Digital Lamang

Nganong Nagtuman Ako sa Pulong sa Kaalam Kon Balik-balik Akong Nag-atubang og Tintasyon

Ni Nicole Nehren

Ang tagsulat nagpuyo sa Utah, USA.

Ang pag-inom og alkohol ug kape usa ka inadlaw nga buluhaton sa akong mga kauban sa trabaho, mao nga kanunay akong mibati nga walay labot. Apan ang paghinumdom sa kon ngano nga adunay Pulong sa Kaalam nakatabang kanako nga magpabiling lig-on.

Imahe

babaye nga namalit og mga produkto

Samtang nagdako pa, kasagaran duol ko sa impluwensya sa alkohol, tsa, ug kape, sagad kon mogahin ko og panahon uban sa akong mga paryente. Ang akong pamilya ug ako mao lang ang miyembro sa Simbahan taliwala sa akong mga paryente, ug usahay bation ang kaluya ug pag-inusara kon ang uban mopakaubos sa akong mga gituohan. Apan nasayod ko nga ang Dios tinuod, ako adunay hugot nga pagtuo sa Iyang gipahiuli nga ebanghelyo ug sa akong mga pakigsaad sa bunyag, ug ako nasayod nga Siya gusto nga ako mohimo og maayong mga desisyon.

Sa dihang mibalhin ko ngadto sa London, England, sa bag-o pa lang ko nga nagbaynte anyos, nagsugod ko sa pagtrabaho sa usa ka internasyonal nga bangko. Ang tanan nagsalig sa tsa ug kape aron makalahutay sa tibuok adlaw nga trabaho diha sa among nagkapuliki nga buhatan sa pamatigayon. Sa ikaduhang adlaw sa akong trabaho, giandaman ko sa akong manedyer og usa ka tasa nga tsa. Akô siyang gipasalamatan apan gipasabot nga dili ko moinom og tsa—siya dayon mitanyag nako og kape.

Nasayod ko nga nagmabination lang siya, apan determinado ko nga barogan ang akong mga sumbanan. Bisan tuod og medyo kiwaw og gamay, gipasabot nako sa mas detalyado kon nganong dili ko moinom og tsa o kape, ug nakahimo ko sa pagpakigbahin sa akong mga gituohan ngadto kaniya, lakip sa Pulong sa Kaalam.

Usa kadto ka talagsaon nga kasinatian, apan may susama nga mga sitwasyon nga dili kanunay maayo ang resulta.

Pag-atubang og Tintasyon

Paglabay sa panahon, nga gilibotan sa naandan nga pag-inom sa uban og makahubog nga ilimnon nakapalisod alang nako sa paghupot sa akong mga sumbanan. Ang pag-adto sa mga bar uban sa mga kliyente ug mga kauban sa trabaho usa ka regular nga sirkumstansya nga naapil ko. Nagkaluya ko sa pagpasabot kon nganong mibalibad ko sa pag-inom, ug usahay gusto lamang ko nga mahiangay.

Apan labaw pa sa tinguha nga mahiangay, gusto kong mahimo nga ehemplo sa usa ka disipulo ni Jesukristo, mao nga nakat-on ko og pipila ka mga paagi nga nakatabang nako sa pagsukol sa tintasyon:

