« ខ្ញុំចង់ទៅស្ថានសួគ៌ »
ពេលខ្ញុំបានអធិស្ឋាន ហើយបានទូលសួរដល់ព្រះអំពីវិថីថ្មីនេះ ខ្ញុំបានទទួលអារម្មណ៍ជឿជាក់កាន់តែខ្លាំងឡើងទៅលើសេចក្ដីពិតដែលខ្ញុំបានរកឃើញ ។
រូបថតមកពី Getty Images បង្ហាញដោយគំរូ
ខ្ញុំជាសមាជិកដ៏ស្មោះត្រង់នៅព្រះវិហារមួយផ្សេងទៀត ប៉ុន្តែបន្ទាប់មកខ្ញុំបានចាប់ផ្ដើមសិក្សាអំពីការបង្រៀនរបស់វាអំពីស្ថាននរក ។ គំនិតនេះបង្រៀនថា បន្ទាប់ពីសេចក្ដីស្លាប់នៃរូបកាយ ព្រលឹងត្រូវបានទទួលឲ្យចូលទៅកន្លែងមួយស្រដៀងនឹងគុក ជាកន្លែងដែលព្រលឹងត្រូវសម្អាតឲ្យបរិសុទ្ធមុននឹងទៅស្ថានសួគ៌ ។
កាលដែលខ្ញុំបានគិតអំពីព្រលឹងដែលរងទុក្ខនៅក្នុងស្ថាននរក ខ្ញុំបានសញ្ជឹងគិតពីអនាគតខាងវិញ្ញាណរបស់ខ្ញុំផ្ទាល់ និងចំណងទាក់ទងរបស់ខ្ញុំជាមួយព្រះយេស៊ូវគ្រីស្ទ ។ ខ្ញុំបានចាប់ផ្ដើមអធិស្ឋាន « តើខ្ញុំត្រូវតែធ្វើអ្វីដើម្បីគេចផុតពីស្ថាននរក ? ខ្ញុំចង់ទៅស្ថានសួគ៌ » ។
អ្វីដែលចូលមកក្នុងគំនិតខ្ញុំមុនគេ គឺរស់នៅតាមក្រឹតវិន័យទាំងដប់ប្រការ ។ ខ្ញុំបានមានអារម្មណ៍ថា ប្រសិនបើខ្ញុំបានធ្វើដូច្នោះ ព្រះគុណរបស់ព្រះអម្ចាស់នឹងអនុញ្ញាតឲ្យខ្ញុំចៀសផុតពីស្ថាននរក ។ ខ្ញុំបានតាំងចិត្តដើម្បីរក្សាបទបញ្ញត្តិទាំងឡាយនោះ ហើយបានចាប់ផ្ដើមការតមអាហារ ការអធិស្ឋាន ការសិក្សាព្រះគម្ពីរ និងការសមាធិយ៉ាងខ្លាំង ។
អំឡុងពេលនេះ ខ្ញុំបានទទួលអារម្មណ៍បំផុសគំនិតឲ្យសួរសំណួរមិនធម្មតាមួយអំពីវេជ្ជបណ្ឌិតម្នាក់នៅគ្លីនិក ជាកន្លែងដែលខ្ញុំធ្វើការជាប្រធានគណនេយ្យ ។
ខ្ញុំបានសួរថា « វេជ្ជបណ្ឌិត ធីបូត តើព្រះអម្ចាស់ ព្រះយេស៊ូវគ្រីស្ទ នៅក្នុងព្រះវិហាររបស់លោកទេ ? »
គាត់បានប្រាប់ថា គាត់ជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ចាប់តាំងពីគ្រានោះមក ព្រះវិញ្ញាណបានដឹកនាំការសន្ទនារបស់យើង ។ ខ្ញុំបានសួរគាត់អំពីភាពខុសគ្នារវាងព្រះវិហាររបស់គាត់ និងព្រះវិហាររបស់ខ្ញុំ ។ គាត់បានប្រាប់ខ្ញុំអំពីព្រះគម្ពីរមរមន ។ កាលដែលយើងបានបន្តការសន្ទនារបស់យើង ដួងចិត្តរបស់ខ្ញុំពេញដោយក្តីអំណរ ។ ខ្ញុំបានមានអារម្មណ៏ថា ខ្ញុំបានទទួលចម្លើយដល់ការអធិស្ឋានរបស់ខ្ញុំ ។
ពីរថ្ងៃក្រោយមក ពួកអ្នកផ្សព្វផ្សាយសាសនាបានឲ្យព្រះគម្ពីរមរមនមួយដល់ខ្ញុំ ដែលខ្ញុំបានអាន និងសិក្សាជាមួយពួកគេ ។ ខ្ញុំបានឃើញថា វាអស្ចារ្យណាស់ក្នុងការរៀនអំពីអ្វីដែលថ្មីពីព្រះគម្ពីរ ។ ខ្ញុំបានចាប់ផ្ដើមគោរពតាមពាក្យសម្ដីនៃប្រាជ្ញាវាងវៃ ។
ពេលខ្ញុំបានដឹងថា ខ្ញុំបានបាត់បង់ចំណាប់អារម្មណ៍ពីព្រះវិហាររបស់ខ្ញុំ ជាកន្លែងដែលខ្ញុំបានចូលរួមយ៉ាងសកម្ម នោះខ្ញុំបានឆ្ងល់ថាតើមានអ្វីកំពុងកើតឡើង ។ ខ្ញុំបានអធិស្ឋាន ហើយទូលសួរព្រះអំពីវិថីថ្មីនេះ ។ ពេលខ្ញុំបានអធិស្ឋាន ខ្ញុំបានទទួលអារម្មណ៍ជឿជាក់កាន់តែខ្លាំងលើសេចក្ដីពិតដែលខ្ញុំបានរកឃើញ ។ ខ្ញុំបានសម្រេចចិត្តចូលរួមសាសនាចក្រ សូម្បីតែខ្ញុំបានដឹងថា ខ្ញុំនឹងប្រឈមនឹងការបៀតបៀន ។
ការបៀតបៀនពិតជាបានកើតមាន ប៉ុន្តែព្រះអម្ចាស់បានពង្រឹងខ្ញុំ ។ ខ្ញុំដឹងថា សាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ជាចម្លើយដល់ការអធិស្ឋានដ៏ស្មោះសររបស់ខ្ញុំ ៖ « ខ្ញុំចង់ទៅស្ថានសួគ៌ » ។ ខ្ញុំដឹងថា ខ្ញុំអាចទៅទីនោះបន្ទាប់ពីខ្ញុំស្លាប់ ប្រសិនបើខ្ញុំបន្តស្មោះត្រង់ចំពោះបទបញ្ញត្តិរបស់ព្រះ ។