Digital Lamang
Sa Unsang Paagi Ako Mouswag sa Dalan sa Pakigsaad Samtang Single pa Ko?
Ang tagsulat nagpuyo sa Northern Samar, Philippines.
Bisan asa kita nga panahon sa kinabuhi, ang pagpadayon sa unahan nagpasabot nga magpaduol ngadto kang Kristo.
Dihang miuli ko sa Pilipinas human sa akong misyon, ang unang butang nga gusto nakong buhaton mao ang pagpakighimamat og usa ka takos nga naghupot sa pagkapari kinsa akong minyoan sa templo ug ikauban sa pagtukod og pamilya nga nakasentro kang Kristo.
Nagtuo ko nga sayon ra ang pagkaplag kaniya. Apan karon medyo pipila na ka tuig ang milabay sukad ko nauli, ug nangita pa gihapon ko og tawo nga kaminyoan.
Kanunay kong nag-uswag subay sa akong mga tumong sa tibuok nakong kinabuhi. Sa high school, mihimo ko og mga tumong alang sa akong kaugmaon, piho nga mga tumong nga makatabang kanako nga molambo diha sa dalan sa pakigsaad—ang bugtong dalan nga sa kataposan mogiya kanako, ug tanan kanato, balik sa pagpuyo uban sa Langitnong Amahan.
Mihimo ko og mga tumong nga makagradwar sa seminary ug institute, makatapos sa akong pagtuon, ma-endow sa templo, makaserbisyo og misyon, makakita og trabaho nga haom sa akong kurso, ug makatukod og mahangturong pamilya.
Akong nakab-ot kanang tanan nga mga tumong gawas lang sa usa, ug bisan og mapagarbohon sa tanan nga akong nahuman, gibati nako usahay nga daw mihunong na ko sa paglambo.
Usa ka Paghunong sa Pag-uswag
Sulod sa katuigan migahin ko og daghang panahon sa pagpangita ug pag-ampo aron makakita og tawo nga ikauban sa kahangtoran. Kanunay nakong gisunod ang mga sugo, gi-aplay ang mga pagtulon-an sa mga propeta ug mga lider sa akong kinabuhi, ug naningkamot nga mahimong takos sa pagsulod sa templo. Busa, sa kasagmuyo, usahay naghunahuna kon ngano nga, human sa labihang paningkamot, ako wala gihapon makakab-ot niining usa ka tumong ug sa kasagaran mobati nga dili makapadayon sa dalan sa pakigsaad.
Unsa man ang akong kulang?
Usa ka gabii dihang akong gibati ang sobrang pagkawala sa kadasig mahitungod sa akong pagkadili minyo ug daw dayag nga kakulang sa pag-uswag, akong gibu-bo ang akong mga pagbati ngadto sa Langitnong Amahan. Gibati nako nga wala ko miuswag, magul-anon, ug nawala. Samtang nag-ampo ug namalandong ko, ang usa ka klaro nga pahinumdom miabot kanako:
“Salig sa Ginoo sa bug-os mong kasingkasing. …
“Hinumdomi siya sa tanan mong buhaton ug tultolan ka niya sa matarong nga dalan” (Mga Panultihon 3:5–6).
Nianang higayona, nakaamgo ko nga kanang mga “dalan” naglakip sa dalan sa pakigsaad.
Ako gipahinumdoman nga kon akong “ipatigbabaw ang Dios labaw sa tanan” sa akong kinabuhi, sama sa gitudlo ni Presidente Russell M. Nelson,1 Siya mogiya kanako ngadto kang Kristo ug mohatag kanako og espirituhanong kalig-on, gisaad nga mga panalangin, ug mahangturong pag-uswag.
Pagpadulong ngadto kang Kristo
Si Elder Marvin J. Ashton (1915–94) sa Korum sa Napulog Duha ka Apostoles mitudlo: “Tinoa kon unsa ang imong mga tumong. … Apan ayaw kasagmuyo tungod kay walay dayag nga mga kadaogan. Pahinumdomi ang imong kaugalingon nga ang pagpaningkamot mas importante kay sa pag-abot.”2
Sa dugay kaayong panahon nakatutok lamang ako sa akong mga paglaom sa kaminyoon ug sa akong “kapakyasan” nga wala makakab-ot niana nga pakigsaad. Nakalimot ko sa kamahinungdanon sa mga pakigsaad nga akong gihimo ug sa unsang paagi nga kanang mga pakigsaad nakatabang nako sa pagpaduol ngadto kang Kristo.
