Usa ka Buhi nga Saksi sa Buhi nga Kristo

Sa usa ka init nga adlaw sa tingpamulak niadtong 2017, ang open house alang sa Templo sa Paris France nasugdan na gayud sa dihang ang usa sa mga tour guide giduol sa usa ka tawo nga adunay masulub-ong ekspresyon sa iyang panagway. Siya miingon nga nagpuyo siya duol sa templo ug miangkon nga aktibo siyang misupak sa pagtukod niini. Siya misaysay nga usa ka adlaw samtang naglantaw siya gikan sa bintana sa iyang apartment, nakakita siya og dakong crane nga mipaubos sa estatuwa ni Jesus gikan sa taas ug hinay nga mipahimutang niini diha sa nataran sa templo. Ang tawo namahayag nga kini nga kasinatian hingpit nga miusab sa iyang mga pagbati sa atong Simbahan. Siya nakaamgo nga mga sumusunod kita ni Jesukristo ug nangayo sa atong pagpasaylo alang sa miaging kadaut nga tingali iyang nahimo.

Imahe

Estatuwa nga gipahimutang sa Templo sa Paris France

Ang estatuwa sa Christus, nga miadorno sa nataran sa Templo sa Paris ug sa ubang mga kabtangan sa Simbahan, nagpamatuod sa atong gugma alang sa Manluluwas. Ang orihinal nga estatuwa nga marmol mao ang buhat sa Danish nga artist nga si Bertel Thorvaldsen, kinsa mikulit niini niadtong 1820—ang samang tuig sa Unang Panan-awon. Ang estatuwa nagbarug nga lahi kaayo sa kasagaran sa artistikong mga binuhat nianang panahona, nga nagpakita gayud sa nag-antus nga Kristo diha sa krus. Ang buhat ni Thorvaldsen nagpresentar sa buhi nga Kristo, kinsa nagmadaugon batok sa kamatayon ug, uban sa bukas nga mga bukton, nagdapit sa tanan nga moduol Kaniya. Bugtong ang mga agi sa lansang diha sa Iyang mga kamot ug mga tiil ug ang samad diha sa Iyang kilid ang nagmatuod sa dili mahulagway nga paghingutas nga Iyang naagian aron luwason ang katawhan.

Imahe

Ang kamot sa Manluluwas sigun sa gipakita diha sa Christus

Tingali ang usa ka rason nga kita isip mga miyembro sa Ang Simbahan ni Jesukristo sa mga Santos sa Ulahing mga Adlaw ganahan niining estatuwa mao nga nagpahinumdom kini kanato sa deskripsyon nga gihatag diha sa Basahon ni Mormon bahin sa pagpakita sa Manluluwas sa kontinente sa Amerika:

Imahe

Si Jesukristo mibisita sa Amerika

“Ug tan-awa, sila nakakita og usa ka Tawo nga mikunsad gikan sa langit; ug siya nagsul-ob og puti nga kupo; ug siya nanaog ug mibarug sa ilang taliwala. …

“Ug nahinabo nga siya mituy-od sa iyang kamot ug namulong ngadto sa mga katawhan, nag-ingon:

“Tan-awa, Ako mao si Jesukristo, …

“… Ug Ako nakainom gikan sa pait nga kopa nga gihatag sa Amahan ngari kanako, ug gihimaya ang Amahan sa akong pagpas-an sa mga sala sa kalibutan.”¹

Dayon Iyang gidapit ang matag lalaki, babaye, ug bata nga moduol ug mohikap sa Iyang kilid ug mobati sa mga agi sa lansang diha sa Iyang mga kamot ug mga tiil, sa ingon nakadawat og personal nga pagsaksi nga Siya sa pagkatinuod mao ang dugay nang gipaabut nga Mesiyas.²

Kining talagsaon nga talan-awon mao ang labing mahinungdanong talan-awon diha sa Basahon ni Mormon. Ang tibuok nga “maayong balita” sa ebanghelyo anaa niining imahe sa Manluluwas nga malumong mipatuyhad sa Iyang “mga bukton sa kalooy”³ aron pagdapit sa matag indibidwal nga moduol Kaniya ug modawat sa mga panalangin sa Iyang Pag-ula.

