Ang Kahayag ni Kristo

Imahe

illustration full of light, stars, and clouds representing the universe

Tunga: imahe ni Cary Henrie

Ang Doktrina ug mga Pakigsaad 88:7–10 naghisgot kon sa unsang paagi ang kamatuoran “nagdan-ag” ug mao ang Kahayag ni Kristo. Kini nag-ingon nga Siya anaa o mao ang kahayag sa adlaw, buwan, ug mga bitoon ug mao ang gahom niana diin sila ug ang yuta gihimo.

Ang kahayag mao ang usa sa labing lawom ug mahinungdanon nga butang sa tanan nga anaa sa kinaiyahan. Kini ang mohatod og enerhiya, kainit, ug impormasyon latas sa mabugnawng kahaw-ang sa kawanangan sa paagi nga ang siyensiya naningkamot pa gihapon sa pagsabot. Nakahibalo kita og duha lamang ka butang nga lagmit nakapahimo niini: ang nagdagayday nga mga partikulo nga gitawag og “photons” o usa ka lihok nga nagbawod-bawod nga enerhiya diha sa piho nga “natad” nga naglatas sa kawanangan. Bisan pa sa dakong paningkamot sa milabay nga gatusan ka tuig, dili gihapon kita makasulti kon asa niini kini, tungod kay kini ingon og anaa niining duha sa usa ka higayon.

Siyempre, ang atong kakulang sa salabotan dili makapugong kanato nga makabenepisyo sa kahayag. Ang kahayag gikan sa adlaw mopainit ug mopalagsik sa yuta, nga nakapahimo sa kinabuhi nga posible. Nagpakabuhi kita sa atong inadlaw-adlaw nga kinabuhi tungod lamang kay kita makakita, ug kita makakita lamang tungod kay ang kahayag modagayday ngadto sa walay kinutuban nga kawanangan gikan sa tanan nga mga butang nga moamag o mosalamin sa kahayag. Ang kahayag nagtugot kanato nga mahibalo ug makat-on kon kini modapat sa atong mga mata. Tungod sa kahayag, kita makalihok, mouswag, ug molambo. Kuhaa ang kahayag ug ang tanan mahimong usa ka mabugnaw, awaaw nga kamingawan. Ang mga tawo sa dapit nga walay kahayag mapandol lang diha sa kangitngit.

Nan, dili kaayo ikahibulong, nga ang kamatuoran nga nagdan-ag gipakisama ngadto sa Kahayag ni Kristo. Ang kamatuoran ug uban niini ang gugmang putli, kalinaw, pagkamatarong, ug ang tanang maayo nga mga butang modagayday gikan sa Manluluwas ngari kanato. Sama nga ang pisikal nga kahayag naghatag kanato og pagsabot sa pisikal nga mga butang kon kini modapat sa atong mga mata, ang Kahayag ni Kristo naghatag kanato og panabot sa espirituhanon nga mga butang kon kini motandog sa atong mga kasingkasing. Tungod kay ang uniberso napuno sa Kahayag ni Kristo, kita makat-on, mouswag, ug motubo sa espirituhanong paagi. Kuhaa ang Kahayag ni Kristo ug ang tanan mahimong walay kahulogan, awaaw nga kamingawan. Ang mga tawo nga wala niining kahayag mapandol sa mabugnaw nga kangitngit sa kasaypanan, nga walay giya.

Kini nga mga bersikulo sa kasulatan nag-ingon nga si Kristo mao ang kahayag ug ang gahom diin ang mga butang sa kalangitan nahimo. Ang mga Astronomo moingon nga ang inter-aksyon sa mga pwersa sa gravity, sa init, ug sa atomiko ang mimugna sa mga bitoon, sa adlaw, ug sa buwan ug mihatag niini sa mga kinaiyahan nga anaa niini. Tinuod kini, apan sa pagpasabot sa gisulti ni Nobel laureate [pinasidunggan sa talagsaong kalamposan] nga si Richard Feynman, kita nga nagtuon og siyensiya naghulagway kon sa unsang paagi kining mamugnaong mga pwersa naglihok nga wala gayoy kasayoran kon nganong ingon man sila niana. Ang pagpangutana kon ngano mao ang pagpangutana kon unsa gayod ang katuyoan sa mga pwersa. Kini nga mga kasulatan nagsulti kanato nga si Kristo, ug uban Kaniya ang buhat ug himaya sa Dios sa pagpahinabo sa pagka-imortal ug kinabuhing dayon sa tawo (tan-awa sa Moises 1:39), mao ang pinakatumong ug rason sa pagkaanaa sa pisikal nga uniberso.

Ang pisikal nga kahayag nagsilbing usa ka simbolo sa espirituhanong Kahayag ni Kristo. Atong makat-onan gikan sa Doktrina ug mga Pakigsaad 88: 11 nga mahimong adunay usa ka mas dakong koneksyon kaysa simbolo lamang. Kini nga kasulatan nag-igon, “Ug ang kahayag nga nagdan-ag, nga naghatag kaninyo og kahayag, gipaagi kaniya kinsa naglamdag sa inyong mga mata, nga mao ang samang kahayag nga nakapadugang sa inyong mga salabutan.” Kini daw nagsugyot nga ang pisikal nga kahayag ug espirituhanong kahayag managlahi nga pagpakita sa samang butang. Tingali ang kahulogan sa kahayag lisod alang sa siyensiya nga masabot tungod kay ang siyentipikong pagpakisayod wala makahatag sa kompletong hulagway. Tingali ang usa ka pagsabot sa kahayag kinahanglang lakipan sa pinakakinaiyahan ni Jesukristo Mismo aron makompleto. Kon kita sa katapusan makasabot na sa proseso diin ang Dios naglamdag kanato, nan ug nianang higayona lang nga kita makasabot usab sa kanaiyahan sa pisikal nga kahayag, ug uban niini ang kinaiyahan sa Iyang uniberso.