សូមស្វាគមន៍មកកាន់ច្បាប់នេះ
ពិភពលោកនេះត្រូវការស្ត្រីដ៏ស្មោះត្រង់
រចនារូបភាពដោយ ថូនី អូកា
តាំងពីថ្ងៃទីមួយរបស់អ្នកម្ដាយអេវ៉ា ស្ត្រីមានតួនាទីដ៏ចាំបាច់នៅក្នុងការជួយនាំផែនការរបស់ព្រះសម្រាប់បុត្រាបុត្រីរបស់ទ្រង់ ។ ខែនេះ យើងមានឱកាសរៀនបន្ថែមទៀតអំពីស្ត្រីមួយចំនួន ដែលជាអ្នកត្រួសត្រាយផ្លូវនៅជំនាន់ដំបូងនៃការស្ដារឡើងវិញនៃដំណឹងល្អ ។ ឧទាហរណ៍ នៅទំព័រ ១៦ យើងអាចអានអំពី ជេន ម៉ែននីង ជេមស៍ និងគំរូរបស់នាងអំពីការតស៊ូដ៏ក្លាហានរបស់នាង ។ កាលដែលយើងសិក្សា គោលលទ្ធិ និង សេចក្តីសញ្ញា ២៥ យើងឮព្រះបន្ទូលរបស់ព្រះទៅកាន់ អេមម៉ា ស្ម៊ីធ ស្នើឲ្យគាត់បង្កើតកម្រងទំនុកតម្កើងដ៏ពិសិដ្ឋ ។
ការស្ដារឡើងវិញបន្តនៅក្នុងជំនាន់របស់យើង ហើយពិភពលោកត្រូវការការរួមចំណែកយ៉ាងចាំបាច់របស់ស្ត្រីដ៏ស្មោះត្រង់ទាំងឡាយជាងពេលណាៗទាំងអស់ ។ នៅទំព័រ ១២ អ្នកអាចអានអំពីរបៀបដែលពួកយើងដែលបម្រើជាអ្នកកាន់តំណែងទូទៅនៅក្នុងសាសនាចក្រ បានឃើញអំណាចនៃបព្វជិតភាពដំណើរការនៅក្នុងជីវិតរបស់យើង ។ អំណាចបព្វជិតភាពនេះ មានដល់ទាំងបុរស និងស្ត្រី ជាអ្វីដែលអនុញ្ញាតឲ្យកិច្ចការរបស់ព្រះបន្តនៅលើផែនដី ។
ដោយមិនគិតពីភេទ អាយុ ពូជអំបូរ ឬស្ថានភាពផ្សេងៗទៀតរបស់យើង យើងទាំងអស់គ្នាគឺជាបុត្រាបុត្រីជាទីស្រឡាញ់របស់ព្រះ ជាមួយនឹងមរតក និងសក្ដានុពលដ៏ទេវភាព ។
ដោយស្មោះស្ម័គ្រ
ប្រធាន ចយ ឌី ចូនស៍
ប្រធានអង្គការបឋមសិក្សាទូទៅ