Nakalimot ko unsa kanindot ang akong mga sirkumstansya. Karon mismo, tungod kay wala koy mga anak o daghang mga obligasyon sa panimalay, duna koy panahon sa pagpalambo og dugang nga mga kahanas alang sa umaabot. Ako makahatag og dakong bahin sa akong oras sa pagserbisyo sa uban ug sa pagpangalagad sa akong ward. Ako makahimo sa paghimamat og daghang mga tawo ug makat-on gikan kanila. Makahimo ko sa paggahin og panahon sa pagpalambo sa akong mga relasyon ngadto sa akong mga ginikanan ug mga igsoon. Ug ang labing importante, aduna gihapon koy daghang mga oportunidad sa pagpadayon nga mahimong mas mahisama sa Manluluwas.
Nakaamgo ko nga kon ako nagsubay pa gihapon sa dalan nga moggiya kanako ngadto ni Jesukristo, nan, anaa ako sa hustong dapit diin gikinahanglan ako nga anaa.
Ako nagpadayon diha sa dalan sa pakigsaad.
Si Presidente Nelson nagtudlo usab kanato nga “bisan asa kamo diha sa dalan sa pakigsaad … mosaad ako kaninyo nga kon sinsero ug kanunay kamong mobuhat sa espirituwal nga buhat nga gikinahanglan sa pagpalambo sa importante, espirituwal nga kahanas sa pagkat-on unsaon sa pagpaminaw sa mga paghunghong sa Espiritu Santo, makadawat kamo sa tanang direksyon nga gikinahanglan ninyo sa inyong kinabuhi.”3
Nasayod ko nga kon ako giniyahan sa Espiritu, matultolan ko kon asa Siya gusto nga ako moadto, ug ingon man kon asa ako gusto nga moadto.
Sa Unsang Paagi nga Kita Makapadayon sa Pag-uswag?
Kon ugaling gibati ninyo nga nawad-an og kadasig o wala mouswag sa dalan sa pakigsaad, nasayod ko unsay inyong gibati. Usahay akong gibati nga dili komportable o nga walay labot diha sa simbahan kay single ko. Nakadungog usab ko nga daghang minaayo nga mga komedya gikan sa akong pamilya ug sa ward mahitungod sa akong pagka single—sama sa nasitani sa kadaghanan kanatong mga single.
Apan nakakat-on ko nga bisan unsa pa ang akong kahimtang, kanunay kong makapadayon sa paglambo diha sa dalan sa pakigsaad. Ako makapunting sa mga pakigsaad nga akong gihimo ug sa pag-uswag ug sa mahangturong mga saad nga moabot gumikan sa akong pagtuman niana nga mga pakigsaad.
Bisan unsa pa ang atong mga kahimtang karon, kita adunay oportunidad sa pagpalambo sa atong kaugalingon ug mahimong mga tawo nga matinumanon sa pakigsaad nga ang Ginoo gusto nga mao kita.
Sama nga ang Ginoo mitambag ni Emma Smith, kita mahimong “mosalikway sa mga butang sa kalib[o]tan, ug [mangita sa] mga butang nga maayo” ug maghupot og maayo sa atong mga pakigsaad uban sa Dios (Doktrina ug mga Pakigsaad 25: 10).
Minyo man o single, may mga anak o walay mga anak, tanan kita mahimong mouswag diha sa dalan sa pakigsaad samtang kita mosunod sa Iyang tambag, mohigugma ug moserbisyo sa uban, motan-aw sa kasamtangang mga panalangin, mobati ug mopahayag og pasalamat, moila nga ang atong panglantaw gikinahanglan sa pagtukod sa gingharian sa Dios, mobuhat sa family history, mopalambo sa atong mga calling, maningkamot nga mahimong takos sa pagsulod sa templo, ug motabang sa uban aron usab magpabilin diha sa dalan.
Nasayod ko nga samtang kita magpadayon sa unahan ug moila sa kaimportante sa atong mga pakigsaad ug sa espiritwal nga gahom nga gihatag niini, makapangandam kita sa atong kaugalingon (ug sa kalibotan) sa higayon nga ang Manluluwas moanhi pag-usab, ug gani mas maandam pa kita nga modawat sa umaabot nga gisaad nga mga panalangin.