Elder Moisés Villanueva

Siya 10 anyos pa lang niadtong panahona, apan si Elder Moisés Villanueva wala gayud makalimot sa iyang gibati sa dihang ang mga misyonaryo mitudlo kaniya ug sa iyang pamilya sa ebanghelyo didto sa Oaxaca, Mexico.

“Nakahinumdom ko sa Espiritu nga ilang gibilin, ang kalinaw nga akong gibati sa akong kasingkasing,” miingon siya.

Sa dihang si Moisés gibunyagan uban sa upat sa iyang mga igsoon, ang iyang inahan—usa ka single parent nga nagpadako ni Moisés ug sa iyang pito ka igsoon sa lisud nga mga kahimtang—mibalik sa pagkaaktibo sa Simbahan.

Wala madugay, samtang ang 18 anyos nga si Moisés nangandam alang sa iyang misyon, ang iyang pamilya mipadayon sa pag-atubang og temporal nga mga hagit. Nagduha-duha siya sa iyang desisyon nga mobiya ug iyang gisultihan ang iyang mama nga gusto niyang magpabilin sa balay aron motabang kaniya.

“Kon gusto gayud nimo nga motabang kanako,” miingon siya, “lakaw ug pagserbisyo sa Ginoo.”

Nagluhod tapad sa iyang higdaanan sa pagtapos sa iyang unang adlaw sa Mexico Hermosillo mission, gibati ni Moisés nga ang Ginoo nahimuot sa iyang desisyon. Iyang gipahinungod sa iyang misyon ang paglambo sa iyang pagpamatuod sa gipahiuli nga ebanghelyo.

“Kini nga Simbahan gipangulohan sa atong Manluluwas nga si Jesukristo,” miingon si Elder Villanueva. “Nakaila Siya sa ngalan sa matag usa kanato. Nasayud Siya sa atong mga panginahanglan, atong mga hagit, ug atong mga kabalaka. Nasayud usab Siya sa atong mga kalig-on ug bisan sa mga tinguha sa atong kasingkasing.”

Si Moisés Villanueva López natawo niadtong Disyembre 13, 1966, sa Oaxaca, Oaxaca, Mexico, ngadto kang Rubén Villanueva Platas ug Delfina López Domínguez. Giminyoan niya si Leticia Ávalos Lozano sa Mexico City Mexico Temple niadtong Hunyo 30, 1995. Sila adunay tulo ka anak.

Si Elder Villanueva nakaangkon og bachelor‘s degree in business administration gikan sa Southeast Regional University niadtong 1997 ug master’s degree in innovation for business improvement gikan sa Tecnológico de Monterrey niadtong 2011. Sa labing ulahi nagtrabaho siya isip chief executive officer sa Sertexa, usa ka kompaniya sa transportasyon.

Sa panahon sa iyang pagkatawag, si Elder Villanueva nagserbisyo isip Area Seventy sa Mexico. Nakaserbisyo usab siya isip presidente sa California Arcadia Mission ug isip high councilor, magtatambag sa kapangulohan sa stake, bishop, ug direktor sa public affairs.