Nahaunang Kababayen-an sa Pagpahiuli
Gikan sa Kapunongan sa Pagpanahi ngadto sa Relief Society
Unsay mahimong buhaton ni Margaret Cook, usa ka single nga sister nga limitado ang kinitaan, aron makatabang og tampo sa pagtukod sa Templo sa Navoo?
Paghulagway ni Toni Oka
Didto sa Nauvoo atol sa sayong bahin sa mga 1840, kabos ang mga Santos ug ang mga sangkap nihit. Tungod sa panginahanglan, silang tanan miapil sa pagtukod og mga panimalay ug mga patigayon. Apan ang ilang labing una nga interes anaa sa pagtukod sa Templo sa Nauvoo.
Ang mga lider sa Simbahan kanunayng nanawagan sa mga Santos diha sa dapit ug sa gawas sa nasod sa pagtabang alang sa trabaho ug sa mga materyal. Sa pamantalaan sa Simbahan nga Times and Seasons, gitudloan ang mga Santos nga “ang Templo pagatukuron pinaagi sa ikapulo ug pagpahinungod, ug ang tanan gawasnon nga mopahinungod sa tanang butang nga gitinguha nila nga ipahinungod … mahimong kini pinaagi sa kwarta o bisan unsa nga siya napanalanginan.” Ang mga lider sa Simbahan miawhag usab sa mga Santos nga modonar og “gamit sa pangkatulog, mga medyas, mga gwantis, mga sapatos, sinina sa tanang matang, ug mga sangkap nga mapalit sa tindahan … alang sa kahupayan sa mga trabahante niining tingtugnaw.”1
Niadtong Marso 1, 1842, si Margaret Cook mibisita ni Sarah Kimball sa pagtahi alang kaniya. Gihisgutan nila ang bag-ohay nga mga hangyo alang sa suporta sa mga trabahante sa templo. Ang kinitaan ni Margatet diyutay ra, apan ang iyang kahanas sa pagpanahi mahimong mapuslanon niadtong nagkinahanglan og sinina. Kon aduna lang unta magamit nga panapton, miingon si Margaret nga “malipay siya nga motampo sa pagpanahi.”2 Miingon si Sarah nga siya mosangkap sa materyal, ug samtang nagpadayon ang ilang panag-istoryahanay, naghunahuna sila kon ang uban tingali gustong motabang. Nakig-istorya sila sa mga higala mahitungod sa pag-organisar og usa ka kapunongan sa pagpanahi.
Kini nga panag-istoryahanay, nga gipasiugdahan ni Margaret ug Sarah agig pagsunod sa inspirasyon, misangpot ngadto sa dugang dinasig nga pakig-inter-aksyon sa uban, lakip ni Propeta Joseph Smith. Agig tubag, ang Ginoo misulti sa Iyang propeta nga Siya adunay “butang nga mas maayo” alang sa mga babaye ug midasig ni Joseph sa pagtukod kanila ubos sa “ang sumbanan sa pagkapari.”3 Kini ang nakapahimutang sa sukaranang pagpadayag sa unsay atong nailhan karon isip Relief Society, usa sa labing karaan ug kinadak-an nga organisasyon sa pagserbisyo sa kababayen-an.