Elder Jorge T. Becerra

Si Jorge T. Becerra maulawon ug hilumon samtang nagdako, apan ang iyang mission president mihatag kaniya og mga oportunidad sa pagpangulo. Si Jorge miuli gikan sa California Arcadia Mission uban sa tinguha nga moapil sa buhat sa Ginoo sa tibuok niyang kinabuhi.

Dugang nga mga oportunidad sa pagpangulo sayo nga miabut kay sa iyang gilauman. Sa edad nga 27, gitawag siya ngadto sa bishopric. Sa edad nga 32, gitawag siya isip bishop. Sa sinugdanan mibati siya nga dili angayan samtang ang mga tawo miduol kaniya uban sa ilang mga hagit.

“Wala koy ideya unsay akong gibuhat,” misulti siya sa iyang amahan.

Ang tubag sa iyang amahan mitudlo kaniya og usa ka gamhanang leksyon, mipahinumdom kaniya sa pagsalig sa iyang mission president kaniya, ug mitabang kaniya sa pagpangandam alang sa umaabut nga mga calling sa pagpangulo, lakip na ang iyang calling isip presidente sa stake sa edad nga 37.

“Ang akong amahan miingon, ‘Anak, pilay edad sa Espiritu Santo?’” Mihinumdom si Elder Becerra. “Usa kadto ka talagsaong higayon sa pagtulun-an alang kanako tungod kay nasayud ko nga makahimo ko sa bisan unsa nga isugo sa Ginoo kanako.”

Kana nga leksyon nagpabilin kang Elder Becerrea sulod sa daghang katuigan sa kinasingkasing nga pagserbisyo diha sa Ang Simbahan ni Jesukristo sa mga Santos sa Ulahing mga Adlaw.

Si Jorge Eduardo Torres Becerra natawo niadtong Disyembre 18, 1962, ngadto kang Juan C. Becerra ug Celia T. Becerra sa Siyudad sa Salt Lake, Utah, USA, diin siya nagdako.

Human makaserbisyo og full-time nga misyon, si Elder Becerra naminyo kang Debbie Ilene Schneberger diha sa Salt Lake Temple niadtong Agosto 10, 1984. Mga ginikanan sila sa upat ka anak.

Si Elder Becerra nakadawat og degree sa general studies gikan sa University of Utah ug usa ka associate of arts degree sa accounting gikan sa Salt Lake Community College. Nakatuon usab siya og negosyo sa University of Phoenix. Niadtong 1998 nahimo siya nga usa ka partner sa Allegis Advisor Group, usa ka kompaniya nga tigtambag kalabut sa pinansyal. Sa panahon sa iyang pagkatawag isip General Authority Seventy, nagtrabaho siya isip investment adviser alang sa Intermountain Financial Partners.

Si Elder Becerra nakaserbisyo isip presidente sa Young Men sa ward, magtatambag sa kapangulohan sa misyon, magtatambag sa kapangulohan sa branch, magtutudlo sa seminary, magtatambag sa bishopric, bishop, presidente sa stake, ug presidente sa California Arcadia Mission. Sa panahon sa iyang pagkatawag, nagserbisyo siya isip Area Seventy.