Kon kita mopadayon diha sa hugot nga pagtuo, ang Ginoo sa hinay-hinay nga mousab kanato. Atong madawat ang Iyang imahe sa atong mga panagway ug mosugod sa pagpamalandong sa gugma ug katahum sa Iyang kinaiya.⁷ Samtang kita mamahimong sama Kaniya, mobati kita og kahupay diha sa Iyang panimalay, ug Siya mobati og kahupay sa atong kaugalingon.

Kita makapabilin sa atong suod nga koneksyon sa panimalay ngadto sa Iyang panimalay pinaagi sa pagpasarang ug sa kanunayng paggamit og usa ka rekomend sa templo kutob sa itugot sa kahigayunan. Sa atong pagbuhat sa ingon, ang kabalaan sa balay sa Ginoo mopuyo usab diha sa atong balay.

Ang maanindot kaayo nga Salt Lake Temple nagbarug sa duol. Natukod pinaagi sa mga pioneer gamit ang mantiner nga mga kahimanan, lokal nga mga materyales, ug walay katapusang grabing pagtrabaho, ang templo gitukod gikan niadtong 1853 hangtud 1893. Ang labing maayo nga gikadalit sa mga miyembro sa Simbahan sa pagka-inhenyero, arkitektura, ug sa pangsulod nga disenyo nakapahimo sa usa ka obra maestra nga giila sa minilyon.

Dul-an sa 130 ka tuig na ang milabay sukad ang templo napahinungod. Sama sa nahisgutan ni Elder Gary E. Stevenson gahapon, ang mga baruganan sa pagka-inhenyero nga gigamit sa pagdisenyo sa templo napulihan sa mas bag-o, mas luwas nga mga sumbanan. Ang kapakyas sa pagpalambo sa pag-inhenyero sa templo ug sa pag-ayo sa mga huyang nga estraktura magsilbing pagluib sa pagsalig sa mga pioneer, kinsa mihimo sa tanan ug dayon mitugyan sa pag-atiman sa templo ngadto sa misunod nga mga henerasyon.

Ang Simbahan mipadayon sa proyekto nga upat ka tuig nga pagpahiuli aron sa pagpalambo sa estraktura sa templo ug sa kalig-on batok sa paglihok sa yuta (seismic).⁸ Ang pundasyon, mga salog, ug mga bungbong gipalig-on. Ang labing maayo nga kahibalo sa pagka-inhenyero nga anaa karon makasarang sa templo ngadto sa moderno nga mga sumbanan. Kita dili makahimo sa pagtan-aw sa mga kausaban sa estraktura, apan ang mga epekto niini mahimong tinuod ug importante. Sa tanan niining buhat, ang matahum nga disenyo sa pangsulod nga bahin sa templo gitagana.

Kita kinahanglan mosunod sa ehemplo nga nahatag ngari kanato pinaagi sa pagpabag-o sa Salt Lake Temple ug mogahin og panahon sa pagtimbang-timbang sa atong kaugalingong espirituhanong pang-inhenyero nga kalig-on aron sa pagsiguro nga kini kanunayng bag-o. Ang matag karon ug unya nga pagsusi sa kaugalingon, inubanan sa pagpangutana sa Ginoo, “Unsa pay akong kulang?”⁹ makatabang sa matag-usa nato nga makatampo sa pagtukod sa kinanindotang panimalay.

Ikaupat, ang labing nindot nga mga panimalay mao ang mga dangpanan gikan sa mga unos sa kinabuhi. Ang Ginoo misaad nga kadtong kinsa maghupot sa mga sugo sa Dios “mouswag diha sa yuta.”¹⁰ Ang kauswagan sa Dios mao ang gahum sa pagpadayon bisan sa mga problema sa kinabuhi.

Niadtong 2002 nakat-on ko og usa ka importante nga leksyon mahitungod sa mga problema. Samtang didto sa Asunción, Paraguay, nakighimamat ko sa mga presidente sa stake sa siyudad. Nianang panahona, ang Paraguay nagsagubang og grabing krisis nga pinansyal, ug daghang mga miyembro sa Simbahan ang nag-antus ug dili na makapalit sa panginahanglan. Wala pa ko nakaadto sa South America sukad sa akong misyon ug wala pa gayud nakaadto sa Paraguay. Nakaserbisyo ko diha sa Kapangulohan sa Area sulod pa lang sa pipila ka semana. Maduha-duhaon mahitungod sa akong kawalay abilidad sa paggiya niadtong mga presidente sa stake, mihangyo ko nila sa pagsulti kanako kon unsay maayong nahitabo sa ilang mga stake. Ang unang presidente sa stake misulti nako mahitungod sa mga butang nga maayong nahitabo. Ang sunod naghisgot sa mga butang nga maayong nahitabo ug pipila ka mga problema. Sa higayon nga naabut na kami sa katapusang presidente sa stake, siya naghisgut lang og mga serye sa makapungot nga mga hagit. Samtang nagpasabut ang mga presidente sa stake sa kagrabe sa sitwasyon, nag-anam ko og kabalaka, hapit nadesperado, kabahin sa unsa ang isulti.

