ដកពិសោធន៍អំណាចបព្វជិតភាព
ស្ត្រីដែលជួយដឹកនាំសាសនាចក្រត្រូវបានសួរអំពីរបៀបដែលអំណាចនៃបព្វជិតភាពជះឥទ្ធិពលដល់ជីវិតរបស់ពួកគេ ។ ទាំងនេះគឺជាគំនិតមួយចំនួនដែលពួកគេបានចែកចាយ ។
រចនារូបភាពដោយ ម៉ាធីស ហេលស៍
« បុរស និងស្ត្រីមានទំនួលខុសត្រូវខុសគ្នា ប៉ុន្តែស្មើគ្នានៅក្នុងគេហដ្ឋាន និងសាសនាចក្រ ។ អំណាចបព្វជិតភាពអាចជួយមនុស្សម្នាក់ៗបំពេញការទទួលខុសត្រូវទាំងនោះសម្រាប់ជាប្រយោជន៍មនុស្សទាំងអស់គ្នា ។
« ដោយសារអំណាចបព្វជិតភាពរបស់ព្រះមាននៅលើផែនដីសព្វថ្ងៃនេះ នោះពរជ័យដ៏អស្ចារ្យទាំងឡាយមានដល់សមាជិកសាសនាចក្រដែលសក្ដិសមទាំងអស់ មិនថាពួកគេចាស់ ឬក្មេង ប្រុស ឬស្រី នៅលីវ ឬរៀបការនោះទេ » ។
—ប្រធាន ចយ ឌី ចូនស៍ ប្រធានអង្គការបឋមសិក្សាទូទៅ
« ការបម្រើពង្រីកព្រលឹងយើង ពង្រីកទស្សនៈរបស់យើងឲ្យទូលំទូលាយ និងអនុញ្ញាតឲ្យយើងទាញយកអំណាចរបស់ព្រះកាន់តែបរិបូរថែមទៀត ។ ព្រះអម្ចាស់ត្រាស់ដឹងពីការណ៍នេះ ហើយសាតាំងក៏ដឹងដូចគ្នាដែរ ។ ក្នុងការព្យាយាមយ៉ាងប្រុងប្រយ័ត្នបំផុតរបស់វា ដើម្បីធ្វើឲ្យយើងឃ្លាតឆ្ងាយពីអំណាចរបស់ព្រះ នោះមារសត្រូវនឹងសន្ធប់លើយើង ឬធ្វើឲ្យយើងមានអារម្មណ៍ថា អ្វីដែលយើងមានដើម្បីផ្ដល់ឲ្យគឺមិនគ្រប់គ្រាន់ទេ ។ …
« … ចូរកុំសង្ស័យនឹងទង្វើនៃសេចក្ដីសប្បុរសឡើយ ។
« ដោយមានចេតនាធ្វើឲ្យការបម្រើដល់មនុស្សដទៃទៀតជាផ្នែកនៃជីវិតរបស់យើង នោះយើងនឹងរកឃើញអាថ៌កំបាំងទាំងឡាយរបស់ព្រះ ។ យើងនឹងរកឃើញភាពសុខសាន្ត រកឃើញកម្លាំង និងបង្កើនអំណាចកាលណាយើងបម្រើព្រះអង្គសង្គ្រោះរបស់យើង គឺព្រះយេស៊ូវគ្រីស្ទ » ។
—ប្រធាន បូនី អេច ខ័រឌុន ប្រធានយុវនារីទូទៅ