Ang labing mahinungdanong mensahe sa Basahon ni Mormon mao ang pagpahiuli sa tinuod nga kahibalo bahin sa mahinungdanong tahas ni Jesukristo sa kaluwasan ug kahimayaan sa katawhan. Kini nga tema milanog gikan sa pasiunang pahina hangtud sa katapusan gayud nga mga pulong sa katapusang kapitulo. Sulod sa mga siglo sa apostasiya ug espiritwal nga kalibug, ang mas lawom nga kahulugan sa unsay gibuhat ni Kristo didto sa Getsemani ug sa Golgota nawala o nausab. Unsa kaha kamahinamon si Joseph Smith sa dihang, samtang naghubad siya sa 1 Nephi, nadiskubrihan niya kining talagsaong saad: “Kini nga katapusan nga mga talaan [ang Basahon ni Mormon] … motukod sa kamatuoran sa nahauna [ang Biblia] … ug motug-an sa yano ug bililhon nga mga butang nga gikuha gikan kanila; ug motug-an ngadto sa tanan nga mga kaliwatan, mga pinulongan, ug mga katawhan, nga ang Kordero sa Dios mao ang Anak sa Amahan sa Kahangturan, ug ang Manluluwas sa kalibutan; ug nga ang tanan nga mga tawo kinahanglan gayud nga moduol ngadto kaniya, o sila dili maluwas.”⁴

Ang yano ug bililhon nga mga kamatuoran mahitungod sa Pag-ula sa Manluluwas makita sa tibuok Basahon ni Mormon. Samtang naglista ko sa pipila niining mga kamatuoran, gidapit nako kamo nga mamalandong kon sa unsang paagi kini nakausab o makausab sa inyong kinabuhi.

1. Ang Pag-ula ni Jesukristo usa ka libre nga gasa nga gitanyag ngadto sa tanan kinsa na- kapuyo, kinsa kasamtangang nagpuyo, ug kinsa mo- puyo pa dinhi sa yuta.⁵

2. Agig dugang sa pagdala sa kabug-at sa atong mga sala, gidala ni Kristo sa Iyang kaugalingon ang atong mga kasub-anan, mga kahuyang, mga pag-antus, ug mga balatian ug tanang kalisdanan nga dala sa mortal nga kondisyon sa tawo. Walay kaguol, kasakit, o kasub-anan nga wala Niya giantus alang kanato.⁶

3. Ang maulaong sakripisyo sa Manlulwuas nagtugot kanato nga mabuntog ang negatibong mga sangputanan sa Pagkapukan ni Adan, lakip na ang pisikal nga kamatayon. Tungod ni Kristo, tanang anak sa Dios nga natawo dinhi sa yuta, bisan unsa pa ang ilang katarung, makasinati sa paghiusa sa ilang mga espiritu ug mga lawas pinaagi sa gahum sa Pagkabanhaw⁷ ug mobalik ngadto Kaniya nga “gipanaghukman … pinasikad sa ilang binuhatan.”⁸

4. Sa pikas bahin, ang pagdawat sa hingpit nga mga panalangin sa Pag-ula sa Manluluwas nagdepende sa atong kakugi⁹ sa pagsunod sa “doktrina ni Kristo.”¹⁰ Sa iyang damgo, nakakita si Lehi sa “higpit ug pig-ot nga agianan”¹¹ nga nagpaingon sa kahoy sa kinabuhi. Ang bunga niini, nga nagrepresentar sa gugma sa Dios sigun sa gipahayag pinaagi sa hilabihan katalagsaon nga mga panalangin sa Pag-ula ni Kristo, “labing bililhon ug labing madanihon … [ug] mao ang labing mahinungdanon sa tanan nga mga gasa sa Dios.”¹² Aron makabaton niini nga bunga, kinahanglan gayud kitang mopakita og hugot nga pagtuo diha ni Jesukristo, maghinulsol, “mopatalinghug sa pulong sa Dios,”¹³ modawat sa mahinungdanong mga ordinansa, ug motuman sa sagradong mga pakigsaad hangtud sa katapusan sa atong kinabuhi.¹⁴

5. Pinaagi sa Iyang Pag-ula, wala lamang hugasi ni Jesukristo ang atong mga sala, apan misangkap usab Siya og makahatag og katakus nga gahum nga pinaagi niini ang Iyang mga disipulo mahimong “[mosalikway sa] kinaiyanhon nga pagkatawo,”¹⁵ mouswag “pagtulun-an human sa usa ka pagtulun-an,”¹⁶ ug molambo sa pagkabalaan¹⁷ aron usa ka adlaw mahimo silang hingpit nga mga binuhat diha sa imahe ni Kristo,¹⁸ mahimong sarang nga mopuyo pag-usab uban sa Dios¹⁹ ug mapanunod ang tanang panalangin sa gingharian sa langit.²⁰

