Halandumon nga mga Higayon sa Komperensya

Si Presidente Nelson mipahibalo sa usa ka bag-ong simbolo alang sa Simbahan (tan-awa sa pahina 73). Ang simbolo naglakip sa ngalan sa Simbahan nga nasulod sa usa ka rektangulo, nga nagrepresentar sa usa ka bato sa pamag-ang. Ibabaw niana nagbarug ang Christus nga estatuwa ilawom sa usa ka arko, nga nagpahinumdom kanato sa Manluluwas ug sa Iyang walay sulod nga lubnganan.

Si Presidente Nelson mibasa sa “Ang Pagpahiuli sa Kahingpitan sa Ebanghelyo ni Jesukristo: Usa ka Pamahayag ngadto sa Kalibutan sa Ikaduhang Siglo nga Kasaulogan,” nga nagdapit sa mga tawo bisan asa nga magkat-on nga ang ebanghelyo ni Jesukristo nga gihisgutan diha sa Bag-ong Tugon anaa na usab sa yuta karon. Ang opisyal nga hubad makita sa sulod sa atubangang hapin niini nga isyu sa 12 ka pinulongan. Ang mga miyembro nga naghulat pa og opisyal nga paghubad makakita og pasiuna nga mga hubad sa pamahayag diha sa pakigpulong ni Presidente Nelson (tan-awa sa pahina 91).

Usa ka “maligdong nga katiguman” gipahigayon sa Dominggo sa buntag isip kabahin sa ikaduhang siglo nga kasaulogan sa Simbahan sa Unang Panan-awon. Atol niining sagrado nga miting, si Presidente Nelson nangulo sa mga Santos sa Singgit sa Hosanna, usa ka hiniusa nga pagpahayag og pagdayeg nga gigamit sa espesyal nga mga kalihokan sama sa mga pagpahinungod og templo (tan-awa sa pahina 92).

Alang sa ikaduhang higayon sulod sa siyam ka adlaw, si Presidente Nelson midapit sa kalibutan sa pagpuasa ug pag-ampo “nga ang kasamtangang pandemic unta makontrolar, ang mga tig-atiman mapanalipdan, ang ekonomiya mapalig-on, ug ang kinabuhi mahimong normal” (pahina 74). Kining ikaduha nga tibuok kalibutan nga puasa nahitabo niadtong Biyernes Santo, Abril 10, 2020.

Si Presidente Nelson mipahibalo sa mga plano sa pagtukod og walo ka bag-ong templo sa tibuok kalibutan (tan-awa sa pahina 115). Adunay 168 ka napahinungod na nga templo sa tibuok kalibutan, og 7 niana ang ubos sa pagpabag-o.

Ang Sabado sa gabii nga sesyon nagpakita og mga pakigpulong gikan sa duha ka tin-edyer, si Laudy Ruth Kaouk ug Enzo Serge Petelo, kinsa namulong mahitungod sa paagi nga ang pagkapari nagpanalangin sa kabatan-onan (tan-awa sa mga pahina 56 ug 58). Sobra na sa 20 ka tuig sukad ang mga mamumulong gikan sa kabatan-onan gilakip sa kinatibuk-ang komperensya.

Ang mga musika alang sa komperensya girekord nang daan. Ang mga Santos sa tibuok kalibutan mitapos sa komperensya pinaagi sa pagkanta sa “Salamat, O Dios, sa Propeta” uban sa mga choir sa Ghana, New Zealand, Mexico City, South Korea, Germany, ug Brazil (tan-awa sa pahina 2).