« ជាញឹកញាប់ណាស់ ស្ត្រីប្រៀបធៀបខ្លួនឯងជាមួយមនុស្សដទៃទៀត ។ ប៉ុន្តែគ្មានយើងណាម្នាក់មានអារម្មណ៍រីករាយឡើយ ក្នុងការប្រៀបធៀបនោះ ។ ស្ត្រីម្នាក់ៗមានសមត្ថភាព និងទេពកោសល្យបញ្ចូលគ្នាយ៉ាងពិសេស ហើយទាំងអស់នោះគឺជាអំណោយទានដែលព្រះប្រទានឲ្យ ។ ដោយសារតែអ្នក និងខ្ញុំមិនដូចគ្នា—ឬស្ត្រីមួយចំនួនមិនដូចគ្នា—វាពុំធ្វើឲ្យយើងអន់ជាង ឬប្រសើរជាងគ្នានោះឡើយ ។ យើងត្រូវស្វែងរកអំណោយទានរបស់យើង ហើយអភិវឌ្ឈវា ដោយចងចាំថានរណាជាអ្នកប្រទានវាដល់យើង ហើយបន្ទាប់មកប្រើប្រាស់វាសម្រាប់ព្រះរាជបំណងរបស់ទ្រង់ ។ កាលដែលយើងចែកចាយអំណោយទានទាំងឡាយរបស់យើងដើម្បីផ្ដល់ពរដល់អ្នកដទៃ នោះយើងកំពុងដកពិសោធន៍នូវអំណាចនៃបព្វជិតភាពនៅក្នុងជីវិតរបស់យើងហើយ » ។
—ប្រធាន ជីន ប៊ី ប៊ីងហាំ ប្រធានសមាគមសង្គ្រោះទូទៅ
« សូមរកមើលឱកាសជាញឹកញាប់ ដើម្បីបង្កើនការយល់ដឹងរបស់បងប្អូនអំពី ‹ គោលលទ្ធិអំពីបព្វជិតភាព › ។ យើងម្នាក់ៗនឹងត្រូវស្វែងរកការយល់ដឹងនេះដោយខ្លួនឯង ។
« ការសិក្សាបទគម្ពីរ និងពាក្យសម្ដីរបស់ពួកព្យាការីសម័យទំនើប នឹងផ្ដល់ជាគ្រឹះដ៏រឹងមាំដើម្បីឲ្យការចេះដឹងនេះលូតលាស់ឡើង ។ ហើយការគោរពប្រតិបត្តិដល់បទបញ្ញត្តិរបស់ព្រះ និងការរស់នៅដោយពិតត្រង់ចំពោះសេចក្ដីសញ្ញាទាំងឡាយដែលយើងបានធ្វើតាមរយៈពិធីបរិសុទ្ធបព្វជិតភាពទាំងឡាយក៏ដូច្នោះដែរ ។ ការយល់ដឹងគឺត្រូវបានប្រទានដល់យើង « មួយបន្ទាត់ម្តងៗ មួយសិក្ខាបទម្តងៗ » [ នីហ្វៃទី២ ២៨:៣០ ] ។ តាមរយៈវិវរណៈផ្ទាល់ខ្លួន វា ‹ ចុះមក › លើព្រលឹងរបស់យើង ‹ ដូចជាទឹកសន្សើមចុះពីលើមេឃ › [ គោលលទ្ធិ និង សេចក្តីសញ្ញា ១២១:៤៥ ] » ។
—ស៊ីស្ទើរ លីហ្សា អិល ហាកណេស ទីប្រឹក្សាទីមួយក្នុងគណៈប្រធានអង្គការបឋមសិក្សាទូទៅ
« យើងម្នាក់ៗស្ថិតនៅលើការធ្វើដំណើរមួយ ។ … យើងធ្វើដំណើរឆ្លងកាត់ឧបសគ្គនៃចំណងទាក់ទង ឧបសគ្គផ្នែកហិរញ្ញវត្ថុ និងឧបសគ្គខាងសុខភាពផ្លូវចិត្ត និងផ្លូវកាយ ។ យើងធ្វើដំណើរឆ្លងកាត់កិច្ចការដ៏ច្រើនសន្ធឹកសន្ធាប់ និងបញ្ជីការងារដែលត្រូវធ្វើប្រចាំថ្ងៃរបស់យើង ។ ពួកយើងមួយចំនួនអាចនឹងកំពុងធ្វើដំណើរឆ្លងកាត់ទុក្ខសោកយ៉ាងខ្លាំង ឬសូម្បីតែជាភាពឯកោ ឬភាពធុញទ្រាន់ទៀតផង ។ ឧបសគ្គរបស់យើងគឺខុសៗគ្នា ប៉ុន្តែយើងទាំងអស់គ្នាមានវា ។