Laing makahupay nga kamatuoran nga anaa sa Basahon ni Mormon mao nga, bisan kon kini walay kinutuban ug malukpanon, ang Pag-ula sa Ginoo sa talagsaong paagi personal ug hinasa nga gasa, nga moangay sa matag usa kanato.²¹ Sama sa pagdapit ni Jesus sa matag usa sa Nephite nga mga disipulo nga mobati sa Iyang mga samad, namatay Siya alang sa matag usa kanato, sa personal nga paagi, sama nga kamo o ako ra ang tawo sa yuta. Iyang gipadangat kanato ang personal nga pagdapit nga moduol Kaniya ug mogamit sa talagsaong mga panalangin sa Iyang Pag-ula.²²

Ang personal nga kahimtang sa Pag-ula ni Kristo nahimong mas tinuod pa samtang atong ikonsiderar ang mga ehemplo sa talagsaong mga lalaki ug mga babaye diha sa Basahon ni Mormon. Lakip kanila mao si Enos, Alma, Zeezrom, Haring Lamoni ug ang iyang asawa, ug ang katawhan ni Haring Benjamin. Ang ilang mga istorya sa pagkakabig ug gamhanang mga pagpamatuod naghatag og buhi nga pagsaksi kon sa unsang paagi nga ang atong kasingkasing ug ang atong kinabuhi mausab pinaagi sa walay kinutuban nga kaayo ug kalooy sa Ginoo.²³

Si propeta Alma nangutana sa iyang katawhan niining importante nga pangutana. Siya miingon: “Kon kamo nakasinati og usa ka kausaban sa kasingkasing, ug kon kamo mibati sa pag-awit sa awit sa matubsanon nga gugma, ako mangutana, kamo mibati ba karonsa mao?”²⁴ Kini nga pangutana mahinungdanon karon, tungod kay isip mga disipulo sa Ginoo, gikinahanglan nato ang Iyang matubsanong gahum nga mouban kanato, modasig kanato, ug mousab kanato kada adlaw.

Ang pangutana ni Alma mahimo usab nga ipangutana sama niini, kanus-a ang katapusang higayon nga mibati kamo sa makapahimuot nga impluwensya sa Pag-ula sa Manluluwas diha sa inyong kinabuhi? Mahitabo kini kon mobati kamo og “talagsaon ug makapahimuot” nga kalipay²⁵ nga moabut kaninyo nga nagdala og pagsaksi sa inyong kalag nga ang inyong mga sala gipasaylo; o kon ang sakit nga mga pagsulay kalit lang nga mas gaan pas-anon; o kon ang inyong kasingkasing mapahumok ug makahimo kamo sa pagpahayag og pagpasaylo ngadto sa usa ka tawo nga mipasakit kaninyo. O mahitabo kini sa matag higayon nga inyong mabantayan ang inyong kapasidad sa paghigugma ug pagserbisyo sa uban milambo o nga ang proseso sa pagbalaan nakapahimo ninyong lahi nga tawo, nga gipahisama sa ehemplo sa Manluluwas.²⁶

Ako mohatag og pagsaksi nga kining tanang kasinatian tinuod ug mga ebidensya nga ang mga kinabuhi mausab pinaagi sa hugot nga pagtuo diha ni Jesukristo ug sa Iyang Pag-ula. Ang Basahon ni Mormon miklaro ug mipalambo sa atong kahibalo bahin niining langitnong gasa. Samtang magtuon kamo niining libro, inyong madungog ang tingog sa buhi nga Kristo nga nagdapit kaninyo nga moduol Kaniya. Ako mosaad nga kon dawaton ninyo kining pagdapit ug ipahisama ang inyong kinabuhi sa Iyang ehemplo, ang Iyang makapatubos nga impluwensya moabut sa inyong kinabuhi. Pinaagi sa gahum sa Espiritu Santo, ang Manluluwas mousab kaninyo kada adlaw “hangtud sa hingpit nga adlaw”²⁷ kon kamo, sama sa Iyang gipamahayag, “makakita sa akong panagway ug masayud nga Ako mao.”²⁸ Sa ngalan ni Jesukristo, amen.