Mga Young Adult
Pagkaplag og Espirituhanong Abag Human nga Nag-inusarang Miapil sa Simbahan
Ang tagsulat nagpuyo sa Virginia, USA.
Wala pa ko sukad mibati nga nahilayo pag-ayo sa akong mga ginikanan, apan ang Langitnong Amahan mipadala og mga anghel aron sa paglig-on kanako.
Alang nako, ang magkinaugalingon sa pag-apil sa Simbahan, nga wala ang makapalig-on nga pagpamatuod sa akong mga higala ug pamilya, lisod ug mingaw.
Ang pagkakita sa Simbahan mao ang dugay nang gipaabot nga tubag sa akong mga pag-ampo aron mas makasabot sa akong Manluluwas ug magkinabuhi sama Kaniya. Apan naggikan ko sa mahalaron nga pamilya nga aktibo sa simbahang Baptist, ug ang akong desisyon nga mahimong usa ka Santos sa Ulahing mga Adlaw wala masabti ug agresibong gisalikway.
Gusto sa akong mga ginikanan ang unsay labing maayo alang kanako ug mituo nga ang akong pagbiya sa relihiyusong pagmatuto sa among pamilya makaguba sa akong hugot nga pagtuo.
Mas nagkalisod pa ang mga panghitabo sa dihang ang akong amahan namatay gumikan sa kanser sa wala pa ko nabunyagan. Ang pagsagubang sa pagkawala sa akong mahigugmaong amahan samtang anaa usab sa pagpili tali sa kabubut-on sa Dios ug sa kabubut-on sa akong pamilya hapit dili na maantos.
Mibati ko nga giduot og maayo kutob sa akong maantos.
Mga Anghel sa Langitnong Amahan
Sa dihang si Jesukristo nag-antos sa Getsemani, ang Dios mipadala og anghel aron sa paglig-on Kaniya (tan-awa sa Lucas 22:43). Nagtuo ko nga ang anghel gipadala aron sa pagtabang ni Kristo isip usa ka pagpadayag sa walay pagkapakyas nga gugma sa Langitnong Amahan. Sa samang paagi, Siya mipadala og mga anghel aron sa paglig-on kanako.
Kauban niining mga anghel mao si Sister Neff ug si Sister Smallcomb, ang mga misyonaryo kinsa unang nagtudlo kanako. Sila adunay pagpamatuod ug salabotan sa paggiya kanako sa akong bug-at nga mga pangutana. Ug sa mas nagkadako ang gugma ni Jesus nga akong nasaksihan pinaagi kanila, mas nagkadako ang akong paghigugma sa ebanghelyo.
Mga tuig ang milabay human sa akong bunyag, nakigsulti ko ni Sister Smallcomb ug nagpasalamat kaniya tungod sa kaandam gihapon sa pagtubag sa akong mga pangutana. Mipahayag usab ko nga nanghinaot ko nga ako wala makasamok kaniya.
“Marcus,” miingon siya, nga nagkatawa, “mahimo nimong ipadala kanako ang imong mga pangutana mahitungod sa ebanghelyo hangtod sa kahangtoran.”
Makahupay kaayo kadto nga masayod nga aduna koy tawo nga akong kaduolan alang sa mga tubag. Sa usa ka paagi, si Sister Neff ug Sister Smallcomb mao ang akong tigmatuto diha sa ebanghelyo, nagtabang sa paggiya kanako sa akong dalan sa pagkakabig ug nagtabang kanako nga makasabot unsay kahulogan sa pagkamiyembro sa Simbahan.
Apan dili lamang sila ang mga tawo nga mogiya kanako.
Pagkaplag og Uban nga mga Tigmatuto
Ganahan ko sa una nga adunay espirituhanong panaghisgotan uban sa akong pamilya. Apan sa dihang miapil ko sa Simbahan, kadto nga mga panaghisgotan—bisan sa sulod lang sa usa ka panahon—nahimong imposible nga mapahigayon. Ang espirituhanong panaghisgotan uban sa akong pamilya nakapahimo nako nga mobati nga nawad-an og kusog kay sa molagsik.
Ang pagsunod sa ebanghelyo nga wala ang akong pamilya dili usa ka pagsulay nga akong malahutay nga ako rang usa. Maayo gani, ang akong Langitnong Amahan ug ang matinud-anong bishop sa akong young single adult ward anaa aron sa pagtabang.
Bisan unsa pay akong hisgotan uban sa akong bishop, kanunay kong milambo sa espirituhanong paagi. Akong nabati ang suporta ug gugma nga akong gikinahanglan.
Tingali ang inyong espirituwal nga mga panginahanglan dili matagbaw pinaagi sa usa ka bishop. Apan usa ka magtutudlo sa institute, presidente sa misyon, senior missionary couple, usa ka tigpangalagad nga brother o sister, usa ka higala, ug daghan pang uban mahimong maanaa aron sa pagtabang kaninyo.
Unsaon nato sa pagpangita kanang mga tigmatuto sa atong mga kinabuhi? Usa sa labing importante nga lakang mao ang pagbuhat sa inyong labing maayo sa pagpadayon sa pagsunod sa ebanghelyo. Ug kamo makasalig nga ang usa ka hingpit nga Langitnong Amahan makagiya (ug mogiya) sa daghang Kristohanong mga tawo aron sa pagtabang kaninyo.
Makakita usab kamo og usa ka tigmatuto pinaagi sa pagbutang sa inyong kaugalingon diha sa positibo nga mga sitwasyon. Ang pagpatuman og usa ka buluhaton sa pagpangalagad, pagbuhat sa calling, pagtanyag og mga pagkaon ngadto sa mga misyonaryo ug pag-apil kanila sa mga leksyon, pagtambong sa institute, ug paghatag sa inyong pagpamatuod mao ang tanang paagi sa pagmugna og mga oportunidad sa pagpalambo og maayong mga relasyon.
Pagsalig sa Langitnong Amahan
Sa tibuok nakong panaw, sa higayon nga ako mibati nga nag-inusara, ang Langitnong Amahan mipadayon sa pagpadala og mga anghel ngari kanako aron sa paghupay ug paglig-on kanako.
Ako nakaamgo nga ako wala gayod nabutang sa posisyon diin wala ko nakaangkon og suporta. Ang Langitnong Amahan kanunayng migiya kanako niadtong makatabang, ilabi na nga sa kahimtang sa panimalay lisod. Ang akong gibuhat mao lang ang pagpadayon sa akong hugot nga pagtuo ug kanunay nga pagbukas sa akong espirituhanong mga mata ug dalunggan alang sa Iyang paggiya ug mga panalangin. Ako balaanong mopamatuod nga ang mga pulong sa Manluluwas tinuod:
“Paharia ninyo ang Dios ug pagkinabuhi kamo uyon sa iyang kabubut-on ug ang ubang mga butang ihatag ra niya kaninyo” (Mateo 6:33).
Mahigugmaon kong moawhag kaninyo nga kanunayng moapil sa mga kalihokan sa ebanghelyo samtang kamo mag-ampo sa Langitnong Amahan nga giyahan kamo ngadto sa mapuslanon nga mga relasyon ug tigmatuto nga motabang kaninyo nga magpabilin diha sa dalan sa pakigsaad ug mobalik ngadto Kaniya.