« ការរក្សាសេចក្ដីសញ្ញារបស់យើង មិនមានន័យថា ឧបសគ្គទាំងនេះនឹងត្រូវដកចេញនោះទេ ប៉ុន្តែវាពិតជាមានន័យថា ព្រះអម្ចាស់សន្យាគង់នៅជាមួយនឹងយើង » ។
—ស៊ីស្ទើរ មីឆែល ឌី ក្រេហ្គ ទីប្រឹក្សាទីមួយក្នុងគណៈប្រធានយុវនារីទូទៅ
« ខ្ញុំប្រមើលមើលអំណាចបព្វជិតភាពជាខ្សែអំបោះពណ៌សរលូនតូចឆ្មា ដែលមកពីព្រះ ហើយរុំចូលក្នុង និងចេញក្រៅ ទៅលើ និងជុំវិញ ដែលហាក់បីដូចជាមានទិសដៅរបស់វាផ្ទាល់នៅក្នុងជីវិតយើង ។ ប៉ុន្តែយូរៗទៅលំនាំដ៏ល្អិតល្អន់ត្រូវបានបង្ហាញ ។ ការរចនានោះគ្របលើអាសនៈរបស់ព្រះ ជាទីកន្លែងដែលបរិសុទ្ធបំផុត ជាកន្លែងដែលយើងចងភ្ជាប់នៅលើផែនដី និងចងភ្ជាប់នៅស្ថានសួគ៌ ។ …
« ពេលណាដែលខ្ញុំឃើញកម្រាលអាសនៈនៅក្នុងព្រះវិហារបរិសុទ្ធ ខ្ញុំមានអារម្មណ៍ថា វាជានិមិត្តសញ្ញាដ៏មានអំណាចបំផុតរបស់ព្រះវិហារបរិសុទ្ធ ជាវិធីដែលព្រះអម្ចាស់ឲ្យបុត្រាបុត្រីដ៏ស្មោះត្រង់របស់ទ្រង់ខ្ចី ដើម្បីប្រមូល និងចងភ្ជាប់ជាមួយគ្នានៅក្នុងការរចនាដ៏ល្អិតល្អន់ ហើយបរិសុទ្ធ » ។
—ស៊ីស្ទើរ សារ៉ុន អូប៊ែង ទីប្រឹក្សាទីមួយនៅក្នុងគណៈប្រធានសមាគមសង្គ្រោះទូទៅ
« តាមរយៈបទពិសោធន៍ជីវិតផ្ទាល់ខ្លួនខ្ញុំ ខ្ញុំដឹងថា ការរក្សាបទបញ្ញត្តិរបស់ព្រះអម្ចាស់ ការមានសេចក្ដីជំនឿ និងការទុកចិត្តលើទ្រង់ទាំងស្រុង ជារបៀបដែលយើងទទួលបានអំណាចបព្វជិតភាពរបស់ទ្រង់ ។ …
« … កាលដែលយើងបន្តស្មោះត្រង់ យើងអាចទទួលបានអំណាចបព្វជិតភាព និងពរជ័យទាំងនោះ នៅក្នុងគ្រប់ទិដ្ឋភាពនៃជីវិតរបស់យើង ។ វាអាចផ្ដល់ដល់យើងនូវការការពារ ការលួងលោម កម្លាំង ភាពសុខសាន្ត និងការសន្យាទាំងឡាយដែលឈោងទៅក្នុងភាពអស់កល្បជានិច្ច ។ តាមរយៈអំណាចបព្វជិតភាព ព្រះវិញ្ញាណបរិសុទ្ធក៏ជួយខ្ញុំឲ្យនឹកឃើញពីបទពិសោធន៍ទាំងឡាយនៅក្នុងជីវិតខ្ញុំ ដែលបន្តស្ថាបនាទីបន្ទាល់ និងសេចក្ដីជំនឿរបស់ខ្ញុំលើព្រះ » ។
