Elder Jeremy R. Jaggi

Sa dihang si Elder Jeremy R. Jaggi tin-edyer pa, ang iyang siyete anyos nga igsoong babaye, si Kristen, natakbuyan og kagaw nga miataki sa iyang utok. Ang mga doktor miingon nga dili na siya maluwas.

Ang batan-ong si Jeremy miluhod tupad sa iyang higdaanan diha sa panimalay sa pamilya sa Siyudad sa Salt Lake, Utah, USA, ug nangamuyo sa Ginoo aron masayud nganong kinahanglang mamatay ang iyang igsoon nga bata pa kaayo. Hinoon, ang iyang igsoong babaye nakadawat og panalangin sa pagkapari ug nabuhi.

Nakaaghat kini sa 17 anyos nga si Jeremy nga “tarungon ang iyang kaugalingon ngadto sa Dios,” nga miduso kaniya sa seryusong pagbasa sa Basahon ni Mormon sa unang higayon. Sa wala madugay miserbisyo siya isip full-time nga misyonaryo sa Ohio Cleveland Mission.

Si Jeremy mobalik sa pagluhod diha sa kinasingkasing nga pag-ampo paglabay sa mga katuigan samtang ang iyang asawa, si Amy, nagbati sa ilang ikatulong anak nga kulang sa bulan. “Nianang higayona, mibati ko og hilabihang kalinaw—kalinaw nga mahulagway lamang isip ang mahigugmaong mga bukton sa Langitnong Amahan nga miliyok kanako uban sa kainit sa Espiritu Santo,” miingon siya.

Kana nga kalinaw nakatabang kaniya tadlas sa mubong panahon nga nabuhi ang bata ug sa mga bulan sa kasubo nga misunod sa laing pagkakuha sa bata [miscarriage]. “Kitang tanan sulayan sa atong kaugalingong paagi,” miingon siya, “apan kami sa gihapon ‘[miisip] nga maoy tumang kalipay’ [Santiago 1:2] nga ang Manluluwas mihatag og paagi alang kanamo nga makabaton og kalinaw ug kalipay.”

Si Jeremy Robert Jaggi natawo sa Siyudad sa Salt Lake, Utah, USA, niadtong Marso 23, 1973, ngadto kang Robert Stanley Jaggi ug Judy Anne Roos. Giminyoan niya si Amy Anne Stewart didto sa Salt Lake Temple niadtong Hunyo 12, 1995. Mga ginikanan sila sa lima ka anak.

Si Elder Jaggi nakadawat og bachelor of science degree sa behavioral science and health gikan sa University of Utah ug executive master of business administration degree gikan sa Pepperdine University. Siya ang nangulo sa regional sales alang sa Alkermes ug nagdumala sa komersyal nga real estate sa HCA Investments sa panahon sa iyang pagkatawag.

Si Elder Jaggi nakaserbisyo isip Area Seventy, presidente sa Utah Ogden Mission, assistant executive secretary sa stake, bishop, presidente sa elders quorum, magtutudlo sa seminary, magtatambag sa kapangulohan sa Young Men sa ward, magtutudlo sa pagpangandam sa misyonaryo sa stake, ug ward mission leader.