Sa dihang ang katapusang presidente sa stake mahuman na sa iyang mga komento, adunay misantop sa akong hunahuna: “Elder Clayton, pangutan-a sila: ‘Mga presidente, sa mga miyembro sa inyong stake nga nagbayad og hingpit nga ikapulo, nagbayad og madagayaong halad sa puasa, nagbuhat sa ilang mga calling sa Simbahan, naghimo gayud sa ilang pagbisita sa mga pamilya isip mga home teacher o mga visiting teacher¹¹ matag bulan, nagpahigayon og home evening, nagtuon sa mga kasulatan, ug nag-ampo isip pamilya sa matag adlaw, pila man nila ang dunay problema nga dili sila makasulbad sa ilang kaugalingon nga dili kinahanglan moapil ang Simbahan ug mosulbad sa ilang mga problema alang kanila?’”

Misunod sa impresyon nga akong nadawat, akong gipangutana ang mga presidente sa stake niana nga pangutana.

Mitan-aw sila nako sa nasurprisa nga kahilum ug dayon miingon, “Pues, ninguno,” pasabut nga, “Kuan, wala.” Dayon misulti sila nako nga wala sa mga miyembro nga nagbuhat sa tanan niadtong butang nga adunay mga problema nga dili sila makahimo pagsulbad sa ilang kaugalingon. Ngano? Tungod kay sila nagpuyo sa labing nindot nga mga panimalay. Ang ilang matinud-anon nga pamuyo nakahatag kanila og kusog, panan-awon, ug langitnong tabang nga ilang gikinahanglan sa paglahutay sa ekonomikanhong kalisdanan nga nagpalibut kanila.

Kini wala nagpasabut nga ang matarung dili na masakit, mag-antus og aksidente, magsagubang og pagkaparot sa negosyo, o magsagubang og daghan pang kalisdanan sa kinabuhi. Ang mortalidad kanunayng dunay mga hagit, apan sa matag karon ug unya ako nakakita nga kadtong naningkamot sa pagtuman sa mga sugo mao ang mabulahan sa ilang pagpadayon inubanan sa kalinaw ug paglaum. Kadto nga mga panalangin, maanaa alang sa tanan.¹²

Si David namahayag, “Gawas nga ang Ginoo magatukod sa balay, kawang lamang ang kahago niadtong mga nagtukod niini”¹³ Bisan asa man mo nagpuyo, bisan unsa man ang hitsura sa inyong balay, ug bisan unsa man ang komposisyon sa inyong pamilya, kamo makatabang sa pagtukod sa kinanindotan nga panimalay alang sa inyong pamilya. Ang gipahiuli nga ebanghelyo ni Jesukristo naghatag sa mga plano alang niana nga panimalay. Ang Manluluwas mao ang hingpit nga inhenyero, tigtukod, ug ang pangsulod nga tigdisenyo. Ang Iyang proyekto mao ang pagkahingpit ug ang mahangturong kalipay sa atong mga kalag. Uban sa Iyang mahigugmaong tabang, ang inyong mga kalag mahimong mao lang ang Iyang gusto nga mamahimo ug kamo mahimong ang labing maayong bersyon sa inyong kaugalingon,andam sa pagtukod ug pagpuyo sa usa ka labing nindot nga panimalay.

Ako mapasalamaton nga mopamatuod nga ang Dios ug Amahan natong tanan buhi. Ang Iyang Anak, ang Ginoong Jesukristo, mao ang Manluluwas ug Manunubos sa tanang katawhan. Sila nahigugma kanato sa hingpit. Ang Simbahan ni Jesukristo sa mga Santos sa Ulahing mga Adlaw mao ang gingharian sa Ginoo dinhi sa yuta. Ang mga buhing propeta ug mga apostoles naggiya niini karon. Ang Basahon ni Mormon tinuod. Ang gipahiuli nga ebanghelyo ni Jesukristo mao ang hingpit nga blueprint sa pagtukod og labing nindot nga panimalay. Sa ngalan ni Jesukristo, amen.