—ស៊ីស្ទើរ គ្រីស្ទីណា ប៊ី ហ្វ្រេនកូ ទីប្រឹក្សាទីពីរក្នុងគណៈប្រធានអង្គការបឋមសិក្សាទូទៅ
« ជាច្រើនឆ្នាំបានកន្លងទៅ តាំងពីខ្ញុំបានទទួលពរលោកអយ្យកោរបស់ខ្ញុំ ប៉ុន្តែខ្ញុំចងចាំពីបទពិសោធន៍នោះយ៉ាងរស់រវើក ។ …
« បទពិសោធន៍នោះបានសម្រួចសម្រាំងការសម្រេចចិត្តជាច្រើនដែលខ្ញុំបានធ្វើក្នុងជីវិតខ្ញុំ ។ ខ្ញុំបានដឹងថា ដើម្បីស្គាល់ពរជ័យដែលគួរឲ្យប្រាថ្នាទាំងនោះ ខ្ញុំនឹងត្រូវតែធ្វើផ្នែករបស់ខ្ញុំ ។
« ឥឡូវនេះ ខ្ញុំឃើញថាមានអ្វីច្រើនជាងនេះទៅទៀត ដែលព្រះវរបិតាយើងចង់ឲ្យខ្ញុំទទួលបានច្រើនជាងអ្វីដែលបានចែងនៅក្នុងពរជ័យលោកអយ្យកោរបស់ខ្ញុំទៅទៀត » ។
—ស៊ីស្ទើរ បែកឃី ក្រាវីន ទីប្រឹក្សាទីពីរក្នុងគណៈប្រធានយុវនារីទូទៅ
« ខ្ញុំបានចូលសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ នៅអាយុ ២៦ ឆ្នាំ ។ ទោះបីជា ខ្ញុំបានមានអារម្មណ៍លួងលោមនៅក្នុងដួងចិត្តខ្ញុំ កាលដែលខ្ញុំបានធ្វើតាមបំណងប្រាថ្នាដើម្បីបានទទួលពរជ័យពីព្រះ ដោយការធ្វើសេចក្ដីសញ្ញាជាមួយទ្រង់ ខ្ញុំដឹងថា ការយល់ដឹងរបស់ខ្ញុំអំពីសេចក្ដីសញ្ញានោះ គឺដូចជាគ្រាប់ពូជដ៏តូចមួយនៅពេលនោះ ។
« កាលដែលច្រើនឆ្នាំបានកន្លងផុតទៅ ហើយកាលដែលខ្ញុំបានខិតខំប្រឹងប្រែងរក្សាសេចក្ដីសញ្ញាបុណ្យជ្រមុជទឹកនោះ និងសេចក្ដីសញ្ញាផ្សេងៗទៀត ដែលខ្ញុំបានធ្វើជាមួយព្រះវរបិតាសួគ៌ ខ្ញុំមានអារម្មណ៍ថា ទ្រង់បានប្រទានពរដល់ខ្ញុំឲ្យទទួលបានការយល់ដឹងដ៏ជ្រាលជ្រៅអំពីទ្រង់ អំពីព្រះអង្គសង្គ្រោះ និងអំពីតួនាទីរបស់ខ្ញុំក្នុងនាមជាបុត្រីក្នុងសេចក្ដីសញ្ញារបស់ព្រះបិតាព្រះមាតាសួគ៌ » ។
—ស៊ីស្ទើរ រ៉េណា អ៊ី អាប៊ើតូ ទីប្រឹក្សាទីពីរនៅក្នុងគណៈប្រធានសមាគមសង្គ្រោះទូទៅ