Nag-ampo ko alang sa kalig-on matag buntag aron makahimo og maayong mga desisyon.
Kasagaran maminaw ko sa mga pakigpulong sa komperensiya o mga himno sa akong pagpadulong sa trabaho.
Akong gipapilit ang akong paborito nga kasulatan sa samin sa akong kaligoanan aron basahon matag adlaw: “ Oo, ako nasay[o]d nga ako walay bili; ingon sa akong kusog ako mahuyang; busa ako dili manghambog sa akong kaugalingon, apan ako manghambog sa akong Dios, kay diha sa iyang kusog ako makahimo sa tanan nga mga butang ” (Alma 26:12).
Nagpatabang ko sa akong labing suod nga mga kauban sa trabaho, naghangyo nila sa pagsuporta nako kon ang uban modalit nako og “bisan usa lang ka yarok.” Makabantay sila kon dili ko komportable ug mabination nga moatubang ug mo-order para nako og “tubig nga ilimnon nga dunay ice” aron sa pagtabang kanako nga malikayan ang pagbati nga dili komportable atol niini nga mga panagtigom.
Nakigtinabangay ko sa ubang relihiyoso nga mga inbididwal kinsa adunay susama nga mga moral. Dihay pipila ka aktibo sa ilang tinuohan nga mga Muslim kinsa nasuod nako, ug kasagaran magtupad mi nga manglingkod sa pagtrabaho sa buluhaton atol sa mga kalingawan sa among trabaho aron makabaton kami og kalig-on pinaagi sa gidaghanon. Ang pagpalibot sa akong kaugalingon sa mga tawo kinsa mitahod sa akong mga sumbanan nakatabang nako pag-ayo (tan-awa sa Ecclesiastes 4:9–10).
Naningkamot ko sa pagpunting ngadto sa akong pakigsaad sa bunyag nga “kanunay mohinumdom Kaniya” (tan-awa sa Doktrina ug mga Pakigsaad 20: 77, 79), nga nakatabang kanako nga mobati og labaw nga kabuhong sa Espiritu. Misaad ko sa pagsunod sa Dios ug mahimong usa ka disipulo ni Kristo, ug ang pagpaningkamot nga sa kanunay mohinumdom sa Manluluwas nakatabang nako sa pagbaton og mahangturon ug walay kinutoban nga panglantaw sa labing higpit nga mga panahon sa tintasyon.

Paghinumdom sa mas Taas nga Katuyoan

Apan unsay mas nakatabang nako sa pagbuntog sa tintasyon mao ang kahibalo nga ang Ginoo adunay mas taas nga katuyoan alang sa pagtuman sa tanan Niyang mga sugo, lakip na sa Pulong sa Kaalam. Ug nasayod ko nga ang pagpabiling matinud-anon sa mga sugo kanunay nga nakapanalangin sa akong kinabuhi sa daghang mga paagi. (Tan-awa sa Doktrina ug mga Pakigsaad 82:10.)

Nakaamgo ko nga ang Pulong sa Kaalam mas labaw pa kay sa dili pag-inom og ilimnong makahubog ug sa uban pang isog nga mga ilimnon. Ang Langitnong Amahan mihatag kanato niini nga sugo aron sa pagtabang kanato nga maalimahan ang maayong panglawas ug mabansay ang pagkontrolar sa kaugalingon, aron sa pagpanalipod kanato gikan sa posibleng makadaot nga mga pagkaadik ug sa ubang mga sangpotanan, ug sa pagtugot kanato nga makakaplag og mas dakong kaalam ug kahibalo (tan-awa sa Doktrina ug mga Pakigsaad 89).

Akong nakita nga kon mopakita kita og pagkamasulondon sa yanong mga butang nga gisugo sa Ginoo kanato, ang atong kapasidad ug tinguha sa pagtuman sa tanan Niyang mga sugo motubo, ug kita makakat-on sa pagbuntog og mas dako pa nga mga tintasyon ug mga hagit (tan-awa sa 2 Nephi 28: 30).

Nasayod ko nga ang Langitnong Amahan nahigugma kanako ug nga pinaagi sa Iyang kalig-on ug sa Manluluwas, ako makabuntog sa pagpamugos sa akong mga higala ug sa tintasyon. Kanunay nakong hinumdoman ang Alma 7:11–12, nga nagpasabot kon sa unsang paagi nga ang Manluluwas nakasabot sa tanan nga atong giatubang—mga kasakit, pag-antos, ug gani mga tintasyon. Siya nasayod kon unsaon “sa pagtabang sa iyang mga katawhan sumala sa ilang mga kahuyang.”

Samtang ako misalig ni Jesukristo sa pagtabang kanako diha sa akong mga kahuyang, akong gibati ang Iyang kalig-on nga misulod sa akong kinabuhi, ug mas hingpit nakong nakita nga Siya makasabot kanato. Ug kon kita mag-atubang og tintasyon, Siya andam sa pagtabang kanato nga makakita sa mas dako nga panglantaw ug makapili og maayo. Ang atong buhaton mao lamang ang pagdangop ngadto